សម្រាប់មនុស្សមួយចំនួនយល់ថា ការបង់រំលស់ផ្ទះវាគឺជារឿងល្អ ព្រោះថាវាធ្វើឱ្យលោកអ្នកមានផ្ទះមួយជារបស់ខ្លួនឯង ដោយមានឈ្មោះ ខ្លួនឯងនៅលើប្លង់រឹង មួយវិញទៀតធ្វើឱ្យជីវិតលោកអ្នកកាន់តែមាន លំនឹងនៅពេលដែលមានផ្ទះផ្ទាល់ខ្លួន។ ប៉ុន្តែទាក់ទងនឹងការបង់រំលស់ផ្ទះ តើលោកអ្នកបានដឹងហើយឬនៅ ថាតើមុនពេលទិញផ្ទះបង់រំលស់ លោកអ្នកត្រូវមានលក្ខខណ្ឌអ្វីខ្លះ? សម្រាប់ម្ចាស់អចលនទ្រព្យ គេត្រូវពិនិត្យមើលលើលទ្ធភាពរកចំណូលរបស់លោកអ្នក ការចំណាយ និងលទ្ធភាពបង់រំលស់ជាដើម។ ក៏ប៉ុន្តែនេះគ្រាន់តែជាផ្នែកមួយប៉ុណ្ណោះ ពីព្រោះថា លោកអ្នកត្រូវត្រៀមខ្លួនច្រើនជាងនេះឆ្ងាយណាស់មុននឹងសម្រេចចិត្តទិញផ្ទះ។
យោងតាមការដកស្រង់ចេញគេហទំព័រ INSIDER បានបង្ហាញពីចំណុចមួយចំនួនដែលមនុស្សភាគច្រើនបានមើលរំលង ហើយមិនបានត្រៀមខ្លួនមុននិងសម្រេចចិត្តទិញផ្ទះ។ ប្រសិនបើមានចំណុចណាមួយនោះ លោកអ្នកមិនគួរប្រញាប់ប្រញាល់ពេកនោះទេ។
១.គិតចង់ទិញផ្ទះដើម្បីវិនិយោគយកប្រាក់ចំណេញ
បើមានអ្នកណាម្នាក់សួរអ្នកថា ហេតុអ្វីអ្នកទិញផ្ទះ ហើយអ្នកឆ្លើយថា មិនចង់នៅផ្ទះជួល ឬក៏គិតថា ទិញផ្ទះជាការវិនិយោគដ៏ល្អមួយ នោះទំនង ការគិតរបស់អ្នកពិតជាត្រឹមត្រូវនោះទេ។ អ្នកអាចវិភាគដោយខ្លួនឯងបានថា តើមួយឆ្នាំផ្ទះឡើងថ្លៃប៉ុន្មាន%? ក្នុងករណីអ្នកគ្មានប្រាក់សោះ ហើយបង់រំលស់ តើអត្រាការប្រាក់ឡើងដល់ប៉ុន្មានទម្រាំអ្នកបង់គ្រប់? នេះមិនទាន់បូកអត្រាអតិផរណាប្រចាំផង។ យ៉ាងណាមិញ ប្រសិនបើអ្នកមានលុយបង់គ្រប់ ឬមានលុយត្រៀមខ្លះសម្រាប់ទិញផ្ទះពី ៥០% ឡើងទៅនេះអាចចាត់ទុកថា អ្នកទទួលបានលទ្ធផលវិជ្ជមានខ្លះចំពោះការវិនិយោគមួយនេះ។
២.មិនមានប្រាក់សន្សំសម្រាប់គ្រាអាសន្ន
ត្រូវដឹងថា ប្រាក់សន្សំសម្រាប់គ្រាអាសន្ន មិនត្រូវបានចាត់ទុកចូលក្នុងថវិកាដែលអ្នកត្រូវចំណាយប្រចាំខែនោះទេ។ វាត្រូវបានប្រើប្រាស់នៅពេលបន្ទាន់ដូចជាថ្លៃព្យាបាលជំងឺ គ្រោះថ្នាក់ បាត់បង់ការងារ រកស៊ីខាត ឬហានិភ័យផ្សេងៗដែលកើតមានឡើងដោយយថាហេតុ បើមិនដូច្នេះទេ អ្នកមិនគួរប៉ះពាល់វាជាដាច់ខាត។ ដូច្នេះហើយសាកស្រមៃបន្តិចថា អ្នកបានចំណាយលុយមួយផ្នែកធំដើម្បីទិញ ឬបង់រំលស់ផ្ទះ តើអ្នកបានលុយមកពីណា ប្រសិនបើបញ្ហាទាំងអស់នេះកើតឡើង? ដូច្នេះមុននឹងសម្រេចទិញផ្ទះ អ្នកត្រូវមានគម្រោងប្រាក់សន្សំសម្រាប់គ្រាអាសន្នជួយទប់ទល់ជាមុនសិន។
៣.មិនបានសន្សំប្រាក់
វាជាបញ្ហាធំប្រសិនបើលោកអ្នកមិនមានទាន់បានស្សំប្រាក់ទាតែសោះ ហើយបែជាហ៊ានទៅបង់រំសល់។ ប្រាក់សន្សំសម្រាប់ទុកមានគ្រាអាស្នន គឺខុសគ្នាជាមួយប្រាក់សន្សំដោយប្រាក់សន្សំសំដៅទៅលើប្រាក់ដែលលោកអ្នកត្រូវចំណាញប្រចាំខែ។ ម្យ៉ាងវិញទៀតប្រាក់សន្សំនេះគឺមានគោលដៅខុសពីប្រាក់សន្សំសម្រាប់គ្រាអាសន្ន ពោលអ្នកនឹងត្រូវយកទៅប្រើប្រាស់សម្រាប់ចំណាយទិញរបស់របរផ្សេងៗដោយមិនជំពាក់បំណុល ឬកាត់បន្ថយបំណុលនៅក្នុងអត្រាមួយទាបដូចជា ទិញរថយន្ត ទិញផ្ទះ វិនិយោគ ឬសម្រាប់ចាយវាយនៅពេលចាស់ទៅជាដើម។ ដូច្នេះហើយ មុនសម្រេចចិត្តទិញផ្ទះ អ្នកត្រូវប្រាកដថា អ្នកសល់ប្រាក់ច្រើនជាមុនសិន ឬមានប្រាក់សន្សំខ្លះជាមុនសិន បើមិនដូច្នេះទេ អ្នកនឹងជួបហានិភ័យធ្លាក់ក្នុងបំណុលជាមិនខាន។
៤. .អ្នកមានគម្រោងចំណាយធំៗនៅប៉ុន្មានឆ្នាំខាងមុខ
ចំណុចសំខាន់មួយទៀតមុនពេលទិញផ្ទះ អ្នកត្រូវគិតទៅដល់កំឡុងពេល ៤ទៅ ៥ឆ្នាំខាងមុខថា តើអ្នកមានគម្រោងត្រូវការលុយច្រើនដើម្បីចំណាយលើអ្វីមួយឬអត់? ឧទាហរណ៍ថា អ្នកមានលទ្ធភាពបង់រំលោះផ្ទះមួយខែ ១ ០០០ ដុល្លារ។ ប៉ុន្តែនៅឆ្នាំក្រោយស្រាប់តែអ្នកត្រូវការប្រាក់ដើម្បីរៀបការ ឬត្រូវការទុនរកស៊ីជាដើម អ្នកត្រូវសួរខ្លួនឯងថា តើអ្នកអាចរកចំណូលបន្ថែមបានអត់? បើមិនអាចទេនោះការចំណាយប្រចាំខែលើការបង់រំលស់ផ្ទះនឹងមានផលប៉ះពាល់។
៥.មិនមានគម្រោងសម្រាប់គោលដៅផ្សេងទៀត
ប្រាក់មួយកាក់ពីរកាក់របស់អ្នក ត្រូវតែយកទៅដោះបំណុលរបស់អ្នកឲ្យអស់មុនពេលសម្រេចចិត្តទៅទិញផ្ទះ។ អ្នកគួរស្វែងយល់ថា ហេតុអ្វីបានជាអ្នកមានបំណុល? តើអ្នកមានគម្រោងដោះបំណុលដោយរបៀបណា? នេះអាចបណ្តាលមកពីអ្នកចាយលើសចំណូលដូចជា ទិញរបស់របរដែលមិនចាំបាច់ ដើរកម្សាន្ត កម្មវិធីឥតព្រាងទុក ជាដើម ដែលនេះការចំណាយលើការទិញផ្ទះអាចនឹងជួបផលវិបាក។ គន្លឹះដ៏ល្អ អ្នកត្រូវមានបញ្ជីគោលដៅចំណាយប្រចាំខែឲ្យច្បាស់លាស់ជាមុនសិន និងចំណាយត្រូវបានកំណត់ថា អ្នកត្រូវចំណាយអ្វីខ្លះក្នុងមួយខែៗ? បន្ទាប់មកចំណាយវាតាមភាពចាំបាច់ និងអាទិភាពជាងគេ៕
អត្ថបទដោយ៖ ឌឿក ស្រី នុត
