ក្មេងៗធំធាត់ឡើងក្នុងសម័យយុគឌីជីថល ងាយត្រូវបានអូសទាញដោយការកម្សាន្តផ្សេងៗ ហើយធ្វើឲ្យពួកគេភ្លើតភ្លើន ខ្ជិលច្រអូស និងលែងចង់រៀនសូត្រ។ ដូច្នេះក្នុងនាមជាឪពុកម្តាយ បើប្រើការលួងលោមអប់រំកូនលែងស្តាប់ហើយ ត្រូវហ៊ានប្រើធម៌ក្តៅ ៣ ខាងក្រោមនេះ ដើម្បីតម្រង់ទិសកូនឲ្យមានអនាគតល្អ៖

១/. កាត់ផ្តាច់ការកម្សាន្ត និងរបស់របរមិនចាំបាច់៖ ប្រសិនបើកូនមិនខំរៀន ត្រូវដកហូតទូរស័ព្ទ កាត់អ៊ីនធឺណិត បញ្ឈប់ការទិញរបស់លេង និងកាត់បន្ថយលុយចាយវាយមកនៅកម្រិតទាបបំផុត។ ការធ្វើបែបនេះដើម្បីឲ្យកូនដឹងថា ភាពសុខស្រួល និងការកម្សាន្តពុំមែនបានមកដោយទទេៗឡើយ វាគឺជារង្វាន់ផ្អែកលើការខិតខំប្រឹងប្រែងរៀនសូត្រ។

២/. បង្រៀនឲ្យស្គាល់រសជាតិនៃការលំបាក៖ នៅពេលកូនរអ៊ូថារៀនហត់ ក្នុងថ្ងៃចុងសប្តាហ៍ឬវិស្សមកាល នាំកូនទៅធ្វើការងារស្រែចំការ លីសែង លក់ដូរហាលថ្ងៃហាលខ្យល់ ឬការងារផ្ទះធ្ងន់ៗតាំងពីព្រលឹមទល់ព្រលប់។ ការធ្វើបែបនេះដើម្បីឲ្យកូនយល់ច្បាស់តាមបទពិសោធន៍ពិតថា បើពេលនេះខ្ជិលរៀនសូត្រ ថ្ងៃអនាគតនឹងត្រូវធ្វើការហត់នឿយជាងការរៀនរាប់រយដង។

៣/. អនុវត្តវិន័យផ្ទះយ៉ាងម៉ឺងម៉ាត់ ដោយគ្មានការយោគយល់៖ បង្កើតច្បាប់ និងម៉ោងសិក្សាឲ្យច្បាស់លាស់។ បើកូនល្មើសច្បាប់ ត្រូវដាក់ទណ្ឌកម្មភ្លាមៗ ដូចជា សម្អាតផ្ទះ ឬកាត់ប្រាក់ខែ ដាច់ខាតមិនត្រូវចិត្តទន់តាមការយំសម្រក់ទឹកភ្នែករបស់កូនឡើយ។ វានឹងបង្រៀនកូនឲ្យស្គាល់ពី ការទទួលខុសត្រូវ និងដឹងថា រាល់ការល្មើសវិន័យតែងតែមានផលវិបាក។

យ៉ាងណាមិញ ចូរប្រើធម៌ក្តៅទាំងនេះដោយក្តីស្រឡាញ់ និងស្មារតីច្បាស់លាស់ មិនមែនដោយសារកំហឹងឡើយ។ ហាមដាច់ខាតការវាយដំ ឬជេរប្រមាថដែលអាចធ្វើឲ្យកូនគុំកួន។ នៅពេលកូនដឹងកំហុស ឪពុកម្តាយត្រូវឱបកូន និងពន្យល់ហេតុផលឡើងវិញដោយភាពកក់ក្តៅ៕

អត្ថបទដោយ៖ កាន់ ដារ៉ា (ម្ចាស់ស្នាដៃសៀវភៅ បុគ្គលិកឆ្នើម)

• សម្រាប់បុគ្គលិកដែលចង់បាន ចំណូលកើន ឡើងតួនាទីលឿន
• ម្ចាស់អាជីវកម្មដែលចង់កសាងក្រុមការងារដែកថែបបង្កើតលទ្ធផលខ្ពស់
• យើងសូមណែនាំសៀវភៅ «បុគ្គលិកឆ្នើម» តម្លៃពេញ ១២$ បើកក់ឥឡូវនេះតម្លៃត្រឹមតែ ១០$ ប៉ុណ្ណោះ។   បញ្ជាទិញតាម https://t.me/BusinessCambodiaBook