នៅពេលឆាប់ៗខាងមុខនេះគម្រោងទីលានទុកដាក់សំរាមចំណាយទុនប្រមាណ១៣លានដុល្លា និងគម្រោងប្រព័ន្ធចម្រោះទឹកកខ្វក់ និងរំដោះទឹកភ្លៀងចំណាយទុនប្រមាណ២៩លានដុល្លា នឹងលេចចេញជារូបរាងសម្រាប់បំរើផលប្រយោជន៍ដល់បងប្អូនប្រជាពលរដ្ឋទូទៅនៅខេត្ដស្វាយរៀង។ នេះបើយោងងតាមការបញ្ជាក់ពីលោក សរ សុដានី អភិបាលរងខេត្តស្វាយរៀង។
នៅក្នុងកិច្ចប្រជុំត្រួតពិនិត្យគម្រោងអភិវឌ្ឃន៍ទីក្រុងគួរឱ្យចង់រស់នៅ ស្ថិតនៅភូមិសាស្ត្រក្រុងបាវិត ខេត្តស្វាយរៀង នាថ្ងៃទី២៣ ខែកក្កដា ឆ្នាំ២០២៥ ឯកឧត្ដមបានលើកឡើងថា មកដល់បច្ចុប្បន្នប្រទេសជាតិយើងកាន់តែមានការរីកចំរើនមានការអភិវឌ្ឍន៍កើនឡើងជាលំដាប់ តម្រូវការរស់នៅប្រចាំថ្ងៃរបស់បងប្អូនប្រជាពលរដ្ឋកាន់តែស៊ីវីល័យ។ ដូច្នេះដើម្បីឆ្លើយតបទៅនឹងបរិបថនេះ ក្រោមគម្រោងហិរញ្ញប្បទានសហប្រតិបត្តិការរបស់ធានាគារអភិវឌ្ឃន៍អាស៊ី (ADB) បានគិតគូរដោយផ្តោតសំខាន់លើការកសាងបណ្តាញលូ ប្រព័ន្ធចម្រោះទឹកកខ្វក់ និងទីលានទុកដាក់សំរាម ព្រោះថាគម្រោងទាំងនេះគឺជាបច្ច័យអទិភាពដែលគាំទ្រធ្វើអោយគម្រោងអភិវឌ្ឍន៍ទីក្រុងគួរឱ្យចង់រស់នៅ (Livable Cities) អាចដំណើរការប្រកបដោយភាពជោគជ័យនិងមាននិរន្តរភាព។
គួរបញ្ជាក់ផងដែរថា នៅប៉ុន្មានឆ្នាំចុងក្រោយនេះខេត្ដស្វាយរៀង ហាក់មានភាពលេចធ្លោខ្លាំង ដោយក្នុងនោះខេត្ដបានទាក់ទាញគម្រោងវិនិយោគធំៗជាច្រើន។ ជាក់ស្ដែងនៅក្នុងរយៈពេល ៦ ខែដើមឆ្នាំ២០២៥ នេះ ខេត្ដស្វាយរៀងបានទទួលគម្រោងវិនិយោគសរុបចំនួន ៨៥ គម្រោងឈរនៅលេខរៀងទី២ បន្ទាប់ពីខេត្ដកំពង់ស្ពឺដែលទទួលបាន ៩២ គម្រោង៕
