ក្រុមហ៊ុន ជីប ម៉ុង ក្នុងនាមជាសហគ្រាសក្នុងស្រុកដែលកើតចេញពីដំណក់ញើសឈាមរបស់សហគ្រិនខ្មែរ តែងតែប្រកាន់ខ្ជាប់នូវគំនិតផ្តួចផ្តើម និងសកម្មភាពសង្គមជាចម្បង ដោយមិនដែលមើលរំលងការលះបង់របស់បងប្អូនប្រជាពលរដ្ឋនោះឡើយ។
ថ្ងៃនេះ ក្រុមហ៊ុនពិតជាមានមោទនភាព និងសោមនស្សរីករាយយ៉ាងក្រៃលែង ដែលបានចាប់ដៃគូសហការយ៉ាងជិតស្និទ្ធជាមួយកីឡាករប្រដាល់ និង KOLs ដ៏មានប្រជាប្រិយភាព ដើម្បីនាំយកអំណោយផ្ទាល់ដៃ ចូលរួមចំណែកក្នុងការសាងសង់លំនៅឋានចំនួន ១០០ខ្នង ជូនដល់បងប្អូនអតីតយុទ្ធជនក្នុងខេត្តបាត់ដំបង់។
សកម្មភាពមនុស្សធម៌នេះ ត្រូវបានរៀបចំឡើងក្រោមអធិបតីភាពដ៏ខ្ពង់ខ្ពស់របស់ ឯកឧត្តមកិត្តិសង្គហបណ្ឌិត គន់ គីម តំណាងដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ដើម្បីស្តែងចេញពីការដឹងគុណយ៉ាងជ្រាលជ្រៅចំពោះវីរជនដែលបានលះបង់សាច់ស្រស់ ឈាមស្រស់ ក្នុងការការពារទឹកដី ក្រុមហ៊ុន ជីប ម៉ុង បានបរិច្ចាគថវិកា ផ្ទះ និងសម្ភារៈប្រើប្រាស់ចាំបាច់ប្រចាំថ្ងៃ សរុបជាទឹកប្រាក់ចំនួន ២,២០០,០០០,០០០ រៀល (២.២ ពាន់លានរៀល) ដែលនឹងត្រូវប្រគល់ជូនបងប្អូនអតីតយុទ្ធជនដោយផ្ទាល់ នៅថ្ងៃទី២០ ខែសីហា ខាងមុខនេះ។
ជីប ម៉ុង ជឿជាក់យ៉ាងមុតមាំថា ដំបូលផ្ទះថ្មីនីមួយៗ មិនត្រឹមតែជាជម្រកការពារកម្តៅថ្ងៃនិងទឹកភ្លៀងប៉ុណ្ណោះទេ ប៉ុន្តែគឺជាការផ្តល់នូវសេចក្តីសង្ឃឹម ភាពកក់ក្តៅ និងស្នាមញញឹមជាថ្មីជូនដល់គ្រួសារវីរជនកម្ពុជា។
