ជាដំណឹងរីករាយសម្រាប់អ្នកខេត្ដក្រចេះ និងខេត្ដតាកែវ ខណៈខេត្ដកំពុងមានសក្ដានុពលទាំង ២ នេះ ទទួលបានគម្រោងវិនិយោគថ្មីដែលមានតម្លៃសរុបជិត ៥០០ លានដុល្លារ នឹងអាចបង្កើតឱកាសការងាររាប់ពាន់កន្លែងជូនប្រជាពលរដ្ឋនៅក្នុងតំបន់ផងដែរ។ យោងតាមការចេញផ្សាយរបស់គណៈកម្មាធិការវិនិយោគកម្ពុជា​គម្រោងវិនិយោគទាំងនោះរួមមាន៖

១. ខេត្ដក្រចេះ

ក្រុមហ៊ុន ញូ ខនធីណិន (ខេមបូឌា) ថាយអឺរ ឯ.ក (New Continent (Cambodia) Tire CO., LTD.) បានបោះទុនវិនិយោគចំនួន ៤៥០ លានដុល្លារ បង្កើតរោងចក្រផលិតសំ​បកកង់រថយន្ត និងពោះវៀនកង់ មានទីតាំងស្ថិតក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល នៃខេត្ដក្រចេះ។ នៅពេលបើកដំណើរការ ក៏នឹងអាចបង្កើតឱកាសការងារបានចំនួន ៣ ០០០ កន្លែងជូនដល់ប្រជាពលរដ្ឋនៅក្នុងតំបន់ថែមទៀតផង។

សូមបញ្ជាក់ផងដែរថា គម្រោងវិនិយោគនេះគឺជាគម្រោងរោងចក្រផលិតសំបកកង់រថយន្តទី៣ហើយដែលបានមកបោះទីតាំងវិនិយោគនៅខេត្តក្រចេះ ហើយក៏ជារោងចក្រផលិតសំបកកង់រថយន្តទី៨ ដែលបានមកបោះទីតាំងវិនិយោគក្នុងព្រះរាជាណាចក្រកម្ពុជា។

២. ខេត្ដតាកែវ

សម្រាបខេត្ដតាកែវវិញថ្មីៗនេះ ក្រុមហ៊ុន អូរៀន ហុងដា អ៊ិនដាសស្ទ្រៀល (ខេមបូឌា) ឯ.ក (ORIENT HONDA INDUSTRIAL (CAMBODIA) CO.,LTD.) បានសម្រេចបោះទុនចំនួន ៤៦.៣ លានដុល្លារ បង្កើតរោចក្រជ្រលក់ពណ៌ ដែលមានទីតាំងស្ថិតនៅភូមិត្រពាំឈូក ឃុំត្រឡាច និងភូមិត្រពាំងជ្រៃ ឃុំស្មោង ស្រុកទ្រាំង ខេត្ដតាកែវ។ នៅពេលបើកដំណើរការរោងចក្រខាងលើក៏នឹងបង្កើតឱកាសការងារបានចំនួន ៣៣០ កន្លែងផងដែរ៕