ដើម្បីចូលរួមលើកកម្ពស់គុណភាពវិស័យសុខាភិបាល និងការព្យាបាលឲ្យកាន់តែទំនើប លោកស្រីឧកញ៉ា ប៉ា វង្សទិត្យា បានសម្រេចបោះទុនវិនិយោគសាងសង់មន្ទីរពេទ្យអន្ដរជាតិ វីអ ចតុមុខ ដែលមានទីតាំងស្ថិតនៅលើដីឡូតិ៍លេខ៨២០ មហាវិថីសម្តេច ហ៊ុន សែន (ផ្លូវ៦០ម៉ែត្រ) សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
តាមការបញ្ជាក់ពីលោកស្រីឧកញ៉ា មន្ទីរពេទ្យអន្ដរជាតិ វីអ ចតុមុខ ត្រូវបានសាងសង់លើផ្ទៃដីទំហំ ៣០,៣៦០ ម៉ែត្រការ៉េ និងមានផ្ទៃសំណង់សរុបជាង ១៦០,០០០ ម៉ែត្រការ៉េ និងត្រូវបានចែកចេញជា ២ ដំណាក់កាល៖
ដំណាក់កាលទី១៖ មានអគារមន្ទីរពេទ្យនៅផ្នែកខាងមុខកម្ពស់ ៧ ជាន់ និងភ្ជាប់ដោយអគារបន្ទប់មានកម្ពស់ ១៨ ជាន់ ដែលមានក្រឡាផ្ទៃសរុប ៨៣,៧៧៦ ម៉ែត្រការ៉េ។
ដំណាក់កាលទី២៖ មានអគារផ្នែកខាងក្រោយ ជាអគារស្នាក់នៅបម្រើដល់អ្នកជំងឺ មានកម្ពស់ ២៣ ជាន់ ដែលមានផ្ទៃក្រឡា ៥១,៩២៨ ម៉ែត្រការ៉េ។ ជាមួយនឹងអគារចំណតរថយន្តកំពស់ ៧ ជាន់ មានផ្ទៃក្រឡា ៣៤,០០០ ម៉ែត្រការ៉េ ដែលអាចចតរថយន្តបានប្រមាណជាង ១,០០០ គ្រឿង។
លោកស្រីឧកញ៉ាក៏បានបញ្ជាក់បន្ថែមថា មន្ទីរពេទ្យអន្ដរជាតិ វីអ ចតុមុខ នឹងមានផ្តល់សេវាកម្មពហុឯកទេស រួមមាន៖
*១៖ ឯកទេសសង្គ្រោះបន្ទាន់
*២៖ ឯកទេសត្រួតពិនិត្យសុខភាពទូទៅ
*៣៖ ឯកទេសព្យាបាលជំងឺមហារីកដោយបាញ់កាំរស្មី និងចាក់គីមី
*៤៖ ឯកទេសរូបភាពវេជ្ជសាស្ត្រ បំពាក់ដោយម៉ាស៊ីន CT'Scan, MRI, Fluroscopy, X-Ray ជាដើម
*៥៖ ឯកទេសវេជ្ជសាស្ត្រជំនាញដូចជា៖ ឯកទេសសម្ភព និងរោគស្រ្តី ឯកទេសបង្កកំណើត ឯកទេសពិនិត្យ និងព្យាបាលជំងឺកុមារ ឯកទេសជំងឺក្រពះពោះវៀន ឯកទេសជំងឺក្រលៀន និងតម្រងនោម ឯកទេសជំងឺទឹកនោមផ្អែម ឯកទេសឆ្អឹង ឯកទេសជំងឺបេះដូង ឯកទេសជំងឺប្រព័ន្ធប្រសាទ ឯកទេសជំងឺភ្នែក ឯកទេសជំងឺត្រចៀក ច្រមុះ និងបំពង់ក ឯកទេសពិនិត្យ និងព្យាបាលជំងឺមាត់ធ្មេញ ឯកទេសជំងឺចិត្តសាស្ត្រ ឯកទេសព្យាបាលដោយចលនា ឯកទេសជំងឺសើស្បែក និងកែសម្ផស្ស
*៦៖ ឯកទេសជំងឺវះកាត់គ្រប់ប្រភេទ។ ក្នុងនោះផងដែរ មានផ្នែក CCU, ICU, ICCU និង NICU ព្រមទាំងមាន បន្ទប់សម្រាកព្យាបាលអ្នកជំងឺចំនួន ២២១ គ្រែ។
ជាមួយគ្នានេះ ក៏មានសេវាកម្មទូទៅបន្ថែមទៀតដូចជា៖ ផ្នែកលាងឈាម មន្ទីរពិសោធន៍ដ៏ទំនើប ឱសថស្ថាន ហាងលក់សម្ភារៈចាំបាច់បម្រើសេវាដល់អ្នកជំងឺ ភោជនីយដ្ឋាន សាលប្រជុំ និងហាងដទៃផ្សេងៗទៀត ព្រមទាំងមានសួនលំហែ សម្រាប់ផ្ដល់នូវផាសុកភាពដល់អ្នកជំងឺផងដែរ។
សូមជម្រាបថា មន្ទីរពេទ្យអន្ដរជាតិ វីរ ចតុមុខ ត្រូវបានបើកការដ្ឋានសាងសង់នៅថ្ងៃទី២៩ ខែកញ្ញា ឆ្នាំ២០២៥ ហើយបច្ចុប្បន្នបាននិងកំពុងដំណើរការសាងសង់យ៉ាងសស្រាក់សស្រាំផងដែរ។ យោងតាមការចេញផ្សាយដោយក្រុមប្រឹក្សាអភិវឌ្ឍន៍កម្ពុជា គម្រោងមន្ទីរអន្ដរជាតិថ្មីនេះ មានទុនវិនិយោគសរុប ៧៨ លានដុល្លារ៕
