ប្រធានាធិបតីអាមេរិក ដូណាល់ ត្រាំ បានបង្ហាញឆន្ទៈរបស់ខ្លួនយ៉ាងមុតមាំ លើការចង់គ្រប់គ្រង ហ្គ្រីនឡែន (Greenland) ជាកោះដ៏ធំល្វឹងល្វើយ ដែលស្ថិតនៅចន្លោះមហាសមុទ្រអាកទិក និងមហាសមុទ្រអាត្លង់ទិកខាងជើង។ ខាងក្រោមគឺជាមូលហេតុធំៗ ៣ ដែលធ្វើឲ្យលោក ត្រាំ ចង់យកកោះនេះខ្លាំងបំផុត យោងតាម CNBC៖

១/. ក្តោបក្តាប់រ៉ែកម្រ និងធនធានធម្មជាតិដ៏មហាសាល៖ កោះ Greenland សម្បូរទៅដោយរ៉ែយុទ្ធសាស្ត្រដូចជា លីចូម នីកែល និងរ៉ែកម្រ ដែលចាំបាច់បំផុតសម្រាប់ផលិតបន្ទះឈីប អាវុធទំនើប និងអាគុយរថយន្តអគ្គិសនី។ ការគ្រប់គ្រងធនធានទាំងនេះ នឹងជួយឱ្យអាមេរិកកាត់បន្ថយការពឹងផ្អែកលើការនាំចូលពីរដ្ឋបាលទីក្រុងប៉េកាំង ដែលជាគូប្រជែងសេដ្ឋកិច្ចលេខមួយ។

២/. គ្រប់គ្រងផ្លូវដឹកជញ្ជូន៖ ការត្រៀមលក្ខណៈសម្រាប់ផ្លូវនាវាចរណ៍ថ្មីនៅតំបន់អាកទិក។ នៅពេលទឹកកករលាយ ផ្លូវទឹកថ្មីនេះនឹងក្លាយជាច្រករបៀងពាណិជ្ជកម្មដ៏ខ្លីបំផុតតភ្ជាប់ពីអាស៊ីទៅអឺរ៉ុប។ ប្រសិនបើអាមេរិកមានអធិបតេយ្យភាពលើកោះ Greenland ពួកគេនឹងមានអំណាចពេញលេញក្នុងការត្រួតពិនិត្យ និងទាញយកប្រយោជន៍សេដ្ឋកិច្ចពីការដឹកជញ្ជូនទំនិញតាមសមុទ្រក្នុងតំបន់ប៉ូលខាងជើងនេះ។

៣/. ភូមិសាស្ត្រនយោបាយ៖ ក្រៅពីសេដ្ឋកិច្ច វាក៏ជាការទប់ស្កាត់ឥទ្ធិពលរបស់រុស្ស៊ី និងចិន ដែលកំពុងពង្រីកវត្តមានយោធា និងវិនិយោគហេដ្ឋារចនាសម្ព័ន្ធយ៉ាងខ្លាំងក្លានៅតំបន់អាកទិក។ ការដណ្តើមកោះនេះ នឹងអនុញ្ញាតឱ្យអាមេរិកពង្រីកមូលដ្ឋានទ័ពអាកាស និងប្រព័ន្ធការពារមីស៊ីលកាន់តែជិតទៅនឹងគូសត្រូវ ដើម្បីធានាបាននូវឧត្តមភាពយោធានៅក្នុងតំបន់ប៉ូល ដែលកំពុងឡើងកម្ដៅខាងភូមិសាស្ត្រនយោបាយ។

យ៉ាងណាមិញ កាលពីថ្ងៃទី ០៧ ខែ មករា ឆ្នាំ ២០២៦ សេតវិមានបានបញ្ជាក់ថា លោក ត្រាំ កំពុងពិភាក្សាយ៉ាងសកម្មលើផែនការទិញយកកោះ Greenland ហើយថែមទាំងបានលើកឡើងថា «ជម្រើសគ្រប់យ៉ាងគឺនៅលើតុ» (រួមទាំងវិធានការការទូត និងសេដ្ឋកិច្ច) ទោះបីជាដាណឺម៉ាក និងរដ្ឋាភិបាល Greenland បន្តបដិសេធយ៉ាងដាច់អហង្ការក៏ដោយ៕