ទំនាក់ទំនងពាណិជ្ជកម្មរវាងសហរដ្ឋអាមេរិក និងកាណាដា ដែលធ្លាប់ជាដៃគូសេដ្ឋកិច្ចយ៉ាងជិតស្និទ្ធបំផុតនោះ បានឈានចូលដល់ស្ថានភាពប្រឈមមុខដាក់គ្នាយ៉ាងតឹងតែង បន្ទាប់ពីការចរចាពាណិជ្ជកម្មរវាងប្រទេសទាំងពីរបានទាល់ច្រក និងបរាជ័យ។ នៅថ្ងៃចន្ទ ទី២៤ ខែសីហា ឆ្នាំ២០២៦ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានប្រកាសបង្កើនសម្ពាធសេដ្ឋកិច្ចជាថ្មី ដោយគ្រឿងបន្ថែមលើវិស័យយានយន្ត និងដែកថែបពីប្រទេសជិតខាងមួយនេះ។

ផ្អែកតាមការថ្លែងនៅលើបណ្ដាញសង្គម Truth Social និងការបញ្ជាក់ពីប្រភពព័ត៌មានផ្លូវការ លោក ដូណាល់ ត្រាំ បានប្រកាសថា សហរដ្ឋអាមេរិកនឹងដំឡើងពន្ធគយរហូតដល់ ៥០% លើមុខទំនិញរថយន្ត រថយន្តដឹកទំនិញ បំណែកបន្លាស់យានយន្ត និងដែកថែបទាំងអស់ដែលនាំចូលពីប្រទេសកាណាដា។

លោក ត្រាំ បានចោទប្រកាន់កាណាដាថា បានកេងចំណេញលើសហរដ្ឋអាមេរិកអស់ជាច្រើនឆ្នាំតាមរយៈការដាក់ពន្ធខ្ពស់លើផលិតផលកសិកម្មអាមេរិក និងបានបង្កើតឲ្យមានការខាតបង់ជញ្ជីងពាណិជ្ជកម្មរហូតដល់ ៦០ ពាន់លានដុល្លារ។ លោកបានសង្កត់ធ្ងន់ថា កាណាដានឹងមិនត្រូវបានប្រព្រឹត្តដូចជា "រដ្ឋមួយរបស់អាមេរិក" ទៀតឡើយ ហើយបានអំពាវនាវឲ្យក្រុមហ៊ុនទាំងអស់បង្វែរការផលិតមកក្នុងដែនដីអាមេរិកវិញដើម្បីជៀសវាងពន្ធនេះ។

ការប្រកាសនេះបានធ្វើឡើងបន្ទាប់ពីនាយករដ្ឋមន្ត្រីកាណាដា លោក ម៉ាក កានី (Mark Carney) បានសម្រេចផ្អាកការចរចា ដោយលើកឡើងថាសសំណើចុងក្រោយរបស់អាមេរិកគឺ "អយុត្តិធម៌ និងខុសបច្ចេកទេសសេដ្ឋកិច្ច"។

ជាការឆ្លើយតប កាណាដាបានប្រកាសរៀបចំវិធានការតបតវិញដោយដាក់ពន្ធលើទំនិញអាមេរិកក្នុងទំហំទឹកប្រាក់ "ដុល្លារស្មើដុល្លារ" (dollar-for-dollar) ដែលនឹងចាប់ផ្តើមអនុវត្តនៅដើមខែកញ្ញាខាងមុខ។ អ្នកវិភាគ និងតំណាងឧស្សាហកម្មយានយន្តបានព្រមានថា ការបង្កើតពន្ធលើបន្លាស់រថយន្តនេះ អាចនឹងរំខានដល់ខ្សែច្រវាក់ផលិតកម្មយានយន្តរបស់អាមេរិកផ្ទាល់ និងបង្កើនតម្លៃទំនិញសម្រាប់អ្នកប្រើប្រាស់នៅក្នុងប្រទេសទាំងពីរ។

សរុបមក ការទាល់ច្រកនៃការចរចា និងការដំឡើងពន្ធគយទៅវិញទៅមករវាងសហរដ្ឋអាមេរិក និងកាណាដា កំពុងជំរុញឲ្យសង្គ្រាមពាណិជ្ជកម្មនៅអាមេរិកខាងជើងកាន់តែមានភាពស្រួចស្រាវ។ វិធានការនេះមិនត្រឹមតែបង្កើតភាពរកាំរកូសដល់ទំនាក់ទំនងឆាកអន្តរជាតិរវាងប្រទេសទាំងពីរនោះទេ ប៉ុន្តែវាក៏អាចបង្កើតផលប៉ះពាល់ជាវិជ្ជមាន និងអវិជ្ជមានយ៉ាងខ្លាំងដល់ខ្សែច្រវាក់ផ្គត់ផ្គង់សេដ្ឋកិច្ច តម្លៃទំនិញ និងឧស្សាហកម្មផលិតកម្មរថយន្តនៅតំបន់ទាំងមូលផងដែរ៕