ការរក្សាម៉ូយចាស់ និងទាក់ទាញម៉ូយថ្មី គឺជាបេះដូងនៃភាពជោគជ័យសម្រាប់អាជីវកម្មគ្រប់ប្រភេទ ជាពិសេសវាពិតជាសំខាន់ខ្លាំង សម្រាប់អ្នកដែលទើបតែចាប់ផ្ដើមអាជីវកម្មលក់ដូរជាលើកដំបូង ឬក៏អ្នកដែលលក់ដូរយូរឆ្នាំហើយ។ ប្រសិនបើកង្វះអ្នកទិញ (បាត់ម៉ូយ) ដោយសារមូលហេតុណាមួយរបស់យើងផ្ទាល់ នោះការរកស៊ីច្បាស់ជាខាតបះដៃបះជើងមិនខាន។

ខាងក្រោមនេះជាយុទ្ធសាស្ត្រនិងគន្លឹះខ្លះៗ ដែលអាចមានប្រសិទ្ធភាពខ្ពស់ សម្រាប់អ្នកអាចយកទៅអនុវត្តបាន៖

១.យុទ្ធសាស្ត្ររក្សាម៉ូយចាស់

ម៉ូយចាស់ជាប្រភពចំណូលទៀងទាត់ ហើយការរក្សាម៉ូយចាស់ វាចំណាយដើមទុនតិចជាងការស្វែងរកម៉ូយថ្មី។ វាអាចទៅរួចបាន ដោយសារ៖

-ការផ្តល់សេវាកម្ម ឬផលិតផលដែលមានគុណភាព និងស្ថិរភាពនៃផលិតផលឲ្យនៅល្អដដែល កុំឲ្យម៉ូយមានអារម្មណ៍ថា ទិញដំបូងល្អ ក្រោយមកធ្លាក់ដៃ។

-បង្កើតកម្មវិធីសមាជិក ឬកាតសន្សំពិន្ទុ៖ ប្រើប្រព័ន្ធសន្សំពិន្ទុ ឬកាតសមាជិក ដើម្បីទទួលបានការបញ្ចុះតម្លៃពិសេស ឬកាដូថ្ងៃខួបកំណើត និងការថែមជូនផ្សេងៗ។

-បង្កើតភាពស្និទ្ធស្នាល៖ ត្រូវចំណាំចំណង់ចំណូលចិត្ត ឬឈ្មោះរបស់ម៉ូយចាស់ៗ។ ការសាកសួរ និងយកចិត្តទុកដាក់តូចតាច ធ្វើឲ្យពួកគេមានអារម្មណ៍ថាខ្លួនសំខាន់។

-ស្តាប់ Feedback និងដោះស្រាយបញ្ហាភ្លាមៗ៖ នៅពេលម៉ូយរអ៊ូរទាំ ឬរិះគន់ ត្រូវទទួលយកដោយស្នាមញញឹម និងប្រញាប់កែប្រែ។ អតិថិជនដែលឃើញយើងកែប្រែតាមការសំណូមពរ នឹងកាន់តែមានទំនុកចិត្តលើអាជីវកម្មយើង។

-រក្សាទំនាក់ទំនងជាប្រចាំ៖ ផ្ញើសារជូនពរក្នុងឱកាសបុណ្យទាន ឬផ្ញើព័ត៌មានអំពីផលិតផលថ្មីៗមុនគេ តែត្រូវប្រយ័ត្នកុំឲ្យក្លាយជាការរំខាន។

២.យុទ្ធសាស្ត្រទាក់ទាញម៉ូយថ្មី

ជាការពិត ម៉ូយថ្មីអាចជួយឲ្យអាជីវកម្មរីកចម្រើន និងពង្រីកទីផ្សារបានកាន់តែធំ។ ទាញប្រយោជន៍ពីការផ្សព្វផ្សាយបែបពីមាត់មួយទៅមាត់មួយ។ បង្កើតកម្មវិធីណែនាំមិត្តភក្តិដោយផ្តល់ការបញ្ចុះតម្លៃទាំងអ្នកណែនាំ (ម៉ូយចាស់) និងអ្នកមកថ្មី (ម៉ូយថ្មី)។

-ប្រើប្រាស់បណ្តាញសង្គមឲ្យមានប្រសិទ្ធភាព៖ បង្កើតមាតិកា (Content) វីដេអូខ្លីៗ ឬរូបភាពស្អាតៗដែលបង្ហាញពីអត្ថប្រយោជន៍នៃផលិតផល ឬសេវាកម្ម (នៅលើ TikTok, Facebook, Telegram, ឬ Instagram)។

-ផ្តល់ជូនការសាកប្រើដោយឥតគិតថ្លៃ ឬការបញ្ចុះតម្លៃពិសេស៖ ផ្តល់កាតភាគរយចុះថ្លៃសម្រាប់ការទិញលើកដំបូង ឬមានកញ្ចប់សម្រាប់តេស្ត ដើម្បីកាត់បន្ថយភាពច្របូកច្របល់របស់អតិថិជនថ្មីក្នុងការសម្រេចចិត្ត។

-ឆ្លើយតបរហ័ស និងមានភាពរួសរាយរាក់ទាក់៖ អ្នកទិញថ្មីៗច្រើនតែសួរច្រើនពីផលិតផលនីមួយៗ។ បើយើងឆ្លើយតបរហ័ស និងពន្យល់បានច្បាស់លាស់បានលឿន និងមានសម្ដីផ្អែមល្ហែម ភ្ញៀវច្បាស់ជាពេញចិត្ត លើកក្រោយមកទិញទៀត។ មួយវិញទៀត ត្រូវបង្កើតភាពលេចធ្លោ និងចំណុចខុសប្លែក បង្ហាញឲ្យភ្ញៀវឃើញច្បាស់ថា តើផលិតផល ឬសេវាកម្មរបស់អ្នកមានអ្វីពិសេសជាងគូប្រជែងលើទីផ្សារ?

គួរបន្ថែមផងដែរថា ទោះជាម៉ូយថ្មី ឬក៏ម៉ូយចាស់ក៏ដោយ សុទ្ធតែត្រូវការគុណភាពផលិតផលល្អ សេវាកម្មយកចិត្តទុកដាក់ ដូច្នេះក្នុងនាមជាអ្នកលក់ ត្រូវតែពិនិត្យមើលចំណុចខ្វះខាតរបស់ខ្លួន ដើម្បីរក្សាបានទំនុកចិត្ត និងការពេញចិត្តពីអតិថិជន ឲ្យនៅតែមកជួយទិញ មិនងាយបែកចិត្តទៅទិញគេផ្សេង។