តារាចម្រៀងស្រីល្បីឈ្មោះ Jessi ដែលទើបបានហោះមកកាន់ទឹកដីកម្ពុជាស្ពាយការសម្តែងដ៏កក្រើក ផ្ទុះការគាំទ្រជាខ្លាំង តាមពិតមុនអាចឈរលើឆាកកាន់ក្បាលមេក្រូបង្ហើរសំនៀងច្រៀងបំពេអារម្មណ៍មនុស្សរាប់ពាន់ម៉ឺននាក់ឲ្យហ៊ោកញ្រ្ជៀវ ស្ត្រីម្នាក់នេះធ្លាប់មានប្រវត្តិគេងក្នុងបន្ទប់សូណាជាញឹកញាប់ ព្រោះគ្មានលុយគ្រប់គ្រាន់ដើម្បីជួលកន្លែងស្នាក់នៅ។
បង្វិលកងចក្រទាញពេលវេលានិម្មិតមើលរូបភាពអតីតកាល ក្នុងកំឡុងឆ្នាំ២០០៥ គ្រាដែល Jessi បង្ហាញខ្លួនដំបូងៗនៃពិភពឧស្សាហកម្មតន្ត្រីដោយចេញអាល់ប៊ុមទោល 'Get Up' នាងមិនបានរកឃើញភាពជោគជ័យភ្លាមៗនោះទេ ហើយចួនកាលត្រូវបង្ខំចិត្តគេងក្នុងបន្ទប់សូណា ជំនួសឲ្យកន្លែងស្នាក់នៅសមរម្យត្បិតពុំមានប្រាក់សម្រាប់ជួលទាល់តែសោះ។ នាងបាននិយាយក្នុងកម្មវិធី 'Joy of Conversation' កាលពីឆ្នាំ២០២១យ៉ាងដូច្នេះថា៖ «បទពិសោធន៍នៃអាជីពរបស់ខ្ញុំគឺធំធេងណាស់ ចាប់តាំងពីថ្ងៃចាប់ផ្តើមដំបូងរហូតដល់មានការយល់ច្រលំជាច្រើនអំពីខ្ញុំ»។
ក្រោយដកឃ្លាចេញពីវិស័យសិល្បៈអស់រយៈពេល៥ឆ្នាំ Jessi បានជម្នះឧបសគ្គក្រោកឈរឡើងវិញនិងត្រួសត្រាយផ្លូវដើរដោយខ្លួនឯង ហើយទីបំផុតនាងបានក្លាយជាតារារ៉េបស្រីដ៏ល្បីម្នាក់ក្នុងវិស័យចម្រៀងកូរ៉េមានសមត្ថភាពអាចឆក់យកបេះដូងអ្នកទស្សនារាប់លាននាក់។ Jessi ទទួលបានប្រជាប្រិយភាពយ៉ាងសម្បើមសម្រាប់បទចម្រៀងដ៏ល្បីរបស់នាងដែលមានចំណងជើងថា "Nunu Nana" កាលពីឆ្នាំ២០២០។ នាងបានថ្លែងទាំងអារម្មណ៍ក្តុកក្តួលថា៖ «ខ្ញុំមិនដែលនឹកស្មានដល់នោះទេ។ ខ្ញុំបានយំនៅក្នុងផ្ទះដោយគ្មានការខ្មាសអៀនអ្វីទាំងអស់ ពេលដឹងថាទីបំផុតខ្ញុំបានឃើញពន្លឺនៃអាជីពរបស់ខ្ញុំក្រោយយកបេះដូងរស់នៅជាមួយវាអស់រយៈពេល១៥ឆ្នាំ»។
គិតត្រឹមចុងឆ្នាំ២០២២ តារារ៉េបមាឌល្អិតសំឡេងធ្ងន់កំប្លែងស្ងួតកូរ៉េ-អាមេរិក Jessi ដែលមានឈ្មោះពេញថា Jessica Ho បានចេញចម្រៀង១៥បទ សម្តែងក្នុងរឿងភាគកូរ៉េចំនួន៤រឿង អាល់ប៊ុមទោលមួយ និងអាល់ប៊ុមបន្តផ្ទាល់មួយក្រោមឈ្មោះរបស់នាង និងត្រូវបានគេប៉ាន់ប្រមាណមានទ្រព្យសម្បត្តិសុទ្ធចន្លោះពី ២ទៅ៤លានដុល្លារ ខណៈប្រភពទ្រព្យសម្បត្តិចម្បងរបស់នាងគឺអាជីពតន្ត្រី។ នេះបើយោងតាមការចេញផ្សាយដោយទស្សនាវដ្តី Forbes។ ក្នុងដំណើរជីវិតជាអ្នកសិល្បៈ Jessi ធ្លាប់បានលើកឡើងយ៉ាងដូច្នេះថា៖ «អ្នកខ្លះនិយាយថាវាគ្រាន់តែជាតន្ត្រីប៉ុណ្ណោះ ប៉ុន្តែសម្រាប់ខ្ញុំវាគឺជាជីវិត។ ខ្ញុំមិនបានជ្រើសរើសតន្រី្តទេ តែតន្ត្រីជាអ្នកជ្រើសរើសយកខ្ញុំ»៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
