អក្សរខ្មែរបានធ្វើទំនើបកម្មតាំងពីឆ្លាក់លើផ្ទាំងសិលា ចាលើស្លឹករឹត សរសេរដោយដៃលើផ្ទាំងក្រដាស រហូតផ្លាស់មកវាយតាមអង្គុលីលេខ និងមានអក្សរយូនីកូដខ្មែរក្នុងឧបករណ៍អេឡិចត្រនិចសឹងគ្រប់ប្រភេទ។ ចុះតើអ្នកដឹងទេ ក្នុងបដិវត្តន៍ដ៏អស្ចារ្យនេះ លោកបណ្ឌិត កេង វ៉ាន់សាក់ គឺជាស្ថាបនិក អង្គុលីលេខខ្មែរដំបូងគេ និងលោក ដាញ់ ហុង គឺជាអ្នកបង្កើតហ្វុនអក្សរយូនីកូដខ្មែរ ដែលទុកឲ្យយើងប្រើប្រាស់ដល់សព្វថ្ងៃនេះ។
១/. លោកកបណ្ឌិត កេង វ៉ាន់សាក់
លោកបណ្ឌិត គឺជាអ្នកបង្កើតពុម្ពអក្សរខ្មែរសម្រាប់ប្រើក្នុងម៉ាស៊ីនអង្គុលីលេខ និងជាកវីនិពន្ធអក្សរសាស្រ្ដខ្មែរដ៏ល្បីល្បាញ ដោយធ្លាប់បាននិពន្ធសៀវភៅស្រាវជ្រាវវប្បធម៌ អក្សរសាស្ត្រ រឿងល្ខោន កំណាព្យ និងរឿងខ្លីៗ តាំងពីទសវត្សរ៍ឆ្នាំ ១៩៤០ មកម្ល៉េះ។
លោកប្រសូតនៅថ្ងៃទី១៩ ខែកញ្ញា ឆ្នាំ១៩២៥ ដែលមានមាតាឈ្មោះ ហម អ្នកខេត្តពោធិ៍សាត់ ជាប់សែស្រឡាយជាញាតិវង្សទៅនឹងម្ចាស់ក្សត្រីមល្លីកា ព្រះមហេសីនៃព្រះអង្គម្ចាស់ នរោត្ដម យុគន្ធរ និងមានបិតាឈ្មោះ កេង ស៊ីផាន់ អ្នកខេត្តកំពង់ចាម មានវ័យចម្រើនធំធាត់នៅក្នុងភូមិកំពង់បឹង ស្រុកកំពង់លែង នៃខេត្តកំពង់ឆ្នាំង។
ក្នុងដំណើរជីវិតដ៏វែងអន្លាយលោកបណ្ឌិត កេង វ៉ាន់សាក់ តែងបានចូលប្រឡូកនឹងការប្រែប្រួលរបស់ប្រទេសជាតិសឹងតែគ្រប់ចលនា ដោយរួមទាំងចលនានយោបាយក្នុងសម័យទាមទារឯករាជ្យ រួមទាំងចលនាអក្សរសាស្រ្ដខ្មែរជាដើម។ លោកបណ្ឌិតសាស្រ្តាចារ្យ បានទទួលមរណភាពដោយសារជំងឺទឹកចូលសួតកាលពីថ្ងៃទី១៨ ខែធ្នូ ឆ្នាំ២០០៨។
២/. លោក ដាញ់ ហុង
លោកគឺជាស្ថាបនិកពុម្ព ឬ Font អក្សរខ្មែរ (Khmer Unicode) ដែលយើងទាំងអស់គ្នាប្រើរាល់ថ្ងៃ ហើយក៏ជាអ្នកមានស្នាដៃជាច្រើន ជាពិសេសគឺពុម្ភអក្សរខ្មែរដែលត្រូវបានទទួលស្គាល់ដោយ Google និងបានដាក់ឲ្យប្រើប្រាស់ជាពុម្ពអក្សរខ្មែរប្រចាំនៅលើ Google Font។
លោក ដាញ់ ហុង កើតក្នុងឆ្នាំ១៩៧២ នៃគ្រួសារកសិករខ្មែរក្រោមមួយ នាខេត្តពលលាវ នៃដែនដីកម្ពុជាក្រោម ឬ ខាងត្បូងប្រទេសវៀតណាមសព្វថ្ងៃ។ លុះចម្រើនវ័យធំដឹងក្តី ក្រោយពីប្រលងបញ្ចប់សញ្ញាបត្របាក់ឌុបនៅឆ្នាំ១៩៩១ លោកត្រូវទៅបន្តការសិក្សាកម្រិតបរិញ្ញាបត្រ នៅសាកលវិទ្យាល័យច្បាប់ និងបានបញ្ចប់បរិញ្ញាបត្រច្បាប់នៅឆ្នាំ១៩៩៧ នាទីក្រុងព្រៃនគរ ដែលបច្ចុប្បន្នមានឈ្មោះថា ទីក្រុងហូជីមិញ។
ក្រោយឆ្លងកាត់ការងារជាច្រើនកន្លែង និងកំពុងបម្រើការងារផ្នែកវចនានុក្រមនៅប្រទេសវៀតណាម លោកបានទទួលព័ត៌មានតាមប្រព័ន្ធអ៉ីនធើណេត ក្នុងការរើសបុគ្គលិកផ្នែករចនា និងបង្កើតអក្សររបស់មជ្ឈមណ្ឌលខេមរសិក្សារបស់អាមេរិកប្រចាំនៅខេត្តសៀមរាប។
រយៈពេលបីឆ្នាំ ចាប់ពីឆ្នាំ២០០០ ដល់ឆ្នាំ ២០០៣ ដែលបម្រើការនៅទីនោះ លោកបានស្គាល់ជាមួយបុរស ជនជាតិអេស្ប៉ាញកម្រិតអនុបណ្ឌិត ផ្នែកវិទ្យាសាស្ត្រកុំព្យូទ័រម្នាក់ ហើយពួកគេក៏មូលមតិគ្នាបង្កើតគម្រោង Khmer OS ស្នើទៅអង្គការ Open Forum នៅឆ្នាំ២០០៣ តែរហូតដល់ឆ្នាំ២០០៤ ទើបខាងអង្គការសម្រេចទទួល។ មិនតែប៉ុណ្ណោះ កាលពីពេលថ្មីៗនេះ លោកបានបង្ហាញសមិទ្ធផលថ្មីមួយទៀតគឺ កម្មវិធីពិនិត្យ និងកែអក្ខរាវិរុទ្ធខ្មែរ បានរាប់រយពាក្យថែមទៀតផង៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
