ស្ថាបនិក និងជានាយកប្រតិបត្តិ នៃកម្មវិធី Telegram ត្រូវបានចាប់ខ្លួនភ្លាមៗនៅប្រទេសបារាំងកាលពីប៉ុន្មានថ្ងៃមុន ខណៈនេះជាបញ្ហាធំៗ៣ ដែល Telegram អាចនឹងប្រឈម យោងតាមការឲ្យដឹងពី WIRED Middle East៖

១/. បញ្ហាក្នុងប្រតិបត្តិការ៖ ការចាប់ខ្លួនលោក Pavel Durov អាចបង្កើតភាពខ្វះចន្លោះនៃភាពជាអ្នកដឹកនាំនៅក្នុងវេទិកា Telegram។ លោកបានចូលរួមយ៉ាងស៊ីជម្រៅក្នុងការគ្រប់គ្រងប្រចាំថ្ងៃ និងដំណើរការធ្វើការសម្រេចចិត្ត។ បើគ្មានការណែនាំរបស់លោក Durov ទេ Telegram អាចប្រឈមមុខនឹងការលំបាកខ្លាំងក្នុងប្រតិបត្តិការ ជាពិសេសក្នុងការគ្រប់គ្រងហិរញ្ញវត្ថុ និងផែនការយុទ្ធសាស្រ្ត។

២/. រដ្ឋាភិបាលតាមដានខ្លាំង (សម្ពាធផ្នែកច្បាប់)៖ វេទិកា Telegram តែងតែមានជម្លោះជាមួយរដ្ឋាភិបាល ជុំវិញករណីឧក្រិដ្ឋកម្ម។ ការចាប់ខ្លួនលោក Durov អាចជំរុញឱ្យរដ្ឋាភិបាលបង្កើនកិច្ចខិតខំប្រឹងប្រែងរបស់ពួកគេក្នុងការគ្រប់គ្រង ឬសូម្បីតែហាមឃាត់វេទិកានេះតែម្តង ជាពិសេសនៅក្នុងប្រទេសដែលវាស្ថិតនៅក្រោមការត្រួតពិនិត្យរួចហើយ។

៣/. បាត់បង់ទំនុកចិត្តពីអ្នកប្រើប្រាស់ និងមានបញ្ហារ៉ាំរ៉ៃ៖ ជាប្រវត្តិសាស្ត្រ ក្រុមហ៊ុនបច្ចេកវិទ្យាដែលស្ថាបនិកប្រឈមមុខនឹងបញ្ហាផ្លូវច្បាប់ ជារឿយៗជួបប្រទះនឹងអស្ថិរភាពក្នុងរយៈពេលខ្លី ប៉ុន្តែអាចងើបឡើងវិញបានប្រសិនបើមានក្រុមគ្រប់គ្រងរឹងមាំ។ តែទោះជាយ៉ាងណា បើស្ថាបនិកមានឥទ្ធិពលខ្លាំងក្នុងក្រុមហ៊ុន ដូចករណីរបស់លោក Durov នោះ វេទិកានេះអាចប្រឈមមុខនឹងបញ្ហារ៉ាំរ៉ៃរយៈពេលវែង។

គួរជម្រាបផងដែរថា ក្រោមការស៊ើបអង្កេតរបស់អាជ្ញាធរបារាំង លោក Pavel Durov ត្រូវបានចោទប្រកាន់ពីបទ មិនបានចាត់វិធានការដើម្បីទប់ស្កាត់ការប្រើប្រាស់ Telegram បែបឧក្រិដ្ឋកម្ម និងបរាជ័យក្នុងការសហការជាមួយការអនុវត្តច្បាប់លើ ការក្លែងបន្លំ អំពើឆបោក ការជួញដូរគ្រឿងញៀន អំពើរំលោភបំពានផ្លូវភេទលើអនីតិជន  និងសកម្មភាពខុសច្បាប់ផ្សេងៗទៀត ខណៈបច្ចុប្បន្នវេទិកានេះ មានអ្នកប្រើប្រាស់ជាប្រចាំរហូតដល់៩០០លាននាក់៕