នៅអំឡុងពេលអាកាសធាតុក្តៅ បរិមាណថាមពលអគ្គិសនីប្រើប្រាស់ប្រចាំខែអាចនឹងមានការកើនឡើងខុសប្រក្រតី ដូច្នេះប្រាកដជាមានបងប្អូនមួយចំនួនសង្ស័យទៅលើនាឡិកាស្ទង់(កុងទ័រ) ដើរលឿន ហើយក៏មានអ្នកខ្លះទៀតអាចនឹងគិតថាអ្នកផ្គត់ផ្គង់អគ្គិសនីមានបច្ចេកទេសធ្វើឱ្យគីឡូថាមពលអគ្គិសនីកើនច្រើន ឬបុកស៊ីគីឡូជាដើម។

ដូច្នេះ ដើម្បីដោះស្រាយនៅបញ្ហាគីឡូឡើងស្រឺតៗនៅរដូវក្តៅនេះ អាជ្ញាធរអគ្គិសនីកម្ពុជាក៏បានប្រាប់ពីមូលហេតុធំៗ៣ ដែលបងប្អូនគួរធ្វើ៖

ទី១: ការត្រួតពិនិត្យ និងការផ្ទៀងផ្ទាត់កុងទ័រ ថាតើដំណើរការត្រឹមត្រូវឬទេ?

ទី២. ការត្រួតពិនិត្យការកត់ត្រាការប្រើប្រាស់ប្រចាំខែសម្រាប់ចេញវិក្កយបត្រ ថាត្រឹមត្រូវឬទេ?

ទី៣.ការត្រួតពិនិត្យប្រព័ន្ធបណ្តាញអគ្គិសនី (ចាប់ពីកុងទ័ររហូតដល់ក្នុងផ្ទះ) និងឧបករណ៍អគ្គិសនីដែលប្រើប្រាស់នៅក្នុងផ្ទះ។

ប្រសិនបើលទ្ធផលនៃការពិនិត្យផ្ទៀងផ្ទាត់កុងទ័រ និងការកត់ត្រាការប្រើប្រាស់ប្រចាំខែសម្រាប់ ចេញវិក្កយត្រត្រឹមត្រូវមានន័យថា បរិមាណថាមពលអគ្គិសនី (kWh) ប្រចាំខែ ដែលកត់ត្រា ដោយកុងទ័រនោះទោះតិចក្តី ច្រើនក្តី នៅដដែលក្តី កើនឡើងតិចក្តី កើនឡើងច្រើនក្តី គឺជាបរិមាណថាមពលអគ្គិសនី (kWh) ត្រឹមត្រូវតាមការប្រើប្រាស់ជាក់ស្តែងពិតប្រាកដ។ ដូច្នេះ ត្រូវត្រួតពិនិត្យប្រព័ន្ធបណ្តាញអគ្គិសនី (ចាប់ពីកុងទ័ររហូតដល់ក្នុងផ្ទះ) និងឧបករណ៍អគ្គិសនី ដែលប្រើប្រាស់នៅក្នុងផ្ទះ៕