ក្រុមហ៊ុន ហ្គាវ សេន ភែកឃីជិង (ខេមបូឌា) ឯ.ក (GAO SEN PACKAGING (CAMBODIA) CO., LTD) បានបោះទុនវិនិយោគ បង្កើតរោងចក្រផលិតសំបកកំប៉ុង និងគម្របកំប៉ុង ពីអាលុយមីញ៉ូម និងដែក ដែលមានទីតាំងស្ថិតនៅក្នុងភូមិអូរតាពូង ឃុំរកាកោះ ស្រុកគងពិសី ខេត្ដកំពង់ស្ពឺ។

តាមការចេញផ្សាយដោយគណៈកម្មាធិការវិនិយោគកម្ពុជា នៅថ្ងៃទី៨ ខែកុម្ភៈ ឆ្នាំ២០២៦ ​បានឲ្យដឹងថា​ គម្រោងរោងចក្រផលិតសំបកកំប៉ុងខាងលើនេះ ត្រូវបានបោះទុនវិនិយោគសរុប ១៨.៧ លានដុល្លារ។ នៅពេលបើកដំណើរការរោងចក្រថ្មីនេះ ក៏អាចបង្កើតឱការងារបានចំនួន ១២៨ នាក់ជូនពលរដ្ឋនៅក្នុងតំបន់ផងដែរ។

សូមជម្រាបថា កាលពីឆ្នាំ ២០២៥ កន្លងទៅនេះ កម្ពុជាមានគម្រោងវិនិយោគសរុប ៦៣០ គម្រោង ក្នុងនោះខេត្ដកំពង់ស្ពឺទទួលបាន ១៤២ គម្រោង ជាខេត្ដទទួលបានគម្រោងវិនិយោគច្រើនជាងគេផងដែរ៕