ក្នុងយុគសម័យបច្ចេកវិទ្យាដ៏ជឿនលឿននេះ ការផលិតវីដេអូរកលុយនៅលើ Facebook គឺជាវិធីសាស្រ្ដរកចំណូលដ៏ពេញនិយមបំផុតមួយនៅក្នុងប្រទេសកម្ពុជានិងក្រៅប្រទេសផងដែរ​ ខណៈក្នុងនោះក៏មានអ្នកខ្លះអាចរកចំណូលបានដល់ខ្ទង់ពាន់ ខ្ទង់ម៉ឺនដុល្លារក្នុងមួយខែក៏មានដែរ។ ឃើញតែគេរកលុយពីហ្វេសប៊ុក ប្រិយមិត្តអ្នកអានមានដឹងអត់ថាក្នុងឆ្នាំ២០២៦ នេះតើ Facebook មានគោលការណ៍ថ្មីអាប់ដេតអ្វីខ្លះហើយចំនួនលុយដែលផ្តល់ឱ្យចំនួនប៉ុន្មានដែរ?

ជាក់ស្តែង កាលពីថ្មីៗនេះ Facebook ទើបតែបង្ហាញពីកម្មវិធីថ្មីគឺ Creator Fast Track ដែលជាគំនិតផ្ដួចផ្ដើមថ្មីរបស់ Meta (Facebook) ក្នុងឆ្នាំ ២០២៦ ក្នុងគោលបំណងទាក់ទាញអ្នកដែលមានអ្នកតាមដាន (Followers) ច្រើនស្រាប់ពី Platform ផ្សេងៗដូចជា TikTok, YouTube ឬ Instagram ឱ្យមកពង្រីកខ្លួននៅលើ Facebook វិញ។

ជាមួយគ្នានោះដែរ សម្រាប់ប្រាក់ចំណូលដែលផលិតមាតិកាអាចទទួលបានពី Facebook ផ្ដល់ឱ្យគឺអាស្រ័យលើចំនួន Follower ដែលអ្នកមានលើ Instagram, TikTok ឬ YouTube ចាប់ពី ១០០០០០ នាក់ឡើងទៅនឹងទទួលបាន ១ពាន់ដុល្លារក្នុងមួយខែនិងចាប់ពី ១០០០០០០ នាក់ឡើងទៅនិងទទួលបាន ៣ពាន់ដុល្លារក្នុងមួយខែ។

យ៉ាងណាមិញ ដើម្បីទទួលបានការទូទាត់ប្រាក់ប្រចាំខែ អ្នកត្រូវអនុវត្តតាមលក្ខខណ្ឌងាយៗដូចជាត្រូវបង្ហោះវីដេអូ Reels យ៉ាងតិច ១៥ វីដេអូ ក្នុងរយៈពេល ៣០ ថ្ងៃហើយវីដេអូទាំងនោះត្រូវបង្ហោះចែកដាច់ពីគ្នា រយៈពេលយ៉ាងតិច ១០ ថ្ងៃខុសៗគ្នា ក្នុងមួយខែ មាតិកាត្រូវតែជាស្នាដៃដើមរបស់អ្នកមិនថាមាតិកានោះធ្លាប់បង្ហោះនៅ TikTok ឬ YouTube ក៏ដោយ។

ដើម្បីបានចូលទៅកាន់កម្មវិធីមួយនេះយើងអាចឆែកមើល និងដាក់ពាក្យដោយដំបូងចូលទៅកាន់ Professional Dashboard នៅលើ App Facebook របស់អ្នកហើយស្វែងរកពាក្យ Tab Monetization បន្ទាប់មកជ្រើសរើសយក Content Monetization រួចស្វែងរក Interest Form ដើម្បីបំពេញព័ត៌មានបង្ហាញពីការចាប់អារម្មណ៍របស់អ្នក។

គួរបញ្ជាក់ថា ទោះបីជាការធានាប្រាក់ចំណូលមានរយៈពេលតែ ៣ខែពិតមែន ប៉ុន្តែបន្ទាប់ពីនោះ អ្នកនៅតែអាចបន្តរកលុយបានតាមរយៈ Ads on Reels, In-stream Ads និង Performance Bonus ជាធម្មតា។ បើអ្នកមាន Fan ច្រើនលើ TikTok ឬYouTube ហើយ គ្រាន់តែយកវីដេអូដដែលមកផុសលើ Facebook Reels (បែប Clean) ក៏អាចស៊ីប្រាក់ខែរាប់ពាន់ពី Facebook បានដែរ៕