នៅថ្ងៃទី៩ ខែកញ្ញា ឆ្នាំ២០២៥ នេះ អាកាសយានដ្ឋានអន្ដរជាតិតេជោ បានបើកប្រតិបត្ដិការហោះហើរជាលើកដំបូងហើយ បន្ទាប់ពីបានចំណាយពេលសាងសង់អស់រយៈពេលជាច្រើនឆ្នាំមក។ ចំពោះជើងហោះហើរដំបូងគេ ដែលចូលចតក្នុងអាកាសយានដ្ឋានថ្មីនេះ គឺក្រុមហ៊ុនអាកាសចរណ៍ជាតិ Air Cambodia​ ដែលដឹកភ្ញៀវទេសចរមកពីប្រទេសចិន។ តើអាកាសយានដ្ឋានអន្ដរជាតិតេជោ នេះចំណាយថវិកាសាងសង់អស់ចំនួនប៉ុន្មាន?

តាមការគ្រោងទុកសម្រាប់ដំណាក់កាលទី១ គម្រោងនេះនឹងចំណាយទឹកប្រាក់ចំនួន ១.៥ ពាន់លានដុល្លារ។ ប៉ុន្ដែយ៉ាងណាតាមការបញ្ជាក់ពីអ្នកឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានបញ្ជាក់ថា អាកាសយានដ្ឋានអន្ដរជាតិតេជោ បានចំណាយថវិកាសាងសង់អស់ទឹកប្រាក់ប្រមាណជាង ២ ពាន់លានដុល្លារនៅដំណាក់កាលទី១ និងជាប់ចំណាត់ថ្នាក់លេខ ៩ នៃគម្រោងស្ថាបត្យកម្មពិភពលោកទាំង ១១ក្នុងឆ្នាំ២០២៥ ផ្អែកលើប្រណីតភាព រចនាបថ និងបរិស្ថានប្រកបទៅដោយរុក្ខជាតិបៃតង និងបានសាងសង់ឡើងលើផ្ទៃដីជាង ២ ៦០០ហិកតា។ 

សូមជម្រាបថា អាកាសយានដ្ឋានអន្ដរជាតិតេជោ លំដាប់​ 4F បានចាប់ផ្ដើមបើកដំណើរការសាងសង់កាលពីអំឡុងខែមិថុនា ឆ្នាំ២០២០ ដោយក្រុមហ៊ុន ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) ដែលជាក្រុមហ៊ុនបង្កើតឡើងរួមគ្នាដោយក្រុមហ៊ុន OCIC និងរដ្ឋលេខាធិការដ្ឋានអាកាសចរណ៍ស៊ីវិល ដែលមានទីតាំងស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។ អាកាសយានដ្ឋានថ្មីនេះ អាចទទួលយន្តហោះខ្នាតធំចុះចតបានដូចជា ប្រភេទ Airbus A380 និង ប្រភេទ Boeing 747។

គួរបញ្ជាក់ផងដែរថា អាកាសយានដ្ឋានអន្ដរជាតិតេជោនេះ ត្រូវបានបែងចែកការសាងសង់ជា ៣ ដំណាក់កាល។ ដោយក្នុងនោះសម្រាប់ដំណាក់កាលទី១ ដែលបើកដំណើរការនៅថ្ងៃទី៩ ខែកញ្ញា ឆ្នាំ២០២៥នេះ មានសមត្ថភាពទទួលអ្នកដំណើរបានចំនួន ១៣ លាននាក់ក្នុង ១ ឆ្នាំ, ដំណាក់កាលទី២ គ្រោងនឹងបញ្ចប់នៅឆ្នាំ២០៣០ ដែលអាចទទួលភ្ញៀវទេសចរបានចំនួន៣០លាននាក់ក្នុង១ឆ្នាំ និងដំណាក់កាលទី៣ គ្រោងនឹងបញ្ចប់នៅឆ្នាំ២០៥០ អាចទទួលភ្ញៀវទេសចរបានចំនួន៥០លាននាក់ក្នុង១ឆ្នាំឯណោះ៕