ទី១-មានភាពជាខ្លួនឯង៖ ប្រកបដោយគុណតម្លៃ មិនចាំបាច់ចម្លងស្តាយ៍របស់អ្នកណា បង្ហាញទៅកាន់អ្នកទស្សនានៅអត្តចរិតពិតប្រាកដ មិនចាំបាច់រៀបឫកពារជ្រុលពេកឡលយ។ ប៉ុន្តែសូមចងចាំថា អ្វីដែលយើងបញ្ចេញទៅគួរតែជារឿងវិជ្ជមាន ព្រោះវីដេអូរបស់យើងអាចជាចំណែកនៃការបណ្ដុះផ្នត់គំនិតទៅកាន់អ្នកទស្សនា។

ទី២-មានគោលដៅច្បាស់លាស់៖ កំណត់គោលដៅច្បាស់មុននឹងចេញផលិតវីដេអូ ហើយត្រូវប្រាកដថាគោលដៅនោះរឹងមាំ ដូចជាការ ចង់កសាង Personal Branding , ជួយបង្កើនការលក់ក្នុងអាជីវកម្ម ឬដើម្បីរកទីផ្សារទុកជាមុនសម្រាប់អាជីវកម្មដែលអ្នកមានបំណងចង់បង្កើតជាដើម។ ត្បិតថាបណ្ដាញសង្គមពិតជាមានឥទ្ធិពលខ្លាំងសម្រាប់ការរកស៊ី ជាពិសេសវាអាចជួយសម្រួលទៅលើការចំណាយក្នុងការធ្វើទីផ្សារបានច្រើនពេលចាប់ផ្ដើមចេញរកស៊ីដំបូង។ ការកំណត់គោលដៅច្បាស់ ជួយឱ្យយើងអាចជំនះឧបសគ្គអំឡុងពេលផលិតវីដេអូ ព្រោះថាគ្មានផ្លូវណាដែលរលូនរហូតឡើយ។

ទី៣-មានគ្រឹះត្រឹមត្រូវ៖ មិនថាអ្នកចែករំលែកអំពីប្រធានបទអ្វីឡើយ គួរណាតែមានចំណេះដឹងមូលដ្ឋានគ្រឹះ បទពិសោធន៍ ឬប្រភពច្បាស់លាស់ នោះវីដេអូដែលអ្នកផ្សព្វផ្សាយចេញទៅនឹងកាន់តែមានគុណតម្លៃ។ ជាក់ស្ដែងកញ្ញា Lengឡេង ផ្ទាល់ គាត់បានទៅរៀនទាក់ទងនឹងការថតរូបរហូតដល់ប្រទេសចិន និងបានបញ្ចប់ការសិក្សាផ្នែកច្នៃម៉ូដ ដែលជាគ្រឹះនៅពីក្រោយការផលិតវីដេអូផ្ដោតសំខាន់លើការរៀបចំខ្លួន និងការថតរូប ដូចដែលលោកអ្នកបានឃើញកន្លងមក។

កញ្ញា Lengឡេង ក៏បានគូសបញ្ជាក់ផងដែរថា «មិនមានវិថីណារលូនរហូតឡើយ អ្នកផលិតវីដេអូមុខជាអាចប្រឈមនឹងបញ្ហាធ្វើមិនឡើង នាំឱ្យបាក់ទឹកចិត្ត ប៉ុន្តែបើសិនជាយើងមានគោលដៅច្បាស់លាស់ យើងប្រាកដជាអាចបង្កើតផ្លូវថ្មី (អាចជាការប្ដូរស្ដាយ៍ថត ឬកែតម្រូវប្រធានបទ) ដើម្បីបន្តដំណើរឆ្ពោះទៅកាន់គោលដៅតែមួយដែលយើងបានកំណត់ទុកជាមិនខាន»៕