កាលពីថ្មីៗនេះ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ General Department of Digital Technology and Media បានប្រកាសថា ប្រយ័ត្នជាប់ពាក់ព័ន្ធបទល្មើសដោយមិនដឹងខ្លួន ប្រសិនបើផ្ដល់ ឬជួលគណនីធនាគារ (កុង) ទៅឱ្យគេប្រើប្រាស់ព្រោះការផ្តល់គណនីធនាគារ (ឬកុងធនាគារ) ទៅឱ្យអ្នកដទៃប្រើប្រាស់ ដើម្បីទទួលបានកម្រៃជើងសារ អាចធ្វើឱ្យអ្នកប្រឈមមុខនឹងការចូលរួមប្រព្រឹត្ត បទល្មើស ជាមួយក្រុមឧក្រិដ្ឋជន។

ជាមួយគ្នានោះដែរ ការទទួលប្រាក់ជំនួស ការជួល ឬការលក់គណនីធនាគាររបស់ខ្លួនឱ្យទៅបុគ្គលដទៃប្រើប្រាស់ក្នុងគោលបំណងណាមួយ ឬដើម្បីបានប្រាក់កម្រៃ គឺជាការផ្តល់នូវមធ្យោបាយប្រព្រឹត្តបទល្មើស។

ចំពោះអ្នកផ្តល់មធ្យោបាយក្នុងការប្រព្រឹត្តនូវបទល្មើស គឺត្រូវចាត់ទុកថាជា “សហចារី” ដែលនឹងត្រូវទទួលទោសទណ្ឌដូចជា “ចារី” (អ្នកប្រព្រឹត្តផ្ទាល់) ដែរ។ ក្នុងន័យនេះ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ សូមក្រើនរំលឹកដល់បងប្អូនប្រជាពលរដ្ឋ ដូចខាងក្រោម៖

១. កុំលក់ ឬជួល គណនីធនាគាររបស់ខ្លួនឱ្យទៅបុគ្គលដទៃប្រើប្រាស់ជាដាច់ខាត។

២. កុំទទួលប្រាក់ តាមគណនីធនាគារដែលពុំមានប្រភពច្បាស់លាស់ ជំនួសមិត្តភក្តិ ឬអ្នកដទៃ។

៣. កុំទាក់ទង ជាមួយជនអនាមិក ឬមិត្តភក្តិ ដែលព្យាយាមលួងលោម ឬសន្យាផ្តល់ផលប្រយោជន៍ ក្រោមរូបភាពខ្ចីប្រើប្រាស់កុងធនាគារ។