កាលពីថ្មីៗនេះ​ មានដំណឹងថ្មីមួយបានប្រកាសថា ក្រុមហ៊ុន Apple អាចនឹងចេញ iPhone 18 Pro រហូតដល់ទៅ ៤ពណ៌តែម្តងដោយមានពណ៌ដូចជា៖ ពណ៌ប្រាក់ ពណ៌ខៀវខ្ចី ពណ៌ឈើរីក្រម៉ៅ ពណ៌ប្រផេះចាស់ បន្ទាប់ពីបែកធ្លាយពណ៌ទាំង៤នេះហើយគឺមានការគាំទ្រយ៉ាងខ្លាំង។ នេះបើយោងតាមការចុះផ្សាយដោយ MacRumors ។

បើតាមប្រភពខាងលើបានឱ្យដឹងថា ចំពោះតម្លៃ iPhone 18 នេះវិញ បើតាមការរំពឹងទុកគឺសម្រាប់ iPhone 18 Pro អាចលក់ក្នុងតម្លៃ ១,០៩៩ ដុល្លារ និង iPhone 18 Pro Max លក់ក្នុងតម្លៃ ១,១៩៩ ដុល្លារនៅទីផ្សារក្រៅស្រុក។ បើយោងតាមរបាយការណ៍ពីឧស្សាហកម្មបច្ចេកវិទ្យា បានបង្ហាញថា Apple អាចនឹងណែនាំជម្រើសទំហំផ្ទុកទិន្នន័យរហូតដល់ 2TB សម្រាប់ម៉ូដែល Pro Max ដែលអាចធ្វើឱ្យម៉ូដែលនេះមានលក្ខណៈសម្បត្តិពេញលេញបំផុតមានតម្លៃហក់ឡើងជិត ២,០០០ ដុល្លារ។

ដោយឡែក iPhone 18 Pro នេះនឹងក្លាយជាទូរសព្ទដំបូងគេដែលប្រើប្រាស់បន្ទះឈីប A20 ដែលផលិតតាមបច្ចេកវិទ្យា 2nm របស់ក្រុមហ៊ុន TSMC។ បន្ទះឈីបនេះមិនត្រឹមតែផ្តល់ល្បឿនលឿនជាងមុនខ្លាំងប៉ុណ្ណោះទេ ប៉ុន្តែវាថែមទាំងជួយសន្សំសំចៃថ្មបានកាន់តែប្រសើរ និងគាំទ្រមុខងារ AI ទំនើបៗដែល Apple កំពុងអភិវឌ្ឍ។

គួរជម្រាបថា នេះគ្រាន់តែជាព័ត៌មានបឋមដែលទទួលបានពីប្រភពបែកធ្លាយ និងអ្នកវិភាគប៉ុណ្ណោះក្រុមហ៊ុន Apple មិនទាន់មានការបញ្ជាក់ជាផ្លូវការណាមួយនៅឡើយទេ ទោះបីជាយ៉ាងណាក៏ដោយ iPhone 18 នេះអាចនឹងចេញលក់ជាផ្លូវការក្នុងខែកញ្ញា ឆ្នាំ២០២៦ ខាងមុខនេះហើយ៕