ក្នុងបទសម្ភាសន៍ផ្តាច់មុខជាមួយសារព័ត៌មាន Daily Mail កាលពីថ្ងៃអាទិត្យ ទី១ ខែមីនា ឆ្នាំ២០២៦ ប្រធានាធិបតី ដូណាល់ ត្រាំ បានព្យាករណ៍ថា ប្រតិបត្តិការយោធារបស់សហរដ្ឋអាមេរិកប្រឆាំងនឹងប្រទេសអ៊ីរ៉ង់ អាចនឹងប្រើពេលប្រហែល ៤ សប្ដាហ៍ ឬតិចជាងនេះ។

នៅក្នុងកិច្ចសន្ទនានោះ លោកប្រធានាធិបតីមិនបានលាក់លៀមអំពីភាពជូរចត់ និងផលវិបាកនៃសង្រ្គាមនោះទេ។ លោកបានទទួលស្គាល់ដោយត្រង់ថា នឹងមានការបាត់បង់ជីវិតរបស់កងទ័ពអាមេរិកមួយចំនួននៅក្នុងប្រតិបត្តិការនេះ។ ទោះជាយ៉ាងណាក៏ដោយ លោក ត្រាំ បានសង្កត់ធ្ងន់ថា នេះគឺជាកិច្ចការចាំបាច់ដែលមិនអាចជៀសបាន ដើម្បីការពារសន្តិសុខពិភពលោក។

គោលដៅចម្បងនៃប្រតិបត្តិការនេះ គឺដើម្បីបញ្ឈប់មហិច្ឆតានុយក្លេអ៊ែររបស់អ៊ីរ៉ង់ ដែលលោក ត្រាំ ចាត់ទុកថាជាការគំរាមកំហែងយ៉ាងធ្ងន់ធ្ងរដល់មនុស្សជាតិទាំងមូល។ លោកបានបញ្ជាក់ថា សហរដ្ឋអាមេរិកត្រៀមខ្លួនរួចជាស្រេចក្នុងការចំណាយទាំងថវិកា និងជីវិតមនុស្ស ដើម្បីសម្រេចគោលដៅសន្តិសុខនេះ។

យ៉ាងណាមិញ បើទោះបីជាកំពុងស្ថិតក្នុងស្ថានភាពបង្ហាញសាច់ដុំយោធាដាក់គ្នាក៏ពិតមែន ប៉ុន្តែលោក ត្រាំ ក៏បានបង្ហើបថា លោកមានឆន្ទៈក្នុងការពិភាក្សាជាមួយ ថ្នាក់ដឹកនាំថ្មីរបស់អ៊ីរ៉ង់ ប្រសិនបើពួកគេចង់ចរចាដោយស្មោះត្រង់។ លោកបានបញ្ជាក់ថា អ៊ីរ៉ង់គួរតែធ្វើការព្រមព្រៀងតាំងពីសប្ដាហ៍មុន ដើម្បីបញ្ចៀសការខូចខាតដ៏ធំធេងនេះ៕