ជាការពិតណាស់ ការធ្វើជាបុគ្គលិកគេ មិនមែនមានន័យថា យើងត្រូវក្រ ឬមិនអាចមានបាននោះទេ។ អ្វីដែលខុសគ្នារវាងបុគ្គលិកដែលធ្វើការមួយជីវិតនៅតែលំបាក និងបុគ្គលិកដែលលូតលាស់ក្លាយជាអ្នកមាន ឬជាម្ចាស់អាជីវកម្មនៅថ្ងៃមុខ គឺ ផ្នត់គំនិតនេះឯង។

ប្រសិនបើអ្នក ប្រកាន់ខ្ជាប់នូវផ្នត់គំនិតរកលុយកំពូលទាំង ៣ ខាងក្រោមនេះ ជីវិត និងហិរញ្ញវត្ថុរបស់អ្នក នឹងផ្លាស់ប្តូរទៅរកភាពប្រពៃយ៉ាងពិតប្រាកដ៖

១. ផ្នត់គំនិត «ម្ចាស់អាជីវកម្ម»

បុគ្គលិកភាគច្រើនធ្វើការក្នុងផ្នត់គំនិត «ធ្វើការដូរយកប្រាក់ខែ» (ធ្វើការ ៨ ម៉ោង ចាំតែផុតម៉ោងទៅផ្ទះ និងចាំតែថ្ងៃបើកប្រាក់ខែ)។ ប៉ុន្តែបុគ្គលិកដែលមានផ្នត់គំនិតកំពូល គេគិតថា «ក្រុមហ៊ុន គឺជាកន្លែងដែលគេមកធ្វើការរៀនសូត្រ និងសាកល្បងសមត្ថភាពដោយមិនបាច់ចេញដើមទុនផ្ទាល់ខ្លួន»។

-របៀបប្រតិបត្តិ៖ ធ្វើការងារឲ្យលើសពីតម្លៃប្រាក់ខែដែលទទួលបាន។ គិត និងដោះស្រាយបញ្ហាដូចជាម្ចាស់ក្រុមហ៊ុន (តើធ្វើដូចម្តេចដើម្បីកាត់បន្ថយចំណាយ? តើធ្វើដូចម្តេចដើម្បីបង្កើនចំណូលក្រុមហ៊ុន?)។ នៅពេលអ្នកធ្វើឲ្យក្រុមហ៊ុនចំណេញច្រើន ឬលូតលាស់ អ្នកមិនត្រឹមតែមានឱកាសឡើងតំណែង និងដំឡើងប្រាក់ខែលឿនប៉ុណ្ណោះទេ ប៉ុន្តែអ្នកកំពុង កសាងជំនាញធ្វើអាជីវកម្មពិតប្រាកដ សម្រាប់ខ្លួនឯងនៅថ្ងៃមុខទៀតផង។

២. ផ្នត់គំនិត «បង្កើតប្រភពចំណូលច្រើនច្រក»

បុគ្គលិកទូទៅ ពឹងផ្អែកលើប្រាក់ខែតែមួយច្រក ដែលជាហានិភ័យធំបំផុតក្នុងជីវិត។ ផ្នត់គំនិតកំពូលទី២ គឺ «ប្រាក់ខែជាដើមទុន មិនមែនជាគោលដៅចុងក្រោយឡើយ»។

-របៀបប្រតិបត្តិ៖ ប្រើប្រាស់ប្រាក់ខែដែលទទួលបានដើម្បី បង្វែរទៅជាទ្រព្យសកម្ម ដូចជា ការសន្សំយកទៅវិនិយោគលើភាគហ៊ុន អចលនទ្រព្យ ឬការបង្កើតអាជីវកម្មបន្ទាប់បន្សំ។ ប្រើប្រាស់ពេលវេលានៅពេលយប់ ឬចុងសប្តាហ៍ដើម្បីបង្កើតចំណូលទី២ និងទី៣ ដូចជា ការទទួលការងារ Freelance ការលក់អនឡាញ ការបង្កើត Content ឬការបង្រៀន។ នៅពេលចំណូលពីច្រកផ្សេង ឬការវិនិយោគស្មើ ឬលើសប្រាក់ខែ នោះអ្នកនឹងមាន «សេរីភាពហិរញ្ញវត្ថុ»។

៣. ផ្នត់គំនិត «វិនិយោគលើខ្លួនឯងជាប្រចាំ»

ទ្រព្យសកម្មដែលបង្កើតផលតបស្នងខ្ពស់បំផុត និងគ្មាននរណាអាចលួចបាន គឺ «ចំណេះដឹង និងជំនាញរបស់អ្នក»។ បុគ្គលិកជោគជ័យមិនដែលបញ្ឈប់ការរៀនសូត្រ បន្ទាប់ពីចាកចេញពីសាលានោះទេ។

-របៀបប្រតិបត្តិ៖ ចែកប្រាក់ខែយ៉ាងតិច ៥% ទៅ ១០% រៀងរាល់ខែ សម្រាប់ទិញសៀវភៅល្អៗ អាន និងចុះឈ្មោះរៀនវគ្គខ្លីៗ ឬចូលរួមសិក្ខាសាលាដើម្បីអភិវឌ្ឍសមត្ថភាព។ ផ្តោតលើការរៀន «ជំនាញដែលមានតម្លៃទីផ្សារខ្ពស់» ដូចជា ជំនាញលក់ ការផ្សព្វផ្សាយ ការគ្រប់គ្រងហិរញ្ញវត្ថុ ភាសាបរទេស ឬបច្ចេកវិទ្យាឌីជីថលជាដើម។

សរុបជារួមមក កាលណាជំនាញរបស់អ្នកកាន់តែច្បាស់លាស់ និងមានតម្លៃ នោះទីផ្សារនឹងបង់ថ្លៃជាលុយមកវិញ ឲ្យអ្នកកាន់តែខ្ពស់ជានិច្ច។ ដូច្នេះ ទោះបីពេលនេះ ឋានៈរបស់អ្នកនៅត្រឹមជាបុគ្គលិកធម្មតា ប៉ុន្តែថ្ងៃក្រោយអ្នកអាចមានជីវិតល្អ  ឋានៈ ឬតំណែង ក៏អាចធំជាងនេះ ព្រោះការតស៊ូនឹងមិនក្បត់អ្នកឡើយ៕