សម្រាប់បងប្អូនដែលមានអត្តសញ្ញាណបណ្ណសញ្ជាតិខ្មែរ ដែលហួសសុពលភាពយូរ ក៏អាចមកធ្វើបានដែរ ដោយមិនគិតកម្រៃសេវា ហើយក៏គ្មានការផាកពិន័យណាមួយដែរ ដូច្នេះបងប្អូនអាចទៅបំពេញបែបបទធ្វើឱ្យបានគ្រប់ៗគ្នាផងដែរ។

ជាក់ស្តែង យោងតាមការលើកឡើងរបស់ ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានបញ្ជាក់ច្បាស់ៗពាក់ព័ន្ធនឹង អត្តសញ្ញាណបណ្ណសញ្ជាតិខ្មែរដែលផុតសពុលភាព គឺមិនមានការផាកពិន័យនោះទេ។ ហើយសម្រាប់ពលរដ្ឋដែលមានអត្តសណ្ណាបណ្ណខ្មែរផុតសុពលភាព ឬមានសុពលភាពតិចជាង ១៨០ថ្ងៃ បើចង់ធ្វើថ្មីត្រូវមានឯកសារភ្ជាប់ដូចខាងក្រោមនេះ៖

១. អត្តសណ្ណាណប័ណ្ណសញ្ជាតិខ្មែរ ដែលផុតសុពលភាពឬមានសុពលភាពតិចជាង ១៨០ថ្ងៃ

២. ករណីមានការផ្លាស់ប្តូរអាសយដ្ឋាន ត្រូវភ្ជាប់មកជាមួយសៀវភៅស្នាក់នៅ ឬសៀវភៅគ្រួសារ (ច្បាប់ដើម ឬច្បាប់ចម្លងមានបញ្ជាក់ត្រឹមត្រូវតាមច្បាប់ដើម ឬលិខិតបញ្ជាក់ទីលំនៅនៃអាសយដ្ឋានថ្មីៗ។

ក្នុងនោះទីតាំងផ្តល់សេវាអត្តសញ្ញាណបណ្ណសញ្ជាតិខ្មែរ មានច្រើនជម្រើសសម្រាប់ពលរដ្ឋជ្រើសរើសទៅធ្វើ ដូចជា ប៉ុស្តិ៍នគរបាល ឬអធិការដ្ឋាន ឬស្នងការដ្ឋាននគរបាល នៃទីលំនៅអចិន្ត្រៃយ៍ ដោយពុំចាំបាច់ទៅកាន់ទីស្នាក់ការអ៉ីអន ឬនាយកដ្ឋានទេ។

គួរបញ្ជាក់ថា ករណីមិនមានការកែតម្រូវទិន្នន័យឬផ្លាស់ប្តូរអាសយដ្ឋានលើសន្លឹកអត្តសញ្ញាណប័ណ្ណ សញ្ជាតិខ្មែរ មន្ត្រីមានសមត្ថកិច្ចមិនត្រូវទាមទារឯកសារបន្ថែមផ្សេងទៀតឡើយ (លើកលែងតែករណីសង្ស័យថា ជននោះជាជនបរទេសដែលកាន់ឯកសាររដ្ឋបាលកម្ពុជាមិនប្រក្រតី ឬពុំមានឯកសារសម្អាងច្បាស់លាស់ថាជាពលរដ្ឋខ្មែរ៕