តាមការស្រាវជ្រាវបង្ហាញថា អ្នកគ្រប់គ្រងអាចដោះស្រាយបញ្ហានេះតាមរយៈការលើកកម្ពស់ និងបណ្តុះបណ្តាលសមត្ថភាពជាក្រុមឲ្យខ្លាំង ផ្តល់រង្វាន់ជាក្រុម មិនមែនផ្តោត ឬផ្តល់ផលប្រយោជន៍ត្រឹមបុគ្គលនោះទេ។ ការស្ទង់មតិក្នុងឆ្នាំ២០១៩ ដោយ សង្គមសម្រាប់ការគ្រប់គ្រងធនធានមនុស្ស (SHRM) បានរកឃើញថា ៥៨% នៃបុគ្គលិកដែលលាឈប់ពីការងារដោយសារតែវប្បធម៌គ្មានតម្លាភាពរបស់ថៅកែ ឬអ្នកគ្រប់គ្រងរបស់ពួកគេ។

២/. បន្ថយ​ការ​ធ្វើ​ទុក្ខ​បុកម្នេញ

អ្នកវិទ្យាសាស្ត្រខាងការយល់ដឹង Art Markman ចែករំលែកបច្ចេកទេសជាច្រើនសម្រាប់ ការកាត់បន្ថយការគំរាមកំហែងនៅកន្លែងការងារ។ លោកបានលើកឡើងថា ក្នុងនាមជាអ្នកដឹកនាំត្រូវហ៊ានប្រើសិទ្ធកក់ហៅបុគ្គលដែលបំពានលើអ្នកដទៃនៅកន្លែងធ្វើការដើម្បីមកណែនាំ និងតាមដានបុគ្គលនោះបន្ទាប់ពីកិច្ចប្រជុំចប់។ បុគ្គលិកត្រូវការជំនួយពីអ្នក ដូច្នេះអ្នកមិនគួរឈរឱបដៃមើលពីទុក្ខលំបាករបស់ពួកគេនៅនឹងភ្នែកបានឡើយ ដូចមហាវីរក្សត្រខ្មែរ ព្រះបាទ​ជ័យវរ្ម័ន​ទី​៧ ព្រះអង្គ​ប្រកាន់​ទស្សនៈ​ថា​៖ «​ទុក្ខ​របស់​ប្រជារាស្ត្រ ជា​ទុក្ខ​របស់​ព្រះអង្គ​»​។

៣/. បង្កើតបរិយាកាសសុវត្ថិភាព

លោកសាស្ត្រាចារ្យ Jason Walker នៃសាកលវិទ្យាល័យ Adler បានលើកឡើងថា ក្រុមហ៊ុនត្រូវតែប្តេជ្ញាចិត្តក្នុងការជំរុញបរិយាកាសសុវត្ថិភាពនៅកន្លែងការងារ តាមរយៈការបង្កើតគោលនយោបាយប្រឆាំងនឹងការគំរាមកំហែង ឬបៀតបៀន និងការជំរុញទំនាក់ទំនងបើកចំហ ដែលលើកកម្ពស់ដល់សុខុមាលភាព និងផលិតភាពរបស់បុគ្គលិក។

យ៉ាងណាមិញ ក្នុងសិក្ខាសាលាថ្នាក់តំបន់ស្ដីពី ការងាររបស់ស្ត្រីនៅកន្លែងធ្វើការ កាលពីឆ្នាំ២០១៩ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍ថា អំពើហិង្សា និងការបៀតបៀននៅកន្លែងការងារ គឺជាកត្តារាំងស្ទះដល់ផលិតភាពការងារ និងសុខុមាលភាពរបស់កម្មករនិយោជិត។ ដូច្នេះសូមចូលរួមលុបបំបាត់ និងកាត់បន្ថយទាំងអស់គ្នាតាមដែលអាចធ្វើទៅបាន៕