កាលពីកន្លងទៅនេះ ក្រសួងការបរទេសសហរដ្ឋអាមេរិកបានប្រកាសផ្អាកការដំណើរការ “ទិដ្ឋាការអន្តោប្រវេសន៍” (Immigrant Visas - សម្រាប់អ្នកចង់ទៅរស់នៅអចិន្ត្រៃយ៍) សម្រាប់ពលរដ្ឋមកពីប្រទេសចំនួន ៧៥ការផ្អាកនេះនឹងចាប់ផ្តើមអនុវត្តពីថ្ងៃទី ២១ ខែមករា ឆ្នាំ២០២៦ តទៅ។ នេះបើយោងតាមការចុះផ្សាយដោយសារព័ត៌មានរ៉យទ័រ។

ប្រភពខាងលើបានបន្តឱ្យដឹងទៀតថា ចំពោះទិដ្ឋាការមិនមែនអន្តោប្រវេសន៍វិញ ដូចជាប្រភេទទិដ្ឋាការទេសចរណ៍ (B1/B2) និងវីស្សានិស្សិត (F1) គឺនៅតែអាចបន្តដំណើរចូលទឹកដីសហរដ្ឋអាមេរិកបានជាធម្មតា ប៉ុន្តែអាចនឹងមានការពិនិត្យហ្មត់ចត់ជាងមុនលើលក្ខខណ្ឌហិរញ្ញវត្ថុផ្ទាល់ខ្លួនផងដែរ។

ជាមួយគ្នានោះដែរ បើយោងតាមការបង្ហោះលើផេកផ្លូវការរបស់ស្ថានទូតអាមេរិកប្រចាំកម្ពុជាបានឱ្យដឹងបន្ថែមថា សម្រាប់ទិដ្ឋាការ B1/B2 មិនអនុញ្ញាតឱ្យធ្វើការឡើយ។ ការធ្វើដំណើរទៅសហរដ្ឋអាមេរិកតាមរយៈទិដ្ឋាការទេសចរណ៍ហើយធ្វើការនិងទទួលប្រាក់ គឺជាការបំពានច្បាប់អន្តោប្រវេសន៍ហើយអាចបណ្តាលឱ្យអ្នកលែងទទួលបានទិដ្ឋាការនាពេលអនាគត។

ស្ថានទូតអាមេរិកប្រចាំកម្ពុជា បានបញ្ចាក់ថាទិដ្ឋាការអាមេរិកគឺជាប្រយោជន៍ដែលទទួលបានតាមច្បាប់ មិនមែនជាសិទ្ធិទេ។ ការបំពានច្បាប់របស់ទិដ្ឋាការទេសចរណ៍ ហើយធ្វើការនៅសហរដ្ឋអាមេរិកអាចបណ្តាលឱ្យ អ្នកលែងទទួលបានទិដ្ឋាការនាពេលអនាគត។ ការពារខ្លួនអ្នក ហើយប្រើប្រាស់ទិដ្ឋាការឱ្យបានត្រឹមត្រូវតាមច្បាប់កំណត់៕