បច្ចុប្បន្ន មនុស្សជាច្រើន កំពុងរអ៊ូរទាំជារៀងរាល់ខែ នៅពេលដល់ថ្ងៃត្រូវបង់លុយថ្លៃអគ្គីសនី ដោយសារការកើនឡើងនូវតម្លៃ ជាប្រចាំ។ ដូច្នេះ ការផ្លាស់ប្តូរទម្លាប់ប្រើប្រាស់ ឧបករណ៍អេឡិចត្រូនិកក្នុងផ្ទះ ដូចជាម៉ាស៊ីនត្រជាក់ ទូរទឹកកក និងម៉ាស៊ីនទឹកក្ដៅ-ត្រជាក់ ក៏អាចជាវិធី ដើម្បីកាត់បន្ថយការចំណាយ និងសន្សំសំចៃបានរហូតដល់ ២០ ភាគរយ លើវិក្កយបត្រអគ្គិសនីជារៀងរាល់ខែបាន។

ខាងក្រោមនេះគឺជាគន្លឹះសន្សំសំចៃថាមពល ចំនួន ៥ ដែលអ្នកអាចអនុវត្តជាក់ស្ដែងនៅក្នុងផ្ទះរបស់អ្នកបាន៖

១.កំណត់សីតុណ្ហភាពម៉ាស៊ីនត្រជាក់ដល់ ២៦ អង្សាសេ ហើយបើកកង្ហារ៖ ការបន្ថយសីតុណ្ហភាពម៉ាស៊ីនត្រជាក់ ១ អង្សាសេ អាចជួយសន្សំសំចៃអគ្គិសនីបានប្រហែល ១០ ភាគរយ។ ការប្រើប្រាស់កង្ហាររួមគ្នាជាមួយម៉ាស៊ីនត្រជាក់ ជួយចរាចរខ្យល់ និងធ្វើឲ្យអ្នកមានអារម្មណ៍ត្រជាក់ ដោយមិនចាំបាច់ដំឡើងលេខម៉ាស៊ីនត្រជាក់ឲ្យដល់អស់លេខដាក់។

២.សម្អាតតម្រងខ្យល់ និងម៉ាស៊ីនត្រជាក់ជាប្រចាំ៖ តម្រងធូលីរបស់ម៉ាស៊ីនត្រជាក់ គួរតែត្រូវបានដកចេញ និងសម្អាតរៀងរាល់ ១ ទៅ ២ខែម្តង។ ហើយការសម្អាតប្រព័ន្ធទាំងមូល គួរតែត្រូវបានអនុវត្តដោយអ្នកបច្ចេកទេស យ៉ាងហោចណាស់ពីរដងក្នុងមួយឆ្នាំ។ វិធីនេះកាត់បន្ថយ ការប្រមូលផ្តុំធូលី ដែលអាចរារាំងដល់ការរលាយកំដៅ និងបង្កើនការប្រើប្រាស់ថាមពល។

៣.កុំដាក់ទឹកចូលក្នុងទូរទឹកកកច្រើនពេក៖ រៀបចំទូរទឹកកករបស់អ្នក ឲ្យមានកន្លែងគ្រប់គ្រាន់ សម្រាប់ខ្យល់ត្រជាក់សាយភាយស្មើៗគ្នា។ ការដាក់ទឹកចូលក្នុងទូរទឹកកកពេញពេក នឹងធ្វើឲ្យទូរទឹកកកធ្វើការខ្លាំងជាងមុន។ ម្យ៉ាងទៀត ត្រូវចៀសវាង ដាក់អាហារក្តៅខ្លាំង ចូលក្នុងទូរទឹកកក ព្រោះវានឹងធ្វើឲ្យប្រព័ន្ធ ទាញអគ្គិសនីកាន់តែច្រើនដើម្បីឲ្យអាហារនោះត្រជាក់ឆាប់។

៤.កុំបិទ-បើក ទ្វារទូទឹកកកញឹកពេក៖ ការទុកទ្វារទូទឹកកកឲ្យបើកចំហរយៈពេលយូរ វាធ្វើឲ្យខ្យល់ត្រជាក់ភាយចេញ ដែលបណ្តាលឲ្យ ម៉ូទ័រដំណើរការជាបន្តបន្ទាប់ឥតឈប់ឈរ។ លើសពីនេះ អ្នកគួរតែពិនិត្យមើល ប្រដាប់បិទបើកទ្វារទូទឹកកក ដើម្បីការពារខ្យល់ត្រជាក់ពីការលេចធ្លាយចេញផងដែរ។

៥.កែតម្រូវសីតុណ្ហភាពម៉ាស៊ីនទឹកក្ដៅ-ត្រជាក់៖ កុំកំណត់សីតុណ្ហភាពទឹកឲ្យក្តៅពេក  ព្រោះវានឹងប្រើប្រាស់អគ្គិសនីច្រើនដើម្បីកម្តៅទឹក។ អ្វីដែលសំខាន់គឺត្រូវបិទភ្លើង ឬឧបករណ៍បំបែកចរន្តអគ្គិសនីនានាភ្លាមៗ បន្ទាប់ពីងូតទឹករួច ដើម្បីកាត់ផ្តាច់ការផ្គត់ផ្គង់ថាមពលទាំងស្រុង។

យ៉ាងណាមិញ ការចាប់ផ្តើម ផ្លាស់ប្តូរតិចតួចនៅក្នុងទម្លាប់ប្រចាំថ្ងៃរបស់អ្នក  នៅពេលដែលធ្វើវាជាប់លាប់ វានឹងនាំឲ្យមានភាពប្រសើរឡើង គួរឲ្យកត់សម្គាល់នៅពេលវិក្កយបត្រអគ្គិសនីចេញមករៀងរាល់ចុងខែ។ វាជាវិធីសាស្ត្រងាយស្រួល មិនតម្រូវឲ្យមានការវិនិយោគបន្ថែម និងផ្តល់លទ្ធផលពិតប្រាកដសម្រាប់គ្រួសារនីមួយៗ ដែលតែងតែជួបបញ្ហា ទឹកភ្លើងឡើងថ្លៃជារឿយៗ៕