នៅថ្ងៃទី២៩ ខែមិថុនា ឆ្នាំ២០២៦ នេះ ឯកឧត្តម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានដឹកនាំមន្ទីរជំនាញពាក់ព័ន្ធ និងអាជ្ញាធរមូលដ្ឋានស្រុកពញាឮ ចុះពិនិត្យផ្ទាល់ពីវឌ្ឍនភាពការងារនៃគម្រោងសាងសង់ផ្លូវមួយខ្សែ ដែលតភ្ជាប់ពីផ្លូវជាតិលេខ៥ ឆ្ពោះទៅកាន់តំបន់ប្រវត្តិសាស្ត្រភ្នំព្រះរាជទ្រព្យ (ភ្នំឧដុង្គ)។

យោងតាមរបាយការណ៍បច្ចេកទេស គម្រោងហេដ្ឋារចនាសម្ព័ន្ធផ្លូវមួយខ្សែនេះ មានប្រវែងសរុប ៣ ៩១០ ម៉ែត្រ និងទទឹងផ្លូវ ១៤ ម៉ែត្រ។ នៅក្នុងគម្រោងមួយខ្សែនេះក៏មានការសាងសង់ស្ពានបេតុងចំនួន ០១កន្លែង (ប្រវែង ៣០ម៉ែត្រ ទទឹង ១៤ម៉ែត្រ) និងលូប្រអប់ចំនួន ០៣ កន្លែង។

ការចុះពិនិត្យនាឱកាសនេះ គឺដើម្បីធានាឱ្យបាននូវគុណភាពសំណង់ស្របតាមស្តង់ដារបច្ចេកទេស ព្រមទាំងជំរុញល្បឿននៃការសាងសង់ឱ្យបានទាន់ពេលវេលា។

សូមបញ្ជាក់ផងដែរថា ក្រោយពេលដំណើរការសាងសង់ត្រូវបានបញ្ចប់ជាស្ថាពរ ផ្លូវមួយខ្សែនេះនឹងដើរតួនាទីយ៉ាងសំខាន់ក្នុងការជួយសម្រួលដល់ការធ្វើដំណើររបស់បងប្អូនប្រជាពលរដ្ឋ កាត់បន្ថយការកកស្ទះចរាចរណ៍ ចំណេញពេលវេលា និងជាពិសេស គឺជួយលើកកម្ពស់សោភ័ណភាព និងវិស័យទេសចរណ៍ ដោយបង្កើតភាពងាយស្រួលដល់ភ្ញៀវទេសចរជាតិ និងអន្តរជាតិ ដែលអញ្ជើញមកទស្សនាកម្សាន្តនៅតំបន់រមណីយដ្ឋានប្រវត្តិសាស្ត្រភ្នំព្រះរាជទ្រព្យ ឱ្យកាន់តែមានភាពប្រសើរឡើងទ្វេដង៕