កាលពីឆ្នាំ២០២៣ តួលេខប្រភពទុនវិនិយោគមិនមានឈ្មោះអ្នកជំនួញខ្មែរស្ថិតនៅក្នុងបញ្ជី លេខរៀងទី១០នោះទេ ប៉ុន្តែនៅក្នុងរយៈពេល១ឆ្នាំកន្លងមកនេះ ពិសេសនៅដើមឆ្នាំ២០២៥នេះ អ្នកជំនួញខ្មែរបានចាប់ អារម្មណ៍ចំពោះការងារវិនិយោគនៅកម្ពុជាដែលបានជួយអភិវឌ្ឍន៍សេដ្ឋកិច្ចជាតិនិងបង្កើតទីផ្សារការងាររហូតបានឈរនៅលំដាប់រងទី២ បន្ទាប់ពីចិន។ នេះបើតាមការដងស្រង់ចេញពីក្រសួងព័ត៌មាន។
ប្រភពខាងលើបានបន្តឱ្យដឹងទៀតថា ចាប់ពីដើមឆ្នាំ២០២៥នេះមក កម្រិតបរិមាណទុនវិនិយោគដោយអ្នកជំនួញខ្មែរបាន រក្សាទីតាំង ដោយកាលពីខែមករាឆ្នាំ២០២៥ បរិមាណទុនវិនិយោគដោយអ្នកជំនួញខ្មែរ នៅតែឈរលេខរៀងទី២ បន្ទាប់ពីអ្នកជំនួញចិន ដែលធ្វើអោយទុនវិនិយោគសរុបនៅកម្ពុជា ឡើងដល់៧៤៨លានដុល្លារ បង្កើតការងារបានជាង៤៦ពាន់កន្លែង។
ជាមួយគ្នានោះដែរ កាលពីខែកក្ដដា ឆ្នាំ២០២៥ថ្មីៗនេះ បរិមាណទុនវិនិយោគដោយអ្នកជំនួញខ្មែរ នៅតែឈរលេខរៀងទី២ បន្ទាប់ពីអ្នកជំនួញចិន ពោលគឺទុនពីចិន ៣៧,៨៩ភាគរយ ខណៈទុនពីអ្នកជំនួញក្នុងស្រុកមាន៣១,២៤ភាគរយ ដែលធ្វើអោយទុនវិនិយោគសរុបនៅកម្ពុជា ឡើងដល់៩៤៤លានដុល្លារ បង្កើតការងារបានជាង៥៧ពាន់កន្លែង។ កំណើនកម្រិតបរិមាណទុនវិនិយោគដោយអ្នកជំនួញខ្មែរនេះ បានជួយដោះស្រាយការងារយ៉ាងច្រើនជូន ពលករខ្មែរដែលវិលត្រឡប់មកពីប្រទេសជិតខាងផងដែរ។
គួរជម្រាបផងដែរថា ប្រភពទុនសំខាន់បានមកពីបរទេស ដូចជា អ្នកជំនួញមកពីចិន ដាក់ទុន៤៥,៦ភាគរយ កូរ៉េខាងត្បូង ១១,៨ភាគរយ សិង្ហបុរី ៦,៥ភាគរយ ជប៉ុន ៦,២ភាគរយ វៀតណាម ៥,៣ភាគរយ ម៉ាឡេស៊ី ៤,៤ភាគរយ ថៃ ៤,០ភាគរយ កាណាដា ៣,៥ភាគរយ និង ចក្រភពអង់គ្លេស បានដាក់ទុនវិនិយោគនៅកម្ពុជាស្មើ៣,២ភាគរយ។ ប៉ុន្តែចាប់ពីឆ្នាំ២០២៤មក អ្នកជំនួញខ្មែរបានចាប់អារម្មណ៍ចំពោះការងារវិនិយោគក្នុងស្រុក ដោយបានឡើងទៅឈរលេខរៀងខ្ពស់ក្នុងបញ្ជី ពោលគឺលំដាប់ទី២៕
