កម្ពុជា–អាម៉េរិកសម្រេចបាន «កិច្ចព្រមព្រៀងបើកចំហជើងមេឃ» ជាប្រវត្តិសាស្ត្រកាលពីថ្ងៃទី ៦ មិថុនា ឆ្នាំ២០២៦ក្រោយចរចាអស់ពេលជាច្រើនឆ្នាំ។ នេះយោងតាមការចេញផ្សាយដោយក្រសួងព័ត៌មាន។
ឯកឧត្តម ស៊ីន ចាន់សិរីវុត្ថា អ្នកនាំពាក្យអាកាសចរណ៍ស៊ីវិល បានប្រាប់បណ្ដាញសារព័ត៌មានថា កិច្ចព្រមព្រៀងបើកចំហជើងមេឃជាកិច្ចព្រមព្រៀងជាប្រវត្តិសាស្ត្របន្ទាប់ពីភាគីទាំងពីរបានចំណាយពេលចរចាអូសបន្លាយអស់រយៈពេលជាងមួយទសវត្សរ៍។
ជំនួបកំពូលនេះធ្វើឡើងរវាង ឯកឧត្តមឧបនាយករដ្ឋមន្ត្រី ស៊ុន ចាន់ថុល និងលោក ហាន វ៉ានឌឺថុល (Hunt VanderToll) ឧបការីរងរដ្ឋមន្ត្រីការបរទេសសហរដ្ឋអាម៉េរិក ទទួលបន្ទុកកិច្ចការអាស៊ីអាគ្នេយ៍ និងអាស៊ាន ដោយមានការចូលរួមពី ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល។
ឯកឧត្តម ស៊ីន ចាន់សិរីវុត្ថា បន្តថា កិច្ចព្រមព្រៀងបើកចំហជើងមេឃ គឺជាយន្តការសេរីភាវូបនីយកម្មទីផ្សារដឹកជញ្ជូនផ្លូវអាកាស ដោយលុបបំបាត់រាល់ការរឹតបន្តឹងចាស់ៗ រវាងប្រទេសជាភាគី រួមមាន លុបបំបាត់ការកម្រិតចំនួនជើងហោះហើរ និងចំនួនក្រុមហ៊ុនអាកាសចរណ៍។ បើកទូលាយសមត្ថភាពដឹកជញ្ជូនអ្នកដំណើរ ដឹកទំនិញ មិនកំណត់ទំហំប្រភេទយន្តហោះ និងផ្តល់សិទ្ធិដឹកជញ្ជូនផ្លូវអាកាស និងការតភ្ជាប់ទិសដៅហោះហើរដោយសេរី និងបត់បែន។
បើតាមរដ្ឋលេខាធិការដ្ឋានអាកាសចរណ៍ស៊ីវិល ការដែលសហរដ្ឋអាម៉េរិកបង្ហាញការគាំទ្រដល់ការអភិវឌ្ឍហេដ្ឋារចនាសម្ព័ន្ធអាកាសចរណ៍កម្ពុជា ជាពិសេស «អាកាសយានដ្ឋានអន្តរជាតិតេជោ» គឺជាការទទួលស្គាល់ជាសកលថាកម្ពុជាជាគោលដៅវិនិយោគប្រកបដោយស្ថិរភាព និងជាច្រកតភ្ជាប់ផ្លូវអាកាសដ៏សំខាន់មួយក្នុងតំបន់។ទោះបីជាក្នុងរយៈពេលខ្លី ជើងហោះហើរត្រង់ រវាងកម្ពុជា និងសហរដ្ឋអាម៉េរិក មិនទាន់អាចលេចរូបរាងឡើងភ្លាមៗក៏ដោយ ប៉ុន្តែកិច្ចព្រមព្រៀងនេះបានបង្កើតមូលដ្ឋានច្បាប់ និងនីតិវិធីដ៏រឹងមាំ។ មុននឹងឈានដល់ការហោះត្រង់ ក្រុមហ៊ុនអាកាសចរណ៍អាចពង្រីកការតភ្ជាប់តាមរយៈ ជើងហោះហើរតភ្ជាប់ និងកិច្ចព្រមព្រៀងលក់សំបុត្ររួមគ្នា។
អ្នកនាំពាក្យដដែលបានបញ្ជាក់ថា ជំនួបនេះបានបញ្ជូនសញ្ញាវិជ្ជមានយ៉ាងខ្លាំងដល់បរិយាកាសវិនិយោគ ដ៏មានឥទ្ធិពល ក្នុងការទាក់ទាញភ្ញៀវទេសចរ វិនិយោគិនអាម៉េរិក និងពង្រឹងវិស័យភស្តុភារកម្ម របស់កម្ពុជាក្នុងរយៈពេលវែង។
រដ្ឋលេខាធិការដ្ឋានអាកាសចរណ៍ស៊ីវិល បានអធិប្បាយាកិច្ចព្រមព្រៀង Open Skies នេះ មិនមែនគ្រាន់តែជាការព្រមព្រៀងខាងបច្ចេកទេសហោះហើរប៉ុណ្ណោះទេ ប៉ុន្តែវាជាឧបករណ៍គោលនយោបាយដ៏មានតម្លៃ ក្នុងការបំប្លែងទឹកដីកម្ពុជាឱ្យទៅជា «មជ្ឈមណ្ឌលអាកាសចរណ៍ និងភស្តុភារកម្មតំបន់» ដែលមានសមត្ថភាពខ្ពស់ ទំនើបមានចីរភាព និងអាចប្រកួតប្រជែងនៅលើឆាកអន្តរជាតិបានយ៉ាងពេញលេញ។
គួរជម្រាបថា កាលពីពេលថ្មីៗកន្លងទៅនេះ ក្រុមប្រឹក្សាភិបាលនៃសាជីវកម្មហិរញ្ញវត្ថុអភិវឌ្ឍន៍អន្តរជាតិ (DFC) របស់សហរដ្ឋអាម៉េរិក បានអនុម័តលើការវិនិយោគជាយុទ្ធសាស្ត្រថ្មីៗចំនួន ២,៥ ប៊ីលានដុល្លារ (២.៥០០ លានដុល្លារ) នៅក្នុងប្រទេសមួយចំនួន ដែលមានគោលបំណងពង្រឹងខ្សែច្រវាក់ផ្គត់ផ្គង់របស់អាម៉េរិក ពង្រីកការនាំចេញថាមពលរបស់អាម៉េរិក គាំទ្រដល់សន្តិភាពនិងស្ថិរភាពក្នុងតំបន់ និងជំរុញកិច្ចសហប្រតិបត្តិការសេដ្ឋកិច្ច។
ក្នុងចំណោមគម្រោងដែលបានអនុម័តទាំងនោះ DFC មានផែនការវិនិយោគលើការគាំទ្រដល់ការបន្តពង្រីកហេដ្ឋារចនាសម្ព័ន្ធអាកាសចរណ៍របស់ប្រទេសកម្ពុជា និងលើកកម្ពស់ឱកាសសេដ្ឋកិច្ចឱ្យកាន់តែទូលំទូលាយសម្រាប់ពាណិជ្ជកម្ម កំណើនសេដ្ឋកិច្ច និងការអភិវឌ្ឍ៕
