បន្តិចទៀតលែងពិបាកទៅដាក់ឯកសាររដ្ឋបាលនានាដល់ អគ្គនាយកដ្ឋានពន្ធដារ ឬសាខាពន្ធដារទៀតហើយ ខណៈនៅពេលឆាប់ៗខាងមុខនេះ អគ្គនាយកដ្ឋានពន្ធដារនឹងដាក់ដំណើរការនូវកម្មវិធីថ្មីមួយដែលមានឈ្មោះថា រដ្ឋបាលអេឡិចត្រូនិច (GDT e-Administration) ដែលអាចដាក់ឯកសាររដ្ឋបាលបានតាមអនឡាញ មិនពិបាកទៅដល់កន្លែង។

តាមប្រសាសន៍លើកឡើងរបស់ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រីបានឱ្យដឹងថា តាមរយៈកម្មវិធីថ្មីនេះ នឹងផ្តល់ភាពងាយស្រួលឆាប់រហ័ស ចំណេញពេលវេលា ប្រកបដោយភាពជឿទុកចិត្តលើការផ្តល់សេវាអ្នកជាប់ពន្ធ ក្នុងការដាក់លិខិតរដ្ឋបាលផ្សេងៗទៅអគ្គនាយកដ្ឋានពន្ធដារ ឬសាខាពន្ធដារខេត្ត-ខណ្ឌ ដែលយន្តការនេះគឺបានបង្កើតនូវជម្រើសតាមអនឡាញមិនបាច់ពិបាកក្នុងទៅដាក់ផ្ទាល់នៅអគ្គនាយកដ្ឋានពន្ធដារ ឬសាខាពន្ធដារខណ្ឌ-ខេត្ត។

គួរបញ្ជាក់ផងដែរថា ចំពោះការគ្រោងដាក់បម្រើការកម្មវិធីថ្មីនេះ ក្រៅពីផ្តល់ភាពងាយស្រួលសម្រាប់អ្នករកស៊ីដែលជាអ្នកជាប់ពន្ធទាំងអស់ហើយ វាក៏ផ្នែកមួយចូលរួមឱ្យការប្រមូលពន្ធអាចសម្រេចបានតាមគោលដៅកំណត់សម្រាប់អគ្គនាយកដ្ឋានពន្ធដារថែមទៀតផង៕