វាជារឿងធ្ងន់ធ្ងរណាស់នៅពេលដែលអ្នក​ធ្លាក់ខ្លូនដល់កម្រិតចំណាយច្រើនជាងចំណូល ហើយថែមទាំងជាប់ជើងជាមួយនឹងបំណុលដ៏ច្រើនលើសលុបថែមទៀត។ ថ្ងៃនេះ Business Cambodia សូមលើកយកនូវដំណោះស្រាយបែបសង្គ្រោះបឋម ជាផ្លូវដែលលោកអ្នកគួរដើរភ្លាមៗ ពេលកំពុងស្ថិតក្នុងស្ថានភាពដែលបានរៀបរាប់មុននេះ។ ផ្លូវ ឬដំណោះស្រាយទាំងនោះរួមមាន៖

១. ឈប់បង្កើតបំណុលថ្មី

ជំហានដំបូងអ្នកត្រូវផ្ដេជ្ញាឈប់បង្កើតបំណុលថ្មីជាដាច់ខាត ជាពិសេសបំណុលឯកជនដែលអាចទាញអ្នកឱ្យធ្លាក់ចូលទៅក្នុងវិបត្តិការប្រាក់កាន់តែជ្រៅ។

២. ដឹងពីតួលេខដែលអ្នកជំពាក់គេឱ្យច្បាស់

អ្នកនឹងមិនអាចរកផ្លូវសងគេបានទេ បើអ្នកមិនដឹងថាខ្លួនឯងមានបំណុលសរុបប៉ុន្មាន ហើយជំពាក់អ្នកណាខ្លះ។ ដូច្នេះហើយអ្នកត្រូវសរុបចំនួនបំណុលដែលអ្នកមានទាំងអស់ ដោយបែងចែកជាពីរសិន ទី១គឺ បំណុលធនាគារ និងទី២គឺ បំណុលឯកជន។

បន្ទាប់មកអ្នកត្រូវរៀបបំណុលទាំងនោះ ទៅតាមលំដាប់នៃការប្រាក់ដែលវាមានពីតូចទៅធំតាមលំដាប់លំដោយ ដើម្បីដឹងឱ្យច្បាស់ថាតើមួយណាដែលមានភាពចាំបាច់ជាងគេ។

៣. បែងចែកកញ្ចប់លុយ

ជាមួយនឹងបំណុលនៅក្នុងដៃ អ្នកត្រូវបែងចែកកញ្ចប់លុយជារៀងរាល់ខែ ដើម្បីដឹងឱ្យច្បាស់ពីប្រភពដែលលុយរបស់អ្នកចូល និងចេញទៅ។ ជាទូទៅអ្នកអាចប្រើប្រាស់ច្បាប់ ៥០/៣០/២០ ដើម្បីរក្សាហិរញ្ញវត្ថុផ្ទាល់ខ្លួនរបស់អ្នកឱ្យស្ថិតស្ថេរ។

៥០% នៃចំណូលរបស់អ្នកគួរតែ ទុកសម្រាប់ចំណាយលើតម្រូវការចាំបាច់ ដូចជាកន្លែងស្នាក់នៅ គ្រឿងទេស ម្ហូបអាហារជាដើម (ផ្អាកការជួបជុំ ឬការញ៉ាំអាហារខាងក្រៅសិន)។

៣០% នៃចំណូលរបស់អ្នកពេលនេះ គួរទុកសម្រាប់ការចំណាយលើការអភិវឌ្ឍន៍ខ្លួនឯង ដើម្បីបង្កើនសមត្ថភាព សម្រាប់ដោះស្រាយបញ្ហាដែលអ្នកកំពុងប្រឈម ដូចជារៀនជំនាញលក់ ឬជំនាញដឹកនាំបន្ថែមទៀត។

២០% នៃចំណូលរបស់អ្នក គួរតែទុកប្រើប្រាស់សម្រាប់សងបំណុលគេ ព្រមទាំងឆ្លៀតសន្សំតិចតួចតាមដែលអាចលៃទៅបាន។

៤. កាត់បន្ថយចំណាយ

ដើម្បីបានលុយសម្រាប់សងបំណុលគេ អ្នកត្រូវតាំងចិត្តកាត់បន្ថយចំណាយតាមដែលអាចធ្វើទៅបាន បើធ្លាប់ញ៉ាំម្ហូបអាហារខាងក្រៅ គួរចាប់ផ្ដើមធ្វើខ្លួនឯងញ៉ាំនៅផ្ទះ។ ពេលទៅធ្វើការគួរឆ្លៀតវេចអាហារថ្ថៃត្រង់ទៅខ្លួនឯង។

កាត់បន្ថយការជួបជុំ ការដើរកម្សាន្តញឹកញាប់ បើអ្នកមានឡានតម្លៃថ្លៃ គួរពិចារណាលក់ចេញមកទិញជិះតម្លៃទាបជាងមុនវិញ ដើម្បីសន្សំលុយខ្លះសម្រាប់ទប់ទល់ការចំណាយផង និងដោះបំណុលផង។

៥. រកផ្លូវបង្កើនចំណូល

បើអ្នកជាម្ចាស់អាជីវកម្ម គួរតែព្យាយាមបង្កើតអ្វីដែលថ្មី ត្រូវនឹងទីផ្សារដើម្បីបង្កើនការលក់ និងបង្កើនចំណូល។ មួយវិញទៀតអ្នកក៏អាចប្រើជំនាញដែលអ្នកមានយកទៅធ្វើការឱ្យគេ បន្ថែមទៀតដើម្បីបានចំណូលបន្ថែម។

៦. ជ្រើសរើសផ្លូវដោះបំណុល

វិធីដោះបំណុលមានច្រើន ប៉ុន្តែអ្នកអាចជ្រើរើសផ្លូវណាមួយដែលសមស្របនឹងស្ថានភាពរបស់អ្នក ដូចជាក្បួនដុំព្រិល ដែលវាតម្រូវឱ្យអ្នកដោះបំណុលពីតូចទៅធំ ដោះអស់មួយហើយចាំដោះមួយទៀត។ ធ្វើបែបនេះអ្នកនឹងមានទឹកចិត្តខំដោះបំណុលរហូតដល់អស់ ព្រោះតែបានឃើញពីលទ្ធផលនៃការខំប្រឹងប្រែងរបស់ខ្លួនឯងជាប្រចាំ។

៧. ចរចារជាមួយម្ចាស់បំណុល

កុំខ្លាចនៅក្នុងការចរចារជាមួយនឹងម្ចាស់បំណុល ព្រោះពួកគេមិនត្រូវការអ្វីឡោះយក្រៅពីចង់ឱ្យអ្នកសងលុយគេឱ្យគ្រប់ចំនួនតែប៉ុណ្ណោះ។ បើអ្នកជំពាក់ឯកជន អាចសុំឱ្យគេទិញទ្រព្យដែលអ្នកមាន ជំនួសឱ្យការរកលុយសងគេ (ករណីលែងមានលទ្ធភាពសង)។

បើអ្នកជំពាក់ធនាគារអាចសុំសងគេត្រឹមតែការប្រាក់សិន ដើម្បីទុកពេលឱ្យខ្លួនឯង ប្រើប្រាស់ខួរក្បាលដែលធ្លាប់តែបារម្ភរឿងបំណុល មកគិតរកផ្លូវបង្កើនចំណូលវិញ។

៨. ស្វែងរកវិធីបន្ធូរបន្ថយបំណុល

ពេលជាប់បំណុលច្រើន អ្នកអាចពិចារណាការបង្រួមបង្រួមបំណុល ឱ្យនៅមួយដុំ ដូចជាការរៀបចំឥណទានឡើងវិញជាមួយធនាគារ ដើម្បីសល់ម្ចាស់បំណុលតែមួយ។ អ្នកអាចប្រឹក្សាជាមួយអ្នកជំនាញ ដើម្បីស្វែងរកកម្ចីល្អណាមួយ ដើម្បីមកផ្ដាច់បំណុលចាស់ៗជាពិសេសបំណុលឯកជន ធ្វើបែបនេះអ្នកក៏ធូរសម្ពាធហើយអាចចំណេញការប្រាក់ទៀតផង។

សូមជម្រាបផងដែរថា ទោះជាមានមូលហេតុច្រើនដែលនាំឱ្យអ្នកធ្លាក់ក្នុងបំណុលធ្ងន់ធ្ងរ ប៉ុន្តែហេតុផលដ៏ធំបំផុតមួយគឺ ការខ្វះខាតចំណេះដឹងហិរញ្ញវត្ថុ​។ ដូច្នេះហើយចាប់ពីពេលនេះទៅ អ្នកគួរខិតខំស្វែងយល់ ទាញយកចំណេះដឹងហិរញ្ញវត្ថុដាក់ខ្លួនឱ្យបានច្រើន តាមរយៈការសង្កេត ការរៀនពីអ្នកជំនាញ​ ឬរៀនពីបទពិសោធន៍ដែលអ្នកឆ្លងកាត់។ សូមឱ្យអ្នកឆាប់រួចផុតពីបញ្ហាបំណុល ហើយទទួលបានសេរីភាពហិរញ្ញវត្ថុវិញ៕