ធ្វើការយូរហើយសល់តែក្បាលពោះ គឺជាពាក្យស៊កសៀត ឆ្លៀតលេងបន្លំមែន របស់បុគ្គលិកកំពុងបម្រើការក្នុងស្ថាប័នមួយចំនួន។ នេះពុំមែនជារឿងលេងសើចទេ តែជាជំងឺមហារីកមួយលើទម្លាប់ចាយវាយលុយកាក់ខុសផ្លូវទាំងមិនដឹងខ្លួន និងជាប់អន្ទាក់ធ្លាក់ក្នុងរណ្តៅបំណុល ព្រោះតែរឿងធំៗទាំង៤ខាងក្រោមនេះ៖

១/. ពុំមានផែនការហិរញ្ញវត្ថុច្បាស់លាស់៖ មានមនុស្សតិចតួចណាស់ដែលបានរៀបចំផែនការហិរញ្ញវត្ថុឲ្យបានត្រឹមត្រូវ និងមានភាពច្បាស់លាស់សម្រាប់កញ្ចប់ថវិការបស់ខ្លួន។ យ៉ាងណាមិញ ផែនការហិរញ្ញវត្ថុពិតជាមានសារសំខាន់ណាស់ក្នុងការគ្រប់គ្រងលំហូរចរន្តសាច់ប្រាក់ និងគ្រប់គ្រងការចំណាយប្រកបដោយសណ្តាប់ធ្នាប់។ មិនតែប៉ុណ្ណោះវាក៏ជាផ្នែកមួយដែលជួយយើងក្នុងការសម្រេចនូវគោលដៅដែលខ្លួនចង់បានឲ្យក្លាយទៅជាការពិតក្នុងរយៈពេលដ៏ច្បាស់លាស់មួយ។ ប្រសិនបើអ្នកពុំមានផែនការហិរញ្ញវត្ថុទេនោះ អ្នកនឹងរស់នៅក្នុងភាពវិលវល់ មិនមានភាពច្បាស់លាស់ចំពោះហិរញ្ញវត្ថុខ្លួនឯង មានប៉ុន្មានចាយប៉ុណ្ណឹងជាក់ជាមិនខាន។

២/. ចាយតាមចំណង់៖ មនុស្សដែលមានវ័យកណ្តាល និងយុវវ័យ ជាក្រុមមនុស្សដែលចូលចិត្តធ្វើការចំណាយតាមចំណង់ មិនចេះគ្រប់គ្រងអារម្មណ៍របស់ខ្លួនឯងឲ្យបានល្អក្នុងការចាយវាយ។ ពួកគេចង់បានអ្វី ឬនឹកឃើញអ្វីភ្លាមក៏សម្រេចចិត្តដកលុយចេញពីហោប៉ៅទិញរបស់នោះភ្លាមដោយពុំបានគិតឲ្យបានល្អិតល្អន់ជាមុននោះទេ។ មិនតែប៉ុណ្ណោះ ពួកគេបែងចែកមិនដាច់រវាងតម្រូវការពិតប្រាកដ និងការចង់បាន ជាហេតុធ្វើឲ្យចាយវាយខ្ជះខ្ជាយនិងមិនចំគោលដៅ។

៣/. ប្រើប្រាស់សេវាបង់រំលស់លើសពីសមត្ថភាពខ្លួន៖ ដូចយើងបានដឹងរួចមកហើយថានាពេលបច្ចុប្បន្ននេះដើម្បីបង្កភាពងាយស្រួលដល់អតិថិជន និងអាចឈរជើងក្នុងទីផ្សារប្រកួតប្រជែងខ្លាំង មានក្រុមហ៊ុនជាច្រើនបានបង្កើតនូវសេវាកម្មបង់រំលោះ ឬបង់ជាដំណាក់កាលក្នុងគោលបំណងជួយសម្រួលដល់អតិថិជនដែលពុំមានលទ្ធភាពបង់ផ្តាច់។ ទន្ទឹមនឹងភាពវិជ្ជមានវាក៏ជះផលអវិជ្ជមានដល់អ្នកដែលធ្វើការសម្រេចចិត្តប្រើប្រាស់សេវាបង់រំលស់ដែលលើសពីសមត្ថភាពរបស់ខ្លួនដើម្បីទិញរបស់ដែលខ្លួនចង់បានផងដែរ ហើយវាជាមូលហេតុមួយដែលធ្វើឲ្យពួកគេផុងខ្លួនទៅក្នុងរណ្តៅនៃបំណុល។​

យ៉ាងណាមិញ មានមនុស្សមិនតិចទេដែលកំពុងស្ថិតនៅក្នុងស្ថានភាពបែបនេះដូចជាយុវវ័យ និងមនុស្សវ័យកណ្តាល​ជាពិសេស អ្នកដែលកំពុងបម្រើការងារក្នុងក្រុមហ៊ុន ឬស្ថាប័នផ្សេងៗ។ កត្តាដែលនាំឲ្យពួកគេធ្លាក់ក្នុងសភាពបែបនេះគឺអាចបណ្តាលមកពី ការគ្រប់គ្រងចំណង់មិនបានល្អ និងមិនបានត្រួតពិនិត្យពីសុខភាពហិរញ្ញវត្ថុរបស់ខ្លួនឲ្យត្រឹមត្រូវ។

៤/. ធ្វើការដើម្បីតែលុយ៖ ជាការពិត មនុស្សមួយចំនួនធ្វើការដោយសម្លឹងឃើញតែគុណសម្បត្តិម្យ៉ាងប៉ុណ្ណោះហើយគុណសម្បត្តិនោះគឺជា លុយនេះឯង។ ពួកគេយល់ថាដើម្បីអាចរកលុយបានច្រើន និងក្លាយទៅជាអ្នកមាន ត្រូវតែខិតខំធ្វើការឲ្យខ្លាំងដូចជាការថែមម៉ោងការងារជាដើម។ ការយល់ឃើញបែបនេះ វាមិនត្រឹមត្រូវទាំងស្រុងនោះទេ ការលក់ពេលវេលានិងកម្លាំងកាយ មិនអាចឲ្យអ្នកក្លាយជាអ្នកមានបានឡើយ ហើយវាថែមទាំងបំផ្លាញសុខភាពរបស់អ្នកជារៀងរាល់ថ្ងៃថែមទៀតផង។ បន្ថែមពីនេះ ទោះបីជាអ្នករកលុយបានច្រើនប៉ុនណាក៏ដោយ ប្រសិនបើអ្នកមិនចេះគ្រប់គ្រងនិងប្រើប្រាស់ឲ្យបានត្រឹមត្រូវទេនោះ អ្នកពិបាកនឹងរំដោះខ្លួនចេញពីទាសករនៃលុយណាស់។

សរុបមកវិញ មិនថាបុគ្គលិក ឬម្ចាស់អាជីវកម្មនោះទេ បើចង់សល់ទ្រព្យ មិនជាប់បំណុល ចូលចៀសវាងកំហុសឆ្លង ពុំមានផែនការហិរញ្ញវត្ថុ ចាយតាមចំណង់ ប្រើប្រាស់សេវាបង់រំលស់លើសមត្ថភាពខ្លួន និងធ្វើការដើម្បីតែលុយ។ លុយរកបានពីកម្លាំងញើសឈាមមានតម្លៃណាស់ រីឯពេលវេលាបង់លើការងារពីមួយថ្ងៃទៅមួយកាន់តែមិនអាចកាត់ថ្លៃបាន ចូរប្រើប្រាស់វាប្រកបដោយភាពឆ្លាតវៃនិងប្រសិទ្ធភាពខ្ពស់បំផុត៕

អត្ថបទដោយ៖ កាន់ ដារ៉ា (ស្មេរពនេចរ) សៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម    https://t.me/BusinessCambodiaBook