នៅពេលដែលយើងបើកទូរស័ព្ទដៃ ហើយប្រាកដជាទស្សនាវីដេអូខ្លីៗនៅលើ TikTok ហើយ   មនុស្សភាគច្រើនតែងតែគិតថា កម្មវិធីនេះគ្រាន់តែជាកន្លែងកម្សាន្តសាមញ្ញមួយសម្រាប់ទស្សនាការ រាំ ច្រៀង ឬ ពីមាតិកាប្លែកៗ តែប៉ុណ្ណោះ។ តែកម្មវិធីនេះក៏ក្លាយជាកម្មវិធីដែលមានចូលចិត្ត​ និង គាំទ្រពាសពេញពិភពលោក។

ភាពល្បីល្បាញរបស់ TikTok មិនមែនជាការចៃដន្យនោះទេ ប៉ុន្តែវាជាលទ្ធផលនៃការរៀបចំយុទ្ធសាស្ត្របច្ចេកវិទ្យាដ៏ប៉ិនប្រសប់ ការហ៊ានប្រឡូកចូលទីផ្សារអន្តរជាតិ និងការសម្រេចចិត្តដ៏វៃឆ្លាតរបស់ស្ថាបនិក លោក Zhang Yiming រួមជាមួយក្រុមការងារនៃក្រុមហ៊ុន ByteDance។ តើដំណើររឿងពិតប្រាកដនៃការបង្កើត TikTok មានរឿងអ្វីខ្លះ? ​ខាងក្រោមនេះជារបៀបដែល CEO ម្នាក់នេះអាចបង្កើត TikTok ឡើង។

១. ការកសាងប្រព័ន្ធ AI ដំបូងគេ

រឿងរ៉ាវទាំងអស់បានចាប់ផ្តើមនៅក្នុងឆ្នាំ ២០១២ នៅពេលដែលវិស្វករផ្នែកកម្មវិធីកុំព្យូទ័រម្នាក់ដែលមាន  ឈ្មោះ Zhang Yiming បានបង្កើតក្រុមហ៊ុន ByteDance នៅក្នុងអាផាតមិនតូចមួយក្នុងក្រុងប៉េកាំង។ នៅសម័យនោះ បណ្តាញសង្គមយក្សដូចជា Facebook, Twitter ឬ Instagram បានគ្របដណ្តប់ទីផ្សាររួចទៅហើយ ដោយផ្តោតលើ ការបង្ហាញមាតិកាផ្អែកលើមិត្តភក្តិដែលយើងបាន Follow។ ប៉ុន្តែលោក Zhang Yiming បានមើលឃើញខុសពីគេ ដោយលោកបានកត់សម្គាល់ឃើញថា មនុស្សភាគច្រើនចង់ទស្សនាមាតិកាណាដែលត្រូវនឹងចំណង់ចំណូលចិត្តរបស់ពួកគេ ជាជាងការមើលតែអ្វីដែលមិត្តភក្តិចែករំលែកតាមបណ្តាញសង្គម។ ដើម្បីសម្រេចគំនិតនេះ លោកបានបង្កើតកម្មវិធីព័ត៌មានមួយឈ្មោះថា Toutiao ដោយប្រើប្រាស់ប្រព័ន្ធបញ្ញាសិប្បនិម្មិត (AI) និង Algorithm ដំបូងគេ ដើម្បីសិក្សាពីទម្លាប់អានរបស់មនុស្សម្នាក់ៗ។ ប្រព័ន្ធ Algorithm ដ៏ឆ្លាតវៃនេះហើយ ដែលបានក្លាយជាមន្តស្នេហ៍ដែលអាចទាក់ទាញអ្នកមើលនៅលើ TikTok នាពេលបច្ចុប្បន្ន។

២. ការលេចរូបរាងនៃ Douyin

នៅពេលដែលប្រព័ន្ធអ៊ីនធឺណិតល្បឿនលឿន 4G និងទូរស័ព្ទស្មាតហ្វូនចាប់ផ្តើមរីកចម្រើនយ៉ាងឆាប់រហ័ស លោក Zhang Yiming បានមើលឃើញយ៉ាងច្បាស់ថា វីដេអូខ្លីៗនឹងក្លាយជាទម្រង់មាតិកាសំខាន់បំផុតនាពេលអនាគត។ នៅក្នុងឆ្នាំ ២០១៦ ក្រុមការងាររបស់ ByteDance បានចំណាយពេលត្រឹមតែក ២០០ ថ្ងៃប៉ុណ្ណោះ ក្នុងការបង្កើតកម្មវិធីវីដេអូខ្លីមួយឈ្មោះថា Douyin សម្រាប់ទីផ្សារប្រទេសចិន ដោយផ្តើមចេញពីការបង្កើតបទពិសោធន៍ថ្មីស្រឡាងនៃការទស្សនា។ កម្មវិធីនេះបានលុបបំបាត់របៀបមើលវីដេអូបែបចាស់ៗ  ដែលអនុញ្ញាតឱ្យអ្នកមើលផ្លាស់ប្តូរវីដេអូបានយ៉ាងងាយស្រួលដោយគ្រាន់តែអូសឡើងលើ។ បូករួមទាំងការបង្កើតមាតិកាសាមញ្ញៗដែលមាន Effect និងតន្ត្រីស្រាប់ៗ ធ្វើឱ្យអ្នកទស្សនាអាចក្លាយជាអ្នកបង្កើតវីដេអូបានងាយៗ វាជម្រុញឱ្យ Douyin ទទួលបានការពេញនិយម  និង ផ្ទុះក្នុងរយៈពេលតែប៉ុន្មានខែប៉ុណ្ណោះ។

៣. ការបោះជំហានចូលទីផ្សារអន្តរជាតិក្រោមឈ្មោះ TikTok

ដោយលោកមានចក្ខុវិស័យចង់កសាងក្រុមហ៊ុនបច្ចេកវិទ្យាលំដាប់ពិភពលោក លោក Zhang Yiming មិនបានពេញចិត្តត្រឹមតែជោគជ័យក្នុងប្រទេសចិននោះទេ។ នៅក្នុងខែកញ្ញា ឆ្នាំ ២០១៧ ក្រុមហ៊ុន ByteDance បានប្រកាសដាក់ឱ្យប្រើប្រាស់កម្មវិធី TikTok ជាផ្លូវការសម្រាប់ទីផ្សារអន្តរជាតិ។ ដើម្បីគោរពតាមច្បាប់ សុវត្ថិភាពទិន្នន័យ និងបទប្បញ្ញត្តិនៃប្រទេសនីមួយៗ   ហើយក្រុមហ៊ុនបានធ្វើការសម្រេចចិត្តយ៉ាងម៉ត់ចត់ដោយបំបែក TikTok និង Douyin ឱ្យនៅដាច់ដោយឡែកពីគ្នាទាំងស្រុងតែម្ត ដោយ Douyin សម្រាប់ទីផ្សារចិន ហើយ TikTok សម្រាប់អ្នកប្រើប្រាស់ទូទាំងពិភពលោក។

៤. ការទិញយក Musical.ly

ទោះបីជា TikTok ចាប់ផ្តើមដើរទៅមុខក៏ដោយ ការវាយលុកទីផ្សារលោកខាងលិចដូចជាអាមេរិក និងអឺរ៉ុប មិនមែនជារឿងងាយស្រួលនោះទេ។ នៅចុងឆ្នាំ ២០១៧ ក្រុមហ៊ុន ByteDance បានធ្វើការសម្រេចចិត្តដ៏ប្រថុយប្រថាន ប៉ុន្តែជាយុទ្ធសាស្ត្រមាស គឺការចំណាយប្រាក់ ១ ប៊ីលានដុល្លារអាមេរិក ដើម្បីទិញយកកម្មវិធី Musical.ly ដែលជាកម្មវិធីច្រៀងតាមចង្វាក់ភ្លេង (Lip-syncing) ដ៏ល្បីល្បាញក្នុងចំណោមយុវវ័យអាមេរិក។ នៅក្នុងខែសីហា ឆ្នាំ ២០១៨ ByteDance បានធ្វើការបញ្ចូលគណនី និងទិន្នន័យទាំងអស់ពី Musical.ly ទៅក្នុង TikTok។ ការសម្រេចចិត្តនេះ បានធ្វើឱ្យ TikTok ទទួលបានអ្នកប្រើប្រាស់សកម្មរាប់សិបលាននាក់នៅសហរដ្ឋអាមេរិក និងអឺរ៉ុបភ្លាមៗក្នុងមួយយប់ ហើយបានរុញច្រានឱ្យ TikTok ក្លាយជាកម្មវិធីដែលមាន Download ច្រើនជាងគេបំផុតនៅលើ App Store និង Google Play Store។

៥. ការផ្លាស់ប្តូររចនាសម្ព័ន្ធ

នៅពេលដែល TikTok រីកចម្រើនរហូតមានអ្នកប្រើប្រាស់លើសពី ១ ប៊ីលាននាក់ កម្មវិធីនេះបានចាប់ផ្តើមប្រឈមមុខនឹងព្យុះភ្លៀងនយោបាយ និងសម្ពាធផ្នែកច្បាប់ពីប្រទេសធំៗ ជាពិសេសសហរដ្ឋអាមេរិក។ ដើម្បីដោះស្រាយវិបត្តិអន្តរជាតិ និងបង្កើតទំនុកចិត្តលើឆាកអន្តរជាតិ លោក Zhang Yiming បានរៀបចំរចនាសម្ព័ន្ធដឹកនាំថ្មី  ដោយនៅក្នុងឆ្នាំ ២០២១ លោកបានតែងតាំងលោក Shou Zi Chew ដែលជាអតីតអ្នកវិនិយោគ និងជាពាណិជ្ជករជនជាតិសឹង្ហបុរី ឱ្យឡើងកាន់តំណែងជានាយកប្រតិបត្តិ CEO នៃ TikTok។ លោក Shou Zi Chew បានដើរតួនាទីយ៉ាងសំខាន់ក្នុងការធ្វើទំនាក់ទំនងអន្តរជាតិ ការតស៊ូមតិនៅចំពោះមុខសភាអាមេរិក និងការបង្កើតគម្រោង Project Texas ដើម្បីការពារទិន្នន័យអ្នកប្រើប្រាស់ ខណៈដែលលោក Zhang Yiming ដកឃ្លាទៅផ្តោតលើការស្រាវជ្រាវបច្ចេកវិទ្យារយៈពេលវែង។

ការបង្កើត TikTok គឺជាមេរៀនអាជីវកម្មដ៏មានតម្លៃបំផុតមួយសម្រាប់សម័យកាលឌីជីថល។ វាបានបង្ហាញឱ្យយើងឃើញថា ភាពជោគជ័យមិនមែនកើតចេញពីការធ្វើតាមគេនោះទេ ប៉ុន្តែកើតចេញពីការមើលឃើញឱកាសមុនគេ និងការប្រើប្រាស់បច្ចេកវិទ្យា AI ឱ្យចំគោលដៅ និង​ ការហ៊ានបោះទុន   ព្រមទាំងការធ្វើការសម្រេចចិត្តយុទ្ធសាស្ត្រធំៗ   នេះហើយជាមូលហេតុដែល TikTok បានក្លាយជា App​​​ ដែលមានដែលគាំទ្ររាប់លាននាក់ជុំវិញពិភពលោក។​