រាជធានីភ្នំពេញ ថ្ងៃទី២៧ ខែសីហា ឆ្នាំ២០២៦៖ ធនាគារ វីង (ខេមបូឌា) ម.ក បានសម្រេចផ្តល់អាហារូបករណ៍ពេញលេញដែលសរុបជាទឹកប្រាក់ចំនួន ៦០០លានរៀល  ដល់សិស្សានុសិស្សមានទេពកោសល្យចំនួន ១៨រូប មកពីសហគមន៍ខ្វះខាត ដើម្បីឱ្យពួកគេមានលទ្ធភាពបន្តការសិក្សានៅវិទ្យាល័យ ជា ចាន់តូ។

តាមរយៈអនុស្សរណៈនៃការយោគយល់គ្នារយៈពេល ៣ឆ្នាំ ធនាគារ វីង នឹងរ៉ាប់រងទាំងស្រុងលើថ្លៃសិក្សា ការស្នាក់នៅ អាហារូបត្ថម្ភ និងការចំណាយលើការសិក្សាផ្សេងៗទៀត គិតចាប់ពីឆ្នាំសិក្សា ២០២៦-២០២៧ រហូតដល់ឆ្នាំ ២០២៨-២០២៩។ ការឧបត្ថម្ភនេះ នឹងជួយឱ្យសិស្សានុសិស្សអាចផ្តោតលើការសិក្សាបានពេញលេញ ដោយមិនព្រួយបារម្ភការចំណាយលើការសិក្សា និងជីវភាពរស់នៅប្រចាំថ្ងៃឡើយ។

បណ្ឌិត ឌីមីត្រូ ខូលេកកូ អគ្គនាយកធនាគារ វីង បានលើកឡើងថា៖ “យុវជនដែលមានទេពកោសល្យ គឺមាននៅគ្រប់ទិសទីទូទាំងប្រទេសកម្ពុជា ប៉ុន្តែមិនមែនយុវជនគ្រប់រូបសុទ្ធតែមានឱកាសដូចគ្នាក្នុងការបញ្ចេញសមត្ថភាពនោះឡើយ។ អាហារូបករណ៍នេះ នឹងផ្តល់ការគាំទ្រដែលចាំបាច់ ដើម្បីជួយឱ្យយុវជនទាំង ១៨រូប អាចបញ្ចប់ថ្នាក់វិទ្យាល័យ និងរៀបចំខ្លួនបានយ៉ាងល្អសម្រាប់អនាគត។ ស្របពេលដែលធនាគារ វីង បន្តលើកកម្ពស់សេវាហិរញ្ញវត្ថុឌីជីថល និងចំណេះដឹងហិរញ្ញវត្ថុ យើងក៏ចង់ចូលរួមជួយឱ្យយុវជនកម្ពុជា អាចអភិវឌ្ឍចំណេះដឹង និងជំនាញ ដើម្បីទទួលបានអត្ថប្រយោជន៍ពេញលេញពីសេដ្ឋកិច្ចកម្ពុជា ដែលកំពុងមានការវិវឌ្ឍយ៉ាងឆាប់រហ័សផងដែរ។”

វិទ្យាល័យ ជា ចាន់តូ មានទីតាំងស្ថិតនៅក្នុងខេត្តកំពង់ធំ ហើយត្រូវបានបង្កើតឡើងជាការគោរពដឹងគុណដល់ ឯកឧត្តម ជា ចាន់តូ អតីតអគ្គទេសាភិបាល ធនាគារជាតិនៃកម្ពុជា ព្រមទាំងដើម្បីចងចាំនូវការលះបង់ពេញមួយជីវិតរបស់ឯកឧត្តម ចំពោះវិស័យអប់រំ សេវាសាធារណៈ និងការអភិវឌ្ឍនៅក្នុងសហគមន៍។

គ្រឹះស្ថានសិក្សា​មួយនេះបានបន្តនូវមរតករបស់ឯកឧត្តម តាមរយៈការបណ្តុះបណ្តាលយុវជន ដើម្បីឱ្យពួកគេមានសមត្ថភាពចូលរួមកសាងអនាគតរបស់កម្ពុជា ដែលនេះគឺជាបេសកកម្មមួយដែលធនាគារ វីង ពិតជាមានមោទនភាពបំផុតក្នុងការចូលរួមគាំទ្រ។  វិទ្យាល័យ ជា ចាន់តូ ផ្តល់ការអប់រំកម្រិតមធ្យមសិក្សាទុតិយភូមិថ្នាក់ទី ១០ ដល់ទី ១២ ដល់សិស្សានុសិស្សមកពីគ្រួសារ និងសហគមន៍ដែលមានជីវភាពខ្វះខាត​ ដោយផ្តោតសំខាន់លើមុខវិជ្ជា វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ឬហៅកាត់ថា STEM ភាសាអង់គ្លេស ភាពជាអ្នកដឹកនាំ និងជំនាញជីវិតចាំបាច់សម្រាប់អនាគត។

កញ្ញា តាន់ សម្ផស្ស អ្នកគ្រប់គ្រងគម្រោងនៃ វិទ្យាល័យ ជា ចាន់តូ បានចែករំលែកចំណាប់អារម្មណ៍ចំពោះភាពជាដៃគូដ៏មានអត្ថន័យនេះ។ កញ្ញា បានលើកឡើងថា៖ “យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះធនាគារ វីង ដែលបានជួយជ្រោមជ្រែងដល់សិស្សានុសិស្សមានសមត្ថភាពដែលស័ក្តិសមទទួលបានឱកាសបន្តការសិក្សា និងសម្រេចក្តីស្រមៃរបស់ពួកគេ។ តាមរយៈភាពជាដៃគូនេះ យើងកំពុងរួមគ្នាធ្វើឱ្យការអប់រំកាន់តែមានបរិយាបន្ន និងបើកឱកាសឱ្យសិស្សម្នាក់ៗអាចអភិវឌ្ឍសក្តានុពលរបស់ខ្លួនបានពេញលេញ។”

លើសពីការផ្តល់អាហារូបករណ៍ ធនាគារ វីង ក៏នឹងពិនិត្យមើលឱកាសក្នុងការរៀបចំកម្មវិធីផ្តល់នូវចំណេះដឹងហិរញ្ញវត្ថុ ការតម្រង់ទិសសម្រាប់អាជីពការងារ ការចែករំលែកចំណេះដឹង និងជំនាញពីអ្នកមានបទពិសោធ សិក្ខាសាលាអភិវឌ្ឍភាពជាអ្នកដឹកនាំ សកម្មភាពស្ម័គ្រចិត្តសម្រាប់សហគមន៍ និងការចុះទស្សនកិច្ចកន្លែងធ្វើការផ្ទាល់សម្រាប់សិស្សានុសិស្សផងដែរ។

ភាពជាដៃគូនេះ គឺជាការពង្រីកបន្ថែមលើសកម្មភាពការងាររបស់ធនាគារ វីង ដែលកន្លងមកបានសហការជាមួយសាលារៀនជិត ២០ គ្រឹះស្ថានសិក្សនៅទូទាំងប្រទេស ព្រមទាំងការគាំទ្រដល់កម្មវិធីសិក្សា STEM សម្រាប់សិស្សនារីវ័យក្មេងនៅសាលា Tomorrow Academy របស់អង្គការមូលនិធិកុមារកម្ពុជា (CCF) ព្រមទាំងបានសហការយ៉ាងជិតស្និទ្ធជាមួយក្រសួងអប់រំ យុវជន និងកីឡា ដែលផ្តោតលើការពង្រឹងសក្តានុពលយុវជន។  

ការឧបត្ថម្ភគាំទ្រកម្មវិធីអាហារូបករណ៍នេះ ក៏បានបង្ហាញពីការប្តេជ្ញាចិត្តយ៉ាងមុតមាំរបស់ធនាគារ វីង ក្នុងការក្លាយជាធនាគារដៃគូដ៏ល្អបំផុតសម្រាប់យុវជនកម្ពុជាជំនាន់ថ្មី​ និងក្លាយជាធនាគារដែលពួកគេជ្រើសរើសប្រើប្រាស់ក្នុងជីវិតប្រចាំថ្ងៃ។ ទិសដៅនេះត្រូវបានបង្ហាញតាមរយៈគំនិតច្នៃប្រឌិត និងការផ្តល់ជូននូវបទពិសោធល្អៗជាច្រើន។ ក្នុងនោះមានដូចជាវត្តមាន ជីប ជីប ដែលជាមិត្តប្រឹក្សាធនាគារ និងជាដៃគូឌីជីថលសម្រាប់យុវជនសម័យថ្មី ដែលនិយមប្រើប្រាស់ទូរសព្ទ និងបច្ចេកវិទ្យា ព្រមភាពជាដៃគូជាមួយរោងភាពយន្ត Legend Cinema និងការគាំទ្រការប្រកួត E-sports ធំៗតាមរយៈ WingFlex។ តាមរយៈគំនិតផ្តួចផ្តើមទាំងនេះ ធនាគារ វីង បន្តបង្កើតផលិតផល និងបទពិសោធថ្មីៗ ស្របតាមរបៀបរស់នៅ ការប្រាស្រ័យទាក់ទង និងការចំណាយពេលវេលារបស់យុវជនកម្ពុជាសព្វថ្ងៃ។ ស្វែងយល់បន្ថែមអំពីធនាគារ វីង តាមរយៈគេហទំព័រ៖ wingbank.com.kh។

អំពីធនាគារ វីង

ធនាគារ វីង (ខេមបូឌា) ម.ក គឺជាធនាគារពាណិជ្ជធំជាងគេទី៣ នៅកម្ពុជា និងជាធនាគារពាណិជ្ជតែមួយគត់ដែលគ្រប់គ្រងដោយជនជាតិខ្មែរ ១០០% ដោយបម្រើអតិថិជនទូទាំងប្រទេសតាមរយៈបណ្តាញនៃសាខា ភ្នាក់ងារ និងថ្នាលឌីជីថល។ លើសពីសេវាកម្មធនាគារ ធនាគារ វីង តែងតែចូលរួមគាំទ្រយ៉ាងសកម្មដល់ការអភិវឌ្ឍសង្គម និងសេដ្ឋកិច្ចកម្ពុជា រួមទាំងការបើកប្រាក់ឧបត្ថម្ភគាំពារសង្គមតាមប្រព័ន្ធឌីជីថលដល់គ្រួសារក្រីក្រទូទាំងប្រទេស និងការប្តេជ្ញាចិត្តជាបន្តបន្ទាប់ក្នុងការផ្តល់កម្ចីគាំទ្រដល់សហគ្រាសធុនតូច និងមធ្យមផងដែរ។

អំពីវិទ្យាល័យ ជា ចាន់តូ

ស្ថិតក្នុងខេត្តកំពង់ធំ វិទ្យាល័យ ជា ចាន់តូ ផ្តល់នូវកម្មវិធីសិក្សាអប់រំកម្រិតមធ្យមសិក្សាទុតិយភូមិប្រកបដោយគុណភាពខ្ពស់ សម្រាប់សិស្សថ្នាក់ទី ១០ ដល់ទី ១២។ ​វិទ្យាល័យនេះត្រូវបានបង្កើតឡើង ដើម្បីជាការគោរពដឹងគុណចំពោះ ឯកឧត្តម ជា ចាន់តូ ដែលជាលោកឪពុកជាទីគោរពស្រឡាញ់របស់ លោកជំទាវបណ្ឌិត ជា សិរី អគ្គទេសាភិបាល ធនាគារជាតិ នៃកម្ពុជា។ តាមរយៈវិទ្យាល័យនេះ លោកជំទាវបណ្ឌិត ជា សិរី បានបន្តមរតកនៃការលះបង់មួយជីវិតនៃលោកឪពុករបស់លោកជំទាវ ចំពោះវិស័យអប់រំ សេវាសាធារណៈ និងការអភិវឌ្ឍនៅក្នុងសហគមន៍។ វិទ្យាល័យនេះបង្កើតឱកាសសម្រាប់សិស្សានុសិស្សដែលមានសមត្ថភាព តែខ្វះខាតលទ្ធភាព ដោយធ្វើការជ្រើសរើសពួកគេផ្អែកលើសមិទ្ធផលសិក្សា ភាពខ្វះខាតផ្នែកហិរញ្ញវត្ថុ សក្តានុពលភាពជាអ្នកដឹកនាំ អត្តចរិត និងការប្តេជ្ញាចិត្តផ្ទាល់ខ្លួន។ កម្មវិធីសិក្សារបស់សាលាផ្តោតសំខាន់លើមុខវិជ្ជា STEM ភាសាអង់គ្លេស ភាពជាអ្នកដឹកនាំ និងជំនាញជាក់ស្តែងផ្សេងៗ ដែលសិស្សានុសិស្សត្រូវការ ដើម្បីទទួលបានភាពជោគជ័យក្នុងការសិក្សានៅឧត្តមសិក្សា និងឈានទៅរកភាពជោគជ័យនៅថ្ងៃអនាគត។