ជាដំណឹងដ៏រីករាយមួយសម្រាប់អ្នកខេត្ដកំពង់ធំ ខណៈក្រុមហ៊ុនមកពីប្រទេសកូរ៉េចំនួន ៤ បានសម្រេចបោះទុនវិនិយោគគម្រោងរបស់ខ្លួនសរុបចំនួន ៥ នៅក្នុងខេត្ដដែលកំពុងមានសក្ដានុពលមួយនេះ។ ដោយគម្រោងវិនិយោគនេះត្រូវបានចុះហត្ថលេខានៅថ្ងៃទី៩ ខែមិថុនា ឆ្នាំ២០២៦ នៅទីក្រុងសេអូល។

យោងតាមការបញ្ជាក់ពីឯកឧត្ដម នួន ផារ័ត្ន អភិបាល និងគណៈអភិបាលខេត្ដកំពង់ធំ បានឲ្យដឹងថា៖ កន្លែងដដែល ជួបជាមួយមនុស្សដដែល ប៉ុន្តែបានបោះមួយជំហានទៀតទៅមុខ ដោយបានចុះអនុស្សរណៈនៃការយោគយល់រវាងរដ្ឋបាលខេត្តកំពង់ធំ និងក្រុមហ៊ុនរបស់ប្រទេសកូរ៉េចំនួន ៤ លើគម្រោងវិនិយោគចំនួន ៥ នៅក្នុងភូមិសាស្ត្រខេត្តកំពង់ធំ។ យើងរំពឹងថា គម្រោងទាំង ៥ នេះ អាចនឹងលេចចេញជារូបរាងបានឆាប់រហ័ស នៅលើទឹកដីខេត្តកំពង់ធំរបស់យើង។

សូមជម្រាបថា ខេត្តកំពង់ធំ មានសក្ដានុពលស្នូលលើវិស័យកសិកម្ម-ឧស្សាហកម្ម ដោយជាតំបន់ដាំដុះដំណាំស្វាយចន្ទី កៅស៊ូ និងស្រូវធំជាងគេមួយ ទេសចរណ៍វប្បធម៌-ប្រវត្តិសាស្ត្រ (ជាពិសេសប្រាសាទសំបូរព្រៃគុកដែលជាសម្បត្តិបេតិកភណ្ឌពិភពលោក) និងទីតាំងភូមិសាស្ត្រយុទ្ធសាស្ត្រ ស្ថិតនៅចំកណ្តាលប្រទេសងាយស្រួលតភ្ជាប់ទៅកាន់បណ្តាខេត្តនានា៕