លោកស្រី Naseema McElroy ដែលជាគិលានុបដ្ឋាយិកាម្នាក់គឺជាស្រ្តីដែលធ្លាប់ផុតខ្លួនក្នុងបំណុលជិត១លានដុល្លារប៉ុន្ដែលោកស្រីអាចដោះខ្លួនចេញពីបំណុលដ៏ច្រើនលើសលប់ដោយប្រើប្រាស់វិធីដោះបំណុលដ៏សាមញ្ញមួយដែលហៅថា” Debt Snowball”។

តើក្បួនដោះបំណុល”Debt Snowball” គេអនុវត្តដូចម្ដេចទើបអាចធ្វើឲ្យមនុស្សជាច្រើនជាពិសេសលោកស្រី McElroy អាចដោះបំណុលជិត១លានដុល្លារបាន?

គោលការណ៍ចម្បងនៃក្បួនដោះបំណុល Debt Snowball គឺគេដោះបំណុលពីតូចទៅធំ។ ខាងក្រោមនេះគឺជាជំហានទាំង៤ក្នុងការអនុវត្តដោះបំណុលតាមក្បួន Debt Snowball។

១. សរសេរចុះនូវបំណុលទាំងអស់ដែលអ្នកមានដាក់លើក្រដាស រួចហើយដាក់លេខរៀងតាមលំដាប់ពីតូចទៅធំ។

២. រៀងរាល់ខែបង់បំណុលនីមួយៗក្នុងទឹកប្រាក់តិចបំផុត។ ត្រង់នេះមានន័យថាបើនៅធនាគារA គេត្រូវឲ្យបង់យ៉ាងតិច១០០ដុល្លារក្នុងមួយខែ ដូច្នេះមួយខែអ្នកបង់ធនាគារAតែ១០០ដុល្លារបានហើយ មិនបាច់បង់បង់ច្រើនជាងនេះនោះទេ។

៣. ភ្ជាប់ទៅនឹងចំណុចទី២ខាងលើ បំណុលនីមួយៗ បង់ប្រចាំខែតិចបំណុលតាមម្ចាស់បំណុលតម្រូវ ប៉ុន្ដែសម្រាប់បំណុលដែលតូចជាងគឺអ្នកត្រូវបង់សងប្រចាំខែឲ្យបានច្រើនតាមដែលអាចធ្វើទៅបាន។ ការធ្វើបែបនេះធ្វើឲ្យអ្នកអាចបង់បំណុលតូចឆាប់អស់ ហើយលុយដែលអ្នកតែងតែយកមកបង់បំណុលតូចបំផុតនោះ អាចយកមកបង់បំណុលតូចបន្ទាប់ទៀតក្រោយពីបំណុលតូចបំផុតបង់អស់ហើយ។

៤. អ្នកត្រូវអនុវត្តតាមជំហានទាំង៣ដែលបានរៀបរាប់ខាងដដែលៗរហូតដល់អាចដោះបំណុលទាំងអស់បានដោយជោគជ័យ។

តាមពិតទៅក្បួនដោះបំណុល Debt Snowball ដែលអនុវត្តដោះបំណុលពីតូចទៅធំគឺជាក្បួនដែលត្រូវបានគេហៅថាក្បួនដោះបំណុលឈ្នះៗ ដោយអ្នកជំពាក់បំណុលគាត់មានទឹកចិត្តក្នុងការដោះបំណុលដោយសារពួកគាត់បានមើលឃើញបំណុលរបស់ពួកគាត់ចាប់ផ្ដើមបាត់បន្តិចម្ដងៗតាមរយៈការដោះពីតូចទៅធំនេះឯង៕