ក្រោយពីមានជំនួបកិច្ចប្រជុំពិសេសរវាងថ្នាក់ដឹកនាំកម្ពុជានិងថៃ ដែលមាននាយករដ្ឋមន្ត្រីម៉ាឡេស៊ី និងសហរៀបចំដោយសហរដ្ឋអាម៉េរិក ព្រមទាំងមានការចូលរួមយ៉ាងសកម្មពីសាធារណរដ្ឋប្រជាមានិតចិន នៅប្រទេសម៉ាឡេស៊ី។
ជាលទ្ធផលកម្ពុជានិងថៃបានអនុវត្តបទឈប់បាញ់គ្នាឥតខណ្ឌ ដោយក្នុងនោះមានប្រទេសជាច្រើនបានគាំទ្រនិងស្វាមគន៍យ៉ាងខ្លាំងចំពោះ សមិទ្ធិផលសន្តិភាពនេះ។
ដូច្នេះខាងក្រោមនេះគឹជាសម្រង់សម្តីនិង ការគាំទ្ររបស់ថ្នាក់ដឹកនាំគ្រប់ជាន់ថ្នាក់ នៃបណ្តាប្រទេសចំនួន១២លើសកលលោក មកកាន់ក្រសួងការបរទេសកម្ពុជា អំពីបទឈប់បាញ់ឥតលក្ខខណ្ឌ កម្ពុជា-ថៃ៖
១. សហរដ្ឋអាមេរិក៖ ប្រសាសន៍របស់ឯកឧត្ដម Donald J. Trump ប្រធានាធិបតីសហរដ្ឋអាមេរិក ស្ដីពីបទឈប់បាញ់រវាងកម្ពុជា និងថៃ៖ “ប្រទេសទាំងពីរបានឈានទៅដល់បទឈប់បាញ់ និងសន្តិភាព សូមអបអរសាទរទាំងអស់គ្នា” ។
២. បារាំង៖ ប្រសាសន៍របស់ឯកឧត្ដម Emmanuel Macron ប្រធានាធិបតីនៃសាធារណរដ្ឋបារាំង ស្ដីពីបទឈប់បាញ់រវាងកម្ពុជា និងថៃ៖ “ដល់ពេលដែលសំឡេងកាំភ្លើងបានស្ងាប់ស្ងាត់ នៅតាមបណ្តោយព្រំដែនកម្ពុជា ថៃ។
៣. ជប៉ុន៖ ប្រសាសន៍របស់ឯកឧត្ដម Iwaya Takeshi រដ្ឋមន្រ្ដីការបរទេសជប៉ុន ស្ដីពីបទឈប់បាញ់រវាងកម្ពុជា និងថៃ៖ “ជប៉ុនស្វាគមន៍ដែលកម្ពុជានិងថៃបានឈានដល់កិច្ចព្រមព្រៀងឈប់បាញ់គ្នាភ្លាមៗនិងគ្មានលក្ខខណ្ឌ។ប្រទេសជប៉ុនក៏សូមកោតសរសើរយ៉ាងខ្លាំងចំពោះកិច្ចខិតខំប្រឹងប្រែងការទូតរបស់គ្រប់ភាគីពាក់ព័ន្ធក្នុងការសម្រេចបាននូវកិច្ចព្រមព្រៀងនេះ រួមទាំងប្រទេសម៉ាឡេស៊ី ដែលជាម្ចាស់ផ្ទះនៃកិច្ចប្រជុំពិសេស និងសហរដ្ឋអាមេរិកជាអ្នករៀបចំ។ រដ្ឋាភិបាលជប៉ុននឹងបន្តលើកទឹកចិត្តទាំងកម្ពុជា និងថៃ ឱ្យជំរុញការអនុវត្តស្ថិរភាពនៃកិច្ចព្រមព្រៀងឈប់បាញ់ និងការបន្ថយស្ថានការណ៍ ដោយមានការសម្របសម្រួលជាមួយប្រទេសពាក់ព័ន្ធ”។
៤. អូស្រ្តាលី៖ ប្រសាសន៍របស់លោកជំទាវ Penny Wong រដ្ឋមន្រ្ដីការបរទេសអូស្រ្ដាលី ស្ដីពីបទឈប់បាញ់រវាងកម្ពុជា និងថៃ៖ “អូស្ត្រាលីស្វាគមន៍កិច្ចព្រមព្រៀងរវាងកម្ពុជានិងថៃចំពោះបទឈប់បាញ់គ្នាភ្លាមៗនិងគ្មានលក្ខខណ្ឌ។ យើងជំរុញឱ្យភាគីទាំងពីរគោរពវា និងធ្វើការឆ្ពោះទៅរកដំណោះស្រាយយូរអង្វែង និងដោយសន្តិវិធី” ។
៥. សហភាពអឺរ៉ុប៖ ប្រសាសន៍របស់លោកជំទាវ Kaja Kallas តំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេស និងសន្តិសុខគោលនយោបាយ និងជាអនុប្រធានគណៈកម្មការអឺរ៉ុប ស្ដីពីបទឈប់បាញ់រវាងកម្ពុជា និងថៃ៖ “កិច្ចព្រមព្រៀងឈប់បាញ់រវាងកម្ពុជា និងថៃ គឺជាគំហើញដ៏សំខាន់មួយ បន្ទាប់ពីមានការប៉ះទង្គិចគ្នាយ៉ាងធ្ងន់ធ្ងរជាច្រើនថ្ងៃ។ វាមានសារៈសំខាន់ណាស់ ដែលប្រទេសទាំងពីរអនុវត្តវាដោយស្មោះត្រង់។
៦. វៀតណាម៖ ប្រសាសន៍របស់ឯកឧត្តម BUI Thanh Son ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសនៃសាធារណរដ្ឋសង្គមនិយមវៀតណាម ស្ដីពីបទឈប់បាញ់រវាងកម្ពុជា និងថៃ៖ “ជំហានដ៏សំខាន់មួយដើម្បីកាត់បន្ថយការកើនឡើង និងការស្ដារឡើងវិញនូវសន្តិភាព និងសន្តិសុខ”។
៧. ចក្រភពអង់គ្លេស៖ ប្រសាសន៍របស់លោកជំទាវ Catherine West MP រដ្ឋលេខាធិការទទួលបន្ទុកកិច្ចការឥណ្ឌូ-ប៉ាស៊ីហ្វិក នៃក្រសួងការបរទេសចក្រភពអង់គ្លេស ស្ដីពីបទឈប់បាញ់រវាងកម្ពុជា និងថៃ៖ “ចក្រភពអង់គ្លេសស្វាគមន៍ចំពោះកិច្ចព្រមព្រៀងបទឈប់បាញ់រវាងប្រទេសថៃ និងកម្ពុជា ដែលសម្របសម្រួលដោយការដឹកនាំរបស់នាយករដ្ឋមន្ត្រី អាន់វ៉ា និងគាំទ្រដោយប្រធានាធិបតី Trump។ នេះគឺជាជំហានដ៏សំខាន់មួយឆ្ពោះទៅរកសន្តិភាព ដែលគ្រប់ភាគីត្រូវតែគោរព និងគាំទ្របទឈប់បាញ់”។
៨. ម៉ាឡេស៊ី៖ ឯកឧត្តម Anwar Ibrahim នាយករដ្ឋមន្រ្ដីម៉ាឡេស៊ី និងជាប្រធានអាស៊ានឆ្នាំ២០២៥ ស្ដីពីបទឈប់បាញ់រវាងកម្ពុជា និងថៃ៖ “ដំណោះស្រាយដោយសន្តិវិធីនេះឆ្លុះបញ្ចាំងពីស្មារតីពិតនៃធម្មនុញ្ញអាស៊ានដែលត្រូវបានចាក់ឫសក្នុងការគោរពគ្នាទៅវិញទៅមក ការសន្ទនា និងការបដិសេធចំពោះអំពើហឹង្សាដែលជាប្រយោជន៍ដល់មនុស្សជាតិ។ ជាថ្មីម្តងទៀត អាស៊ានបញ្ជាក់ពីតួនាទីរបស់ខ្លួនជាកម្លាំងដ៏គួរឱ្យទុកចិត្តនិងជាគោលការណ៍នៅលើឆាកពិភពលោក ដែលដឹកនាំដោយការទូត និងការប្ដេជ្ញារួមចំពោះសេចក្តីថ្លៃថ្នូររបស់មនុស្ស។
ខ្ញុំសូមថ្លែងអំណរគុណយ៉ាងស្មោះស្ម័គ្រចំពោះប្រទេសថៃ និងកម្ពុជាដែលបានជ្រើសរើសផ្លូវនៃការទូត និងចំពោះប្រធានាធិបតី Donald Trump និងប្រធានាធិបតី Xi Jinping សម្រាប់ការគាំទ្រក្នុងន័យស្ថាបនាក្នុងការជំរុញគំនិតផ្តួចផ្តើមសន្តិភាពនេះ”។
៩. អង្គការសហប្រជាជាតិ៖ ប្រសាសន៍របស់ឯកឧត្តម António Guterres អគ្គលេខាធិការនៃអង្គការសហប្រជាជាតិ ស្ដីពីបទឈប់បាញ់រវាងកម្ពុជា និងថៃ៖ “ខ្ញុំស្វាគមន៍កិច្ចព្រមព្រៀងបទឈប់បាញ់រវាងកម្ពុជា និងថៃ ដែលជាជំហានវិជ្ជមានឆ្ពោះទៅរកការបញ្ចប់អរិភាពនាពេលបច្ចុប្បន្ន និងការបន្ធូរបន្ថយភាពតានតឹង។ អង្គការសហប្រជាជាតិ ត្រៀមខ្លួនរួចជាស្រេច ដើម្បីគាំទ្រកិច្ចខិតខំប្រឹងប្រែង សំដៅលើកកម្ពស់សន្តិភាព និងស្ថិរភាពក្នុងតំបន់”
១០. សាធារណរដ្ឋប្រជាមានិតចិន៖ ប្រសាសន៍របស់ឯកឧត្តម Guo Jiakun អ្នកនាំពាក្យក្រសួងការបរទេសនៃសាធារណរដ្ឋប្រជាមានិតចិន ស្ដីពីបទឈប់បាញ់រវាងកម្ពុជា និងថៃ៖ “ការឈានដល់កិច្ចព្រមព្រៀងឈប់បាញ់រវាងកម្ពុជា និងថៃ គឺជាជំហានដ៏សំខាន់មួយឆ្ពោះទៅមុខសម្រាប់ជំរុញការដោះស្រាយស្ថានការណ៍ដោយសន្តិវិធី។ ចិនសូមសរសើរនិងស្វាគមន៍លទ្ធផលនេះ”។
១១. នូវែលសេឡង់៖ ប្រសាសន៍របស់ឯកឧត្តម Winston Peters រដ្ឋមន្ត្រីការបរទេសនូវែលសេឡង់ ស្ដីពីបទឈប់បាញ់រវាងកម្ពុជា និងថៃ៖ “នូវែលហ្សេឡង់ស្វាគមន៍កិច្ចព្រមព្រៀងរបស់ថៃ និងកម្ពុជាចំពោះបទឈប់បាញ់ភ្លាមៗ និងគ្មានលក្ខខណ្ឌ ហើយជំរុញឱ្យភាគីទាំងពីរគោរព និងរក្សាវា”។
១២. ឥណ្ឌូនេស៊ី៖ ប្រសាសន៍របស់ឯកឧត្តម Prabowo Subianto ប្រធានាធិបតីនៃសាធារណរដ្ឋឥណ្ឌូនេស៊ី ស្ដីពីបទឈប់បាញ់រវាងកម្ពុជា និងថៃ៖ “បទឈប់បាញ់នេះគឺជាគំហើញដ៏មានសារៈសំខាន់។ យើងចង់ឲ្យអាស៊ានបន្តប្ដេជ្ញាដោះស្រាយជម្លោះដោយសន្តិវិធីតាមរយៈការពិគ្រោះ ការពិភាក្សា និងការចរចា”៕
អត្ថបទដោយ៖ ពីង ជូអេង
