ក្រុមប្រឹក្សាអភិវឌ្ឍន៍កម្ពុជា (CDC) កាលពីខែឧសភា ឆ្នាំ២០២៦ កន្លងទៅ បានអនុម័តគម្រោងវិនិយោគបង្កើតតំបន់សេដ្ឋកិច្ចពិសេស និងតំបន់សេដ្ឋកិច្ចពិសេសសួនឌីជីថលកម្ពុជា ចំនួន ២ ដែលទុនវិនិយោគសរុបចំនួន ១៥៨ លានដុល្លារ និងអាចបង្កើតឱកាសការងារសរុបចំនួនជាង ២ ពាន់កន្លែងផងដែរ។

យោងតាមសេចក្ដីប្រកាសព័ត៌មានរបស់ CDC នៅថ្ងៃទី១១ ខែមិថុនា ឆ្នាំ២០២៦ គម្រោងបង្កើតតំបន់សេដ្ឋកិច្ចពិសេសទាំងពីរខាងលើនោះមានទីតាំងស្ថិតនៅក្នុងខេត្ដកំពង់ស្ពឺ ១ គម្រោង និងរាជធានីភ្នំពេញចំនួន ១ គម្រោង។ ដោយនៅក្នុងនោះរួមមាន៖

១. ខេត្ដកំពង់ស្ពឺ៖ គឺជាគម្រោងបង្កើតតំបន់សេដ្ឋកិច្ចពិសេស ដែលមានទីតាំងស្ថិតនៅក្នុងស្រុកភ្នំស្រួច មានទុនវិនិយោគសរុបចំនួន ១១៦ លានដុល្លារ។ ខណៈនៅពេលបើកដំណើរការគម្រោងនេះក៏នឹងបង្កើតឱកាសការងារបានចំនួន ៥១៨ កន្លែងជូនពលរដ្ឋនៅក្នុងតំបន់។

២. រាជធានីភ្នំពេញ៖ គឺជាគម្រោងបង្កើតតំបន់សេដ្ឋកិច្ចពិសេសសួនឌីជីថលកម្ពុជា មានទីតាំងស្ថិតនៅខណ្ឌជ្រោយចង្វារ។ គម្រោងនេះមានទុនវិនិយោគសរុបចំនួន និងអាចបង្កើតឱកាសការងារបានចំនួន ២០៨០ កន្លែងជូនប្រជាពលរដ្ឋផងដែរនៅពេលដាក់ឲ្យដំណើរការ។ 

បើតាមរបាយការណ៍របស់ CDC នៅក្នុង ១ ខែឧសភា ឆ្នាំ២០២៦ កម្ពុជាទទួលបានគម្រោងវិនិយោគសរុបចំនួន ៣៧ ដែលមានទុនវិនិយោគសរុបប្រមាណ៥៧០លានដុល្លារអាមេរិក និងអាចបង្កើតការងារបានប្រមាណ ២៦ ពាន់កន្លែងឯណោះ៕