ដោយមើលឃើញ យុវជនភាគច្រើនកំពុងឈ្លក់វង្វេងជាមួយសម័យយុគបច្ចេកវិទ្យា សប្បាយភ្លើតភ្លើនភ្លេចខ្លួន ខ្លាចាស់ភាគខាងត្បូងមហាសេដ្ឋី លី កាស៊ីង (Li Ka-shing) មានក្តីបារម្ភជាពន់ពេក និងផ្តាំឲ្យយុវជនធ្វើរឿងធំមួយជាបន្ទាន់ បើចង់ចេញរកស៊ីបានលឿនកុំគិតតែនាំគ្នាផឹកស៊ី។
លោក លី កាស៊ីង បានថ្លែងប្រាប់សារព័ត៌មាន South China Morning Post យ៉ាងដូច្នេះថា៖ «រឿងបន្ទាន់ដែលយុវជនត្រូវធ្វើឥឡូវនេះ គឺការវិនិយោគលើចំណេះដឹងឲ្យបានច្រើនបំផុតតាមដែលអាចធ្វើទៅបាន»។ កាលពីកុមារភាព លោករៀនពុំបានខ្ពស់ទេ ព្រោះតែជីវភាពបង្ខំ គ្មានលុយរៀននឹងគេ។ តែទោះស្ថិតក្នុងគ្រាលំបាកក្តី លោកបានយកលុយដែលខ្លួនខំធ្វើការ ទៅទិញសៀវភៅមួយទឹកដើម្បីអាន និងតែងធ្វើបែបនេះរហូតសន្សំសៀវភៅពេញបន្ទប់។
ដោយសារការវិនិយោគលើចំណេះដឹងនេះហើយ បានធ្វើឲ្យលោក លី កាស៊ីង ទោះកើតក្នុងគ្រួសារក្រក្តី និងធ្លាប់ឆ្លងកាត់សម័យសង្រ្គាម ក៏លោកអាចចេញចាប់ផ្តើមក្តីស្រមៃបានលឿនជាងក្មេងដទៃ។ ត្រឹមវ័យ១៩ឆ្នាំប៉ុណ្ណោះ លោកបានចាប់ផ្តើមអាជីវកម្មទីមួយ ដោយធ្វើបណ្តើរឆ្លៀតរៀនពីវិស័យដែលខ្លួនកំពុងរកស៊ីបណ្តើរ។ លោកទិញទស្សនាវដ្តីអានពីការផលិតប្លាស្ទិកនិងអនាគតនៃវិស័យមួយនេះ រហូតលោកក្លាយជាសហគ្រិនទី១ ដែលយល់ពីវិស័យនេះបានច្បាស់ហើយលេចធ្លោជាងគេបំផុតនៅអាស៊ី។
គួរជម្រាបផងដែរថា លោក លី កាស៊ីង ជាសហគ្រិនគំរូ និងល្បីល្បាញមួយរូបរបស់អាស៊ី ដោយបានជប់ភាពជោគជ័យរបស់ខ្លួនចេញពីភាពក្រីក្រ មានស្មារតីខំប្រឹងធ្វើការយ៉ាងខ្លាំងក្លា តាំងពីក្មេងរហូតដល់ពេលលោកចូលនិវត្តន៍នៅអាយុ៩០ឆ្នាំ។ បុរសម្នាក់នេះ ធ្លាប់បានប្រាប់សារពត៌មានថា តាំងពីក្មេងមក ខ្លួនធ្វើការមិនតិចជាង១៦ម៉ោងទេក្នុង១ថ្ងៃ និងធ្វើការ៧ថ្ងៃក្នុង១សប្តាហ៍គ្មានឈប់ទ្បើយ រហូតដល់អាយុ៨៩ឆ្នាំឯណោះ៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ 
បញ្ជាទិញតាម https://t.me/BusinessCambodiaBook
