២/. ថយចុះផលិតភាពនៅកន្លែងធ្វើការ៖ ប្រសិនបើសង្កេតឃើញថា ដំណើរការការងារធ្លាក់ចុះខ្លាំង ទោះបីអ្នកបានខិតខំប្រឹងប្រែងអស់ពីសមត្ថភាពក្តី វាអាចជាសញ្ញា អ្នកត្រូវការថ្ងៃឈប់សម្រាកហើយ។ នៅពេលធ្វើការហួសកម្លាំង និងស្ត្រេស មុខងារនៃការយល់ដឹងរបស់ខួរក្បាលអាចប៉ះពាល់ ដែលនាំឲ្យថយចុះប្រសិទ្ធភាព។ ដូច្នេះអ្នកត្រូវការដកឃ្លាពីការងារមួយរយៈដើម្បីស្ថារសមត្ថភាពខួរក្បាល និងស្ថានភាពផ្លូវចិត្តឡើងវិញ។

៣/. ឆាប់ខឹង៖ មួលម៉ៅច្រើន ឆាប់ខឹងឆេវឆាវ អារម្មណ៍មិននឹងនរឡើងចុះលឿន ដល់ពេលអ្នកត្រូវឈប់សម្រាកហើយ។ ការផ្លាស់ប្តូរអារម្មណ៍ទាំងនេះ ច្រើនតែជាលទ្ធផលនៃភាពតានតឹងរ៉ាំរ៉ៃ ឬភាពគ្មានកម្លាំងកំហែង។ ការឆាប់ខឹងនេះ អាចធ្វើឲ្យទំនាក់ទំនងរបស់អ្នកកាន់តែតានតឹង និងប៉ះពាល់ដល់គុណភាពជីវិតទាំងមូល។

៤/. ពិបាកគេង៖ ការគេងមិនលក់ ឬគេងមិនស្ងប់ ជាសញ្ញាបង្ហាញថា អ្នកត្រូវការថ្ងៃឈប់សម្រាករយៈពេលយូរ។ ភាពតានតឹង និងការងារច្រើនហួសប្រមាណ អាចនាំឲ្យពិបាកគេង និងធ្វើឲ្យអ្នកមានអារម្មណ៍អស់កម្លាំងជាប្រចាំ សូម្បីតែបន្ទាប់ពីសម្រាកពេញមួយយប់ក៏ដោយ។ អ្នកត្រូវដឹងថា ការគេងប្រកបដោយគុណភាព គឺជាកត្តាសំខាន់សម្រាប់សុខភាពផ្លូវកាយ និងសុខុមាលភាពផ្លូវចិត្ត។

៥/. កាន់តែដុនដាប៖ ប្រសិនបើអ្នកឧស្សាហ៍ធ្លាក់ខ្លួនឈឺ ឈឺក្បាល ឬមានបញ្ហារំលាយអាហារ វាជាសញ្ញានៃសុខភាពរាងកាយប្រាប់អ្នកថា អ្នកគួរបន្ថយល្បឿន ឬឈប់សម្រាកសិន។ រាងកាយរបស់អ្នកគឺជាប្រព័ន្ធដ៏ឆ្លាតវៃ ហើយរោគសញ្ញាទាំងនេះកំពុងទាមទារឲ្យអ្នកសម្រាក បើមិនដូច្នោះអ្នកនឹងធ្លាក់ខ្លួនឈឺធ្ងន់ធ្ងរមិនខាន។ វាចាំបាច់ណាស់ក្នុងការកំណត់អាទិភាពលើសុខភាព និងសុខុមាលភាពរបស់អ្នក លើសពីអ្វីទាំងអស់។

យ៉ាងណាមិញ បើអ្នកកំពុងស្ថិតនៅក្នុងចំណុចទាំង៥ខាងលើនេះ បើអាចចូរដកឃ្លាពីការងារមួយរយៈសិន មកមើលថែខ្លួនឯងឡើងវិញ កុំបណ្តោយរហូតដល់ហួសពេលឲ្យសោះ ដូចព្រះពុទ្ធ ទ្រង់ត្រាស់សម្តែងថា “សុខភាព គឺជាលេខ១ អ្វីៗផ្សេងទៀតគឺជាលេខសូន្យ” បើបាត់បង់សុខភាពហើយ គ្រប់យ៉ាងគឺទទេស្អាត រលាយដូចអំបិលត្រូវទឹក ក្រមួនត្រូវថ្ងៃមិនខាន៕