គម្រោងតំបន់សេដ្ឋកិច្ចថ្មីចំនួន ២ នឹងលេចរូបរាងឡើងនៅក្នុងរាជធានីភ្នំពេញក្នុងពេលឆាប់ៗខាងមុខ ខណៈគម្រោងទាំងពីរនេះត្រូវបានស្នើសុំវិនិយោគដោយក្រសួងប្រៃសណីយ៍និងទូរគមនាគមន៍ចំនួន ១ គម្រោង និងក្រុមហ៊ុន អម្រឹតា ឌីវេឡុបម៉ិន ឯ.ក ចំនួន ១ គម្រោង។

យោងតាមការចុះផ្សាយដោយគណៈកម្មាធិការវិនិយោគកម្ពុជា កាលពីថ្ងៃទី២ ខែមីនា ឆ្នាំ២០២៦ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានរៀបចំ “កិច្ចប្រជុំច្រកចេញ-ចូលតែមួយ” លើកទី២ នៅក្នុងឆ្នាំ២០២៦ ដើម្បីពិនិត្យពិភាក្សាលើគម្រោងស្នើសុំបង្កើតតំបន់សេដ្ឋកិច្ចពិសេសទាំង ២ ខាងលើ។ ដោយកិច្ចប្រជុំនេះធ្វើឡើងក្រោមអធិបតីភាព ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងមានការអញ្ជើញចូលរួមពីសំណាក់តំណាងក្រសួង-ស្ថាប័ន និងរដ្ឋបាលសាលារាជធានីភ្នំពេញ។

តាមការបញ្ជាក់ពីគណៈកម្មាធិការវិនិយោគកម្ពុជា គម្រោងវិនិយោគបង្កើតតំបន់សេដ្ឋកិច្ចពិសេសទាំងពីរនេះ នឹងក្លាយជាកម្លាំងចលករយ៉ាងសំខាន់ក្នុងការស្រូបយកគម្រោងវិនិយោគ ដោយផ្តោតសំខាន់លើបច្ចេកវិទ្យាឌីជីថល និងផ្តោតលើការប្រមូលផ្តុំការកែច្នៃកសិ-ឧស្សាហកម្ម ចំណីអាហារ ការវេចខ្ចប់ និង R&D៕