លទ្ធផលប្រឡងបាក់ឌុប (មធ្យមសិក្សាទុតិយភូមិ) គ្រាន់តែជាជំហានមួយក្នុងចំណោមជម្រើសជាច្រើននៃដំណើរការអប់តែរំប៉ុណ្ណោះ។ ប្រសិនបើលទ្ធផលមិនបានដូចការរំពឹងទុក សូមកុំទាន់អស់សង្ឃឹម ឬបោះបង់ក្តីស្រមៃឱ្យសោះ! ប្រព័ន្ធអប់រំនៅប្រទេសកម្ពុជាបច្ចុប្បន្នបានបើកទូលាយខ្លាំងណាស់ ដោយអនុញ្ញាតឱ្យសិស្សដែលមានលិខិតបញ្ជាក់ការសិក្សាថ្នាក់ទី១២ ឬយើងអាចហៅបានថាលិខិតបញ្ជាក់
លទ្ធផលធ្លាក់បាក់ឌុប ក៏អាចចុះឈ្មោះចូលរៀន ថ្នាក់បរិញ្ញបត្ររង (Associate Degree) បានដោយស្របច្បាប់ ១០០%ដែរ។
តើថ្នាក់បរិញ្ញបត្ររងជាអ្វី?
ថ្នាក់បរិញ្ញបត្ររង គឺជាកម្មវិធីសិក្សា រយៈពេល ២ ឆ្នាំ ដែលផ្តោតសំខាន់លើការបណ្តុះបណ្តាល ជំនាញជាក់ស្តែង (Practical Skills) ដើម្បីឱ្យនិស្សិតឆាប់យល់ដឹង និងអាចចេញធ្វើការប្រកួតប្រជែងក្នុងទីផ្សារការងារបានលឿន។ ជាពិសេសបន្ទាប់ពីបញ្ចប់ថ្នាក់បរិញ្ញបត្ររងរយៈពេល ២ ឆ្នាំនេះ អ្នកអាចចេញធ្វើការរកប្រាក់ចំណូលបានភ្លាមៗ ម្យ៉ាងទៀតត្រូវសិក្សាបន្ត ២ ឆ្នាំបន្ថែមទៀត ដើម្បីទទួលបានសញ្ញាបត្រ បរិញ្ញបត្រ ឬ Bachelor's Degree។
សាកលវិទ្យាល័យ វិទ្យាស្ថាន ជំនាញ
១. ផ្នែកគណនេយ្យ ហិរញ្ញវត្ថុ និងពាណិជ្ជកម្ម
សម្រាប់ចង់សិក្សាគណនេយ្យ និងហិរញ្ញវត្ថុ ពេលដែលបញ្ចប់ទៅអ្នកអាចធ្វើជា បុគ្គលិកគណនេយ្យ, អ្នកកាន់បញ្ជីលុយកាក់, បុគ្គលិកផ្នែកពន្ធដារ ឬធ្វើការក្នុងធនាគារ និងគ្រឹះស្ថានហិរញ្ញវត្ថុ។ ហើយសម្រាប់ជំនាញគ្រប់គ្រងអាជីវកម្ម និងទីផ្សារ ពេលបញ្ចប់ទៅអ្នកអាចធ្វើជា បុគ្គលិកផ្នែកលក់ ដែលគ្រប់គ្នាតែងងហៅថាSales, អ្នកធ្វើទីផ្សារ, អ្នកគ្រប់គ្រងហាង/សាខា ឬបើកអាជីវកម្មផ្ទាល់ខ្លួន។ សម្រាប់សាលាដែលគួររៀនជំនាញនេះមានដូចជា វិទ្យាស្ថាន វ៉ាន់ដា (Vanda): ល្បីល្បាញបំផុតលើជំនាញគណនេយ្យ និងហិរញ្ញវត្ថុ។ វិទ្យាស្ថានជាតិពាណិជ្ជសាស្ត្រ (NIM): សាលារដ្ឋដែលមានប្រជាប្រិយភាពលើផ្នែកពាណិជ្ជកម្ម។ សាកលវិទ្យាល័យ អាស៊ី អឺរ៉ុប (AEU), ប៊ែលធី (BELTEI) និង បៀលប្រាយ (BBU)។
២. ផ្នែកបច្ចេកវិទ្យា និងឌីជីថល (IT & Digital Media)
ហើយជំនាញដែលកំពុងពេញនិយមនោះគឺជំនាញព័ត៌មានវិទ្យា (IT) ពេលអ្នកបញ្ចប់ទៅអាចធ្វើជា បុគ្គលិក IT Support តាមក្រុមហ៊ុន, អ្នកមើលប្រព័ន្ធ Network, ឬ អ្នកគ្រប់គ្រងកុំព្យូទ័រ និង Websiteបានផងដែរ។ មួយវិញទៀតជំនាញរចនាក្រាហ្វិក និងឌីជីថលមេឌៀក៏ល្អដែរ ពេលដែលបញ្ចប់ទៅអាចធ្វើជា Graphic Designer, Video Editor, Content Creator តាមក្រុមហ៊ុន ឬធ្វើការងារ Freelanceក៏បានដែរ។ សម្រាប់សាលាដែលគួររៀនមានដូចជា វិទ្យាស្ថាន SETEC ដែលឈានមុខគេលើផ្នែក Graphic Design និង IT។ វិទ្យាស្ថានជាតិពហុបច្ចេកទេសកម្ពុជា (NPIC) និង វិទ្យាស្ថានពហុបច្ចេកទេសព្រះកុសុមៈ (PPI)។
៣. ផ្នែកវិស្វកម្ម និងបច្ចេកទេស
ប្អុនដែលចាប់អារម្មណ៍ទៅលើអគ្គិសនី និងអេឡិចត្រូនិក សម្រាប់ជំនាញនេះពេលបញ្ចប់ទៅអាចធ្វើជា ជាងអគ្គិសនី, បុគ្គលិកថែទាំប្រព័ន្ធអគ្គិសនីតាមអគារ សណ្ឋាគារ រោងចក្រ ឬបើកហាងជួសជុលផ្ទាល់ខ្លួនក៏បានដែរ។ សម្រាប់ជំនាញជួសជុលរថយន្ត / មេកានិច / សំណង់ បញ្ចប់ទៅអាចធ្វើជា ជាងជួសជុលរថយន្តតាម Garage ឬក្រុមហ៊ុនលក់រថយន្តធំៗ, និងបុគ្គលិកការដ្ឋានសំណង់។ សម្រាប់សាលាដែលណែនាំមានដូចជា NPIC, វិទ្យាស្ថានជាតិបណ្តុះបណ្តាលបច្ចេកទេស (NTTI), វិទ្យាស្ថានបច្ចេកវិទ្យាកំពង់ស្ពឺ (KSIT)។
៤. ផ្នែកភាសាបរទេស
រីឯជំនាញភាសាអង់គ្លេស, ភាសាចិន ពេលប្អុនៗបញ្ចប់ទៅអាចធ្វើជា លេខាធិការ, បុគ្គលិកស្វាគមន៍ភ្ញៀវ ដែលហៅថា Receptionist, អ្នកបកប្រែ, បុគ្គលិកក្រុមហ៊ុនបរទេស ឬគ្រូបង្រៀន។សាលាដែលគួររៀនមាន ប៊ែលលធី (BELTEI), សាកលវិទ្យាល័យ អាស៊ី អឺរ៉ុប (AEU) និង វិទ្យាស្ថានជាតិពាណិជ្ជសាស្ត្រ (NIM)។
លទ្ធផលប្រឡងបាក់ឌុប មិនអាចកំណត់ជោគជ័យក្នុងជីវិតយើងបានទេ។ អ្វីដែលសំខាន់បំផុតគឺ សមត្ថភាព និងជំនាញពិតប្រាកដ ជាពិសេសការទំនាក់ទំនងជាមួយមនុស្សជុំវិញខ្លួន។ ចាប់ផ្តើមខិតខំប្រឹងប្រែងរៀនទាំងអស់គ្នា ដើម្បីកសាងអនាគតដ៏ភ្លឺស្វាង និងអាចជួយដល់សង្គមជាតិយើងទាំងមូលបាន!
