អាជ្ញាធរចិនបានប្រកាសពីការរកឃើញនូវប្រភព រ៉ែកម្រ ដ៏មហាសាលនៅក្នុងខេត្តស៊ីឈួន (Sichuan) ដែលការរកឃើញនេះបានធ្វើឱ្យតំបន់នោះក្លាយជាកន្លែងផ្ទុករ៉ែកម្រធំជាងគេបង្អស់លំដាប់ទី២ នៅលើពិភពលោក។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិន Futubull  នាថ្ងៃទី ២៦ ខែមីនា ឆ្នាំ២០២៦។

តាមរយៈក្រសួងធនធានធម្មជាតិរបស់ប្រទេសចិន ការរុករកនៅតំបន់រ៉ែ Maoniuping ក្នុងស្រុក Mianning ខេត្តស៊ីឈួន បានបង្ហាញលទ្ធផលគួរឱ្យភ្ញាក់ផ្អើល។ រ៉ែកម្រ ត្រូវបានរកឃើញបន្ថែមចំនួន ៩,៦៧ លានតោន ដែលធ្វើឱ្យបរិមាណរ៉ែសរុបនៅទីនោះកើនឡើងដល់ប្រមាណ ១១,៤៦ លានតោន។ ការរកឃើញថ្មីនេះបានធ្វើឱ្យទំហំរ៉ែនៅតំបន់នេះកើនឡើងជាង ៣០០% ធៀបនឹងទិន្នន័យចាស់។

ការរកឃើញថ្មីនេះបានរុញច្រានតំបន់ Maoniuping ឱ្យក្លាយជាប្រភពរ៉ែកម្រប្រភេទស្រាលធំជាងគេបង្អស់លំដាប់ទី២ នៅលើពិភពលោក បន្ទាប់ពីតំបន់ Bayan Obo ក្នុងតំបន់ស្វយ័ត Inner Mongolia របស់ចិនដដែល។ ក្រៅពីវត្តមាននៃរ៉ែកម្រ អាជ្ញាធរក៏បានរកឃើញនូវរ៉ែយុទ្ធសាស្ត្រសំខាន់ៗផ្សេងទៀតក្នុងបរិមាណដ៏ច្រើនសន្ធឹកសន្ធាប់ រួមមានរ៉ែ Fluorite ប្រមាណ ២៧,១៤ លានតោន និងរ៉ែ Barite ប្រមាណ ៣៧,២៣ លានតោន ដែលសុទ្ធសឹងតែជាវត្ថុធាតុដើមមិនអាចខ្វះបានសម្រាប់ឧស្សាហកម្មបច្ចេកវិទ្យាជាន់ខ្ពស់។

វត្តមាននៃកំណប់រ៉ែដ៏សន្ធឹកសន្ធាប់នេះ មានសារៈសំខាន់ជាយុទ្ធសាស្ត្រយ៉ាងខ្លាំងសម្រាប់សន្តិសុខធនធានរបស់ប្រទេសចិន ដោយអ្នកជំនាញបានវាយតម្លៃថា បរិមាណដែលទើបរកឃើញថ្មីនេះអាចផ្គត់ផ្គង់តម្រូវការប្រើប្រាស់ក្នុងស្រុកបានរហូតដល់ទៅ ៣៦ ឆ្នាំបន្ថែមទៀត។ លើសពីនេះ ជោគជ័យនៃការរុករកនេះបានបង្ហាញពីសមត្ថភាពបច្ចេកទេសដ៏ខ្ពស់របស់ចិន ក្នុងការរុករកធនធានដែលនៅជម្រៅជ្រៅក្នុងដីរហូតដល់ ១,០០០ ម៉ែត្រ ដែលជាសមិទ្ធផលថ្មីមួយក្នុងការគ្រប់គ្រងធនធានធម្មជាតិដែលលាក់កំបាំងនៅក្រោមដី។

តាមរយៈការពង្រឹងទីតាំងជាអ្នកគ្រប់គ្រងប្រភពរ៉ែកម្រធំជាងគេទី១ និងទី២ លើពិភពលោក ប្រទេសចិននឹងបន្តរក្សាឧត្តមភាពរបស់ខ្លួនយ៉ាងរឹងមាំនៅក្នុងខ្សែច្រវាក់ផ្គត់ផ្គង់សកល។ រ៉ែទាំងនេះគឺជាឆ្អឹងខ្នងនៃផលិតកម្មបច្ចេកវិទ្យាទំនើបៗ រួមមានអាគុយរថយន្តអគ្គិសនី (EV) ទូរស័ព្ទស្មាតហ្វូន ទួរប៊ីនខ្យល់សម្រាប់ថាមពលបៃតង និងគ្រឿងយុទ្ធោបករណ៍យោធា ដែលសុទ្ធសឹងតែជាវិស័យស្នូលក្នុងការជំរុញសេដ្ឋកិច្ច និងបច្ចេកវិទ្យានៅក្នុងយុគសម័យឌីជីថលនេះ៕

អត្ថបទដោយ៖ កាន់ ដារ៉ា (ម្ចាស់ស្នាដៃសៀវភៅ បុគ្គលិកឆ្នើម)

• សម្រាប់បុគ្គលិកដែលចង់បាន ចំណូលកើន ឡើងតួនាទីលឿន
• ម្ចាស់អាជីវកម្មដែលចង់កសាងក្រុមការងារដែកថែបបង្កើតលទ្ធផលខ្ពស់
• យើងសូមណែនាំសៀវភៅ «បុគ្គលិកឆ្នើម» តម្លៃពេញ ១២$ បើកក់ឥឡូវនេះតម្លៃត្រឹមតែ ១០$ ប៉ុណ្ណោះ។   បញ្ជាទិញតាម https://t.me/BusinessCambodiaBook