ក្នុងឱកាស អ័រគីន កម្ពុជា (ORKIN Cambodia) អបអរសាទរខួបគម្រប់ ១០ឆ្នាំនៅកម្ពុជា ក្រុមហ៊ុនមិនត្រឹមតែអបអរសាទរចំពោះដំណើររីកចម្រើន និងកិច្ចសហការដែលបានកសាងឡើងក្នុងរយៈពេលមួយទសវត្សរ៍កន្លងមកប៉ុណ្ណោះទេ ប៉ុន្តែក៏ចង់បន្តចូលរួមចំណែកក្នុងការគាំទ្រយុវជនកម្ពុជា និងអនាគតរបស់ពួកគេផងដែរ។

ជាផ្នែកមួយនៃកិច្ចសហការនេះ ORKIN Cambodia និង ITC បានចុះហត្ថលេខាលើអនុស្សរណៈនៃការយោគយល់ (MOU) ក្នុងគោលបំណងពង្រឹងកិច្ចសហប្រតិបត្តិការលើវិស័យអប់រំ ការចែករំលែកចំណេះដឹង និងការបង្កើតឱកាសសម្រាប់និស្សិត។ ជាមួយគ្នានេះដែរ Dr. Ron Harrison, Global Technical Services Director of Rollins/Orkin និងជាអ្នកដែលតែងតែគាំទ្រ ORKIN Cambodia អស់រយៈពេលជាច្រើនឆ្នាំ បានផ្តល់អាហារូបករណ៍ថ្លៃសិក្សាដល់និស្សិត ITC ចំនួន ៧ រូប ក្នុងកម្មវិធីវិស្វកម្មគីមី នៃមហាវិទ្យាល័យគីមីឧស្សាហកម្ម។ អាហារូបករណ៍នេះនឹងផ្តោតលើ និស្សិតមកពីមហាវិទ្យាល័យវិស្វកម្មគីមី ដែលមានសមត្ថភាព និងលទ្ធផលសិក្សាល្អ ដើម្បីជួយពួកគេបន្តការសិក្សានៅថ្នាក់ឧត្តមសិក្សា និងអភិវឌ្ឍចំណេះដឹង និងជំនាញដែលចាំបាច់សម្រាប់អាជីពរបស់ពួកគេនៅថ្ងៃអនាគត។

សម្រាប់ អ័រគីន កម្ពុជា ការគាំទ្រវិស័យអប់រំ គឺជាផ្នែកមួយនៃការចូលរួមកសាងអនាគតដ៏ល្អប្រសើរសម្រាប់កម្ពុជា។ តាមរយៈការផ្តល់ឱកាសដល់និស្សិតដែលមានសមត្ថភាព ក្រុមហ៊ុនសង្ឃឹមថា អាហារូបករណ៍នេះនឹងជួយឱ្យពួកគេអាចបន្តការសិក្សា ពង្រឹងសមត្ថភាព និងយកចំណេះដឹងរបស់ពួកគេទៅចូលរួមអភិវឌ្ឍប្រទេសជាតិនាពេលអនាគត។
វិស្វកម្មគីមី គឺជាជំនាញមួយដែលមានសារៈសំខាន់សម្រាប់វិស័យឧស្សាហកម្មជាច្រើន។ ដូច្នេះ ការគាំទ្រដល់និស្សិតដែលមានសមត្ថភាពក្នុងវិស័យនេះ ក៏ជាការចូលរួមជួយអភិវឌ្ឍធនធានមនុស្សដែលកម្ពុជាត្រូវការនាពេលអនាគតផងដែរ។
ការចូលរួមឧបត្ថម្ភរបស់ Dr. Ron Harrison ក៏បង្ហាញពីការយកចិត្តទុកដាក់ផ្ទាល់ខ្លួនរបស់លោកចំពោះការអប់រំ និងការគាំទ្រយុវជនកម្ពុជា។ 

“ក្រុមហ៊ុន Orkin Pest Control ដែលជាក្រុមហ៊ុនឈានមុខគេលើពិភពលោកក្នុងវិស័យគ្រប់គ្រងសត្វល្អិត កំពុងប្រារព្ធខួបលើកទី ១២៥ របស់ខ្លួន តាមរយៈការផ្តល់អាហារូបករណ៍ជូនដល់និស្សិតឆ្នើមក្នុងវិស័យវិទ្យាសាស្ត្រ។
ដើម្បីចូលរួមអបអរសាទរខួបដ៏សំខាន់នេះ ក៏ដូចជាខួប ១០ ឆ្នាំរបស់ Orkin Cambodia ក្រុមហ៊ុន Orkin Cambodia នឹងផ្តល់អាហារូបករណ៍ ជូនដល់និស្សិតដែលកំពុងបន្តការសិក្សាលើជំនាញវិស្វកម្មគីមី ។
យើងជឿជាក់ថា កម្មវិធីអាហារូបករណ៍នេះនឹងចូលរួមចំណែកពង្រឹងវិស័យសុវត្ថិភាពចំណីអាហារ និងការគ្រប់គ្រងសត្វល្អិតនៅកម្ពុជា។ យើងមានកិត្តិយសយ៉ាងក្រៃលែងដែលបានសហការជាមួយ វិទ្យាស្ថានបច្ចេកវិទ្យាកម្ពុជា ដើម្បីបង្ហាញពីការប្តេជ្ញាចិត្តរបស់ Orkin ក្នុងការលើកកម្ពស់សុវត្ថិភាពចំណីអាហារ និងការគ្រប់គ្រងសត្វល្អិតនៅកម្ពុជា។”

— Dr. Ron Harrison
Global Technical Services Director, Rollins/Orkin

គំនិតផ្តួចផ្តើមផ្តល់អាហារូបករណ៍នេះ កើតឡើងក្នុងឆ្នាំដ៏មានអត្ថន័យមួយសម្រាប់ អ័រគីន កម្ពុជា ខណៈក្រុមហ៊ុនកំពុងអបអរសាទរ ១០ឆ្នាំនៃការប្រតិបត្តិការ និងកិច្ចសហការនៅកម្ពុជា។
ក្នុងរយៈពេល ១០ឆ្នាំកន្លងមក អ័រគីន កម្ពុជា បានខិតខំនាំយកចំណេះដឹង និងស្តង់ដារអន្តរជាតិក្នុងវិស័យគ្រប់គ្រងសត្វល្អិតមកកាន់ទីផ្សារកម្ពុជា ព្រមទាំងបានកសាងទំនាក់ទំនងរយៈពេលវែងជាមួយអតិថិជន ដៃគូ ស្ថាប័ន និងសហគមន៍ជាច្រើន។

សម្រាប់ អ័រគីន កម្ពុជា ខួប ១០ឆ្នាំ មិនមែនគ្រាន់តែជាពេលវេលាសម្រាប់អបអរសាទរចំពោះសមិទ្ធផលកន្លងមកនោះទេ ប៉ុន្តែក៏ជាឱកាសមួយក្នុងការគិតអំពីអ្វីដែលក្រុមហ៊ុនអាចធ្វើបន្ថែមទៀត ដើម្បីចូលរួមចំណែកជួយសង្គមកម្ពុជានាពេលអនាគត។ 

តាមរយៈកិច្ចសហការជាមួយ វិទ្យាស្ថានបច្ចេកវិទ្យាកម្ពុជា អ័រគីន កម្ពុជា ចង់ជួយបង្កើតឱកាសឱ្យនិស្សិតដែលមានសក្តានុពល អាចបន្តការសិក្សា និងត្រៀមខ្លួនសម្រាប់អាជីពរបស់ពួកគេ។

លោកស្រី ឈុន ណៃឈីវ ប្រធានគ្រប់គ្រងទូទៅ នៅអ័រគីន កម្ពុជា បានមានប្រសាសន៍ថា៖

“ខួប ១០ឆ្នាំ គឺជាពេលវេលាដ៏មានអត្ថន័យសម្រាប់ អ័រគីន កម្ពុជា។ យើងមិនចង់ត្រឹមតែអបអរសាទរចំពោះសមិទ្ធផលរបស់យើងក្នុងរយៈពេល ១០ឆ្នាំកន្លងមកទេ ប៉ុន្តែយើងក៏ចង់ចែករំលែក និងចូលរួមចំណែកជាមួយសហគមន៍ និងយុវជនកម្ពុជាផងដែរ។ យើងសូមថ្លែងអំណរគុណយ៉ាងជ្រាលជ្រៅចំពោះ Dr. Ron Harrison ដែលបានឧបត្ថម្ភថវិកាផ្ទាល់ខ្លួនប្រមាណជិត ១០,០០០ ដុល្លារអាមេរិច ដើម្បីគាំទ្រនិស្សិតវិស្វកម្មគីមីដែលមានសក្តានុពលនៅ ITC។ យើងសង្ឃឹមថា អាហារូបករណ៍នេះនឹងជួយផ្តល់ឱកាសឱ្យនិស្សិតអាចបន្តការសិក្សា និងកសាងមូលដ្ឋានដ៏រឹងមាំសម្រាប់អនាគតរបស់ពួកគេ។”

នៅពេល អ័រគីន កម្ពុជា ឈានចូលទៅក្នុង ទសវត្សរ៍ទី២ ក្រុមហ៊ុននៅតែបន្តប្តេជ្ញាចិត្តចូលរួមចំណែកដល់កម្ពុជាតាមរយៈការងាររបស់ខ្លួន និងតាមរយៈសកម្មភាពដែលផ្តោតលើ ការអប់រំ ការចែករំលែកចំណេះដឹង ការអភិវឌ្ឍសហគមន៍ និងការគាំទ្រយុវជនដែលមានសក្តានុពល។

ការឧបត្ថម្ភពី Dr. Ron Harrison គឺជាផ្នែកមួយដ៏មានអត្ថន័យនៃការប្តេជ្ញាចិត្តនេះ និងជាការបង្ហាញពីការជឿជាក់លើសមត្ថភាព និងសក្តានុពលរបស់យុវជនកម្ពុជា។

អ័រគីន កម្ពុជាសង្ឃឹមថានឹងអាចបន្តកិច្ចសហការជាមួយ ITC និងស្ថាប័នដទៃទៀត ដើម្បីបង្កើត
ឱកាសកាន់តែច្រើនសម្រាប់និស្សិតកម្ពុជា និងចូលរួមអភិវឌ្ឍធនធានមនុស្សជំនាន់ក្រោយ។

លើសពីនេះ អ័រគីន កម្ពុជា ក៏បានចូលរួមគាំទ្រ ITC តាមរយៈការផ្តល់សេវាត្រួតពិនិត្យសត្វល្អិតដោយឥតគិតថ្លៃ និងសេវាគ្រប់គ្រងសត្វល្អិតសម្រាប់មន្ទីរពិសោធន៍របស់ ITC ដើម្បីជួយរក្សាបរិស្ថានឱ្យមានអនាម័យ សុវត្ថិភាព និងសមស្របសម្រាប់ការសិក្សា និងការស្រាវជ្រាវ។

អំពី អ័រគីន កម្ពុជា

អ័រគីន កម្ពុជា គឺជាក្រុមហ៊ុនផ្តល់សេវាគ្រប់គ្រង និងកម្ចាត់សត្វល្អិតប្រកបដោយវិជ្ជាជីវៈ សម្រាប់ គេហដ្ឋាន អាជីវកម្ម រោងចក្រ សហគ្រាស និងស្ថាប័នផ្សេងៗ។ 
ក្រុមហ៊ុនត្រូវបានបង្កើតឡើងនៅខែតុលា ឆ្នាំ២០១៦ និងបាននាំយកសិទ្ធិអាជីវកម្ម (Franchise) របស់ ORKIN ដែលជាក្រុមហ៊ុនគ្រប់គ្រងសត្វល្អិតឈានមុខគេមួយក្នុងពិភពលោក និងមានបទពិសោធន៍ជាង ១២៥ឆ្នាំ មកកាន់ប្រទេសកម្ពុជា។
យើងប្តេជ្ញាផ្តល់នូវ ដំណោះស្រាយដ៏ល្អបំផុតក្នុងការគ្រប់គ្រងសត្វល្អិត ជូនអតិថិជន ដោយផ្អែកលើបទពិសោធន៍ និងជំនាញរបស់យើង។
ទំនាក់ទំនង អ័រគីន កម្ពុជា: 099 588 788