មកដឹងអំពី ព្រះរាជជីវប្រវត្តិនិងស្នាព្រហស្ថរបស់ សម្ដេចព្រះ​អគ្គ​មហា​សង្ឃ​រាជនៃកម្ពុជា ទេព វង្ស
Ping Chou EngFEBRUARY 26 20242.4 K views

សម្តេចព្រះមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស ប្រសូតនៅថ្ងៃទី១២ ខែមករា ឆ្នាំ១៩៣២ នៅ​ភូមិ​ត្រពាំង​ឈូក ស្ថិតក្នុង​ឃុំ​ជ្រាវ ស្រុកប្រាសាទបាគង ខេត្តសៀមរាប​ ដោយមានបិតា​នាម ទេព ឈិ​ត និង​មាតា​នាម ប៉ិច អាត់​។

 

សម្ដេចព្រះ​អគ្គ​មហា​សង្ឃ​រាជនៃកម្ពុជា ទេព វង្ស គឺជាសម្តេចព្រះសង្ឃខ្មែរមួយអង្គ ដែលត្រូវបានគេស្គាល់ថា ព្រះអង្គបានមានស្នាព្រហស្ថ ក្នុងការបង្កើតគណៈសង្ឃកម្ពុជាឡើងវិញក្រោយសម័យកម្ពុជាប្រជាធិតេយ្យ។

 

 

កាលពីព្រះជន្ម​បាន​១០​វស្សា ក្នុងឆ្នាំ១៩៤១ សម្តេចត្រូវបាន​មាតាបិតា​បញ្ជូន​ឲ្យ​ទៅ​សិក្សា​អក្សរសាស្ត្រ និង​គណិត​សាស្ត្រ​នៅ​វត្ត​រាជ​បូព៌ ស្ថិតក្នុងខេត្តសៀមរាប។ លុះដល់ព្រះ​ជន្មាយុ​១៦​វស្សា សម្ដេច​បាន​បួស​ជា​សាមណេរ​ក្នុង​សំណាក់​ព្រះ​ឧបជ្ឈាយ៍ ព្រះ​សមុហ៍​គណ ហ៊ីង ម៉ៅ ​ជា​ព្រះចៅអធិការ​វត្ត​រាជ​បូព៌ ប៉ុន្តែការ​បួស​ជា​សាមណេរ​នេះ​បានត្រឹមតែរយៈពេល​៩​ខែ​ទេ ក៏សូម​លាចាក​សិក្ខាបទ មករក​ស៊ី​ចិញ្ចឹម​ព្រះ​មាតា​បិតាវិញ​។​

 

នៅឆ្នាំ​១៩៥២ នៅពេល​ដែលមាន​ព្រះជន្ម​២១​វស្សា សម្ដេច​បាន​បំពេញ​ឧបសម្បទា​ជា​ភិក្ខុ​ក្នុង​សំណាក់​ព្រះ​ឧបជ្ឈាយ៍​ព្រះ​សមុហ៍​គណ ហ៊ីង ម៉ៅ។ រហូតដល់ព្រះជន្ម​បាន​២៥​វស្សា ព្រះគ្រូ​សមុហ៍​គណ ហ៊ីង ម៉ៅ បានតែងតាំង​ភិក្ខុ ទេព វង្ស ឲ្យ​ធ្វើជា​គ្រូសូត្រ​ជំនួយការ​។​

 

ក្រៅអំពីការសិក្សា​អក្សរសាស្ត្រ និង​គណិត​សាស្ត្រ​ ព្រះអង្គ​បានបញ្ចប់​ការសិក្សា​ធម្ម​វិន័យ​ទាំងបី​កម្រិត គឺ​ថ្នាក់​ត្រី​ទោ​ឯក​  ​ព្រះអង្គ​ចេះ​សូធ្យ​វិន័យ​បាដិមោក្ខ​យ៉ាង​ស្ទាត់ជំនាញនិង​មាន​ជំនាញ​ខាង​បង្ហាត់​វិបស្សនាធុរៈ និនិងសមថកម្មដ្ឋានផងដែរ។ 

 

​ក្នុងសម័យ​ខ្មែរក្រហម ចាប់ពី​ឆ្នាំ​១៩៧៥ ដល់​១៩៧៩ សម្ដេច​ត្រូវបាន​គេ​បង្ខំ​ឲ្យ​សឹក និង​ត្រូវបាន​គេ​ធ្វើ​ទារុណកម្ម​យ៉ាងធ្ងន់ធ្ងរ​ដូច​  ប្រជាជន​ស្លូតត្រង់​ខ្មែរ​ដទៃទៀត​ដែរ​នាសម័យនោះ។

 

ព្រះ​ជន្មាយុ​បាន​៤៨​វស្សា នៅពេល​ប្រជាជន​ខ្មែរ បាន​រួច​ផុតពី​របប​ខ្មែរក្រហម ព្រះអង្គ​បាន​និមន្ត​បួស​ឡើងវិញ នៅ​ថ្ងៃទី ​១៩ ខែកញ្ញា ឆ្នាំ​១៩៧៩ និងមាន​ឋានៈជាព្រះគ្រូ​វិន័យធរ ក្នុងវត្ត​ឧណ្ណាលោម ក្រុងភ្នំពេញ។

 

ចំពោះព្រះ​សមណស័ក្ដិ សម្ដេច​ត្រូវបាន​ថ្វាយ​ងារ​ជា ព្រះមហា​សុមេធាធិបតី និង​ជា​សង្ឃនាយក ដោយ​សម្ដេច ជា ស៊ីម ប្រធាន​ក្រុមប្រឹក្សារដ្ឋ​កម្ពុជាក្នុងឆ្នាំ ១៩៩១។ នៅឆ្នាំដដែលសម្តេច​ត្រូវបានតែងតាំង​ជា​សម្ដេចព្រះសង្ឃរាជ គណៈមហានិកាយ​នៃ​កម្ពុជា ដោយ​ព្រះរាជក្រឹត្យ​ ព្រះករុណា ព្រះបាទ សម្ដេចព្រះ ន​រោ​ត្ដម សីហនុ ជា​ព្រះប្រមុខរដ្ឋ និង​ជា​ព្រះប្រធាន​ក្រុមប្រឹក្សា​ជាតិ​ជាន់ខ្ពស់​។

 

លុះដល់ឆ្នាំ​២០០៦ សម្ដេច​ត្រូវបានតែងតាំង​ជា សម្ដេចព្រះ​អគ្គ​មហា​សង្ឃ​រាជាធិបតី សម្ដេច​មហាសង្ឃរាជ នៃ​ព្រះរាជាណាចក្រ​កម្ពុជា ដោយ​ព្រះករុណា​ព្រះបាទ សម្ដេចព្រះ​បរមនាថ ន​រោ​ត្ដម សីហមុនី និង​បានទទួល​ព្រះ​រាជានុញ្ញាត​ពី​សំណាក់​ព្រះករុណា​ព្រះបាទ​សម្ដេចព្រះ ន​រោ​ត្ដម សីហមុនី ឲ្យ​ប្រើ​រាជ​ស័ព្ទ និង​ផ្លិត​យស​ពិសេស​។

 

429580587 948700703312153 98178672538778156 N

 

គួរបញ្ជាក់ថាសម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា បានយាងសោយព្រះទិវង្គត នៅវេលាម៉ោង ៥ និង ៤០ នាទីល្ងាច នៅថ្ងៃច័ន្ទ ទី២៦ ខែកុម្ភៈ ឆ្នាំ២០២៤នេះ ក្នុងព្រះជន្មាយុ ៩៣ព្រះវស្សា នាព្រះវិហារវត្តឧណ្ណាលោម៕

 

 

អត្ថបទពេញនិយមប្រចាំខែ
អត្ថបទថ្មីៗ
Footer Background
Business Cambodia
បំផុសគំនិតរកស៊ី នាំមនុស្សឱ្យហ៊ានចេញរកស៊ីតាមក្ដីស្រមៃ
© 2024 Baksey Media. All Rights Reserved.
Developed by: Technology Cambodia