លោក Robert Kiyosaki អ្នកនិពន្ធសៀវភៅ "Rich Dad Poor Dad" ថ្មីៗនេះបានបង្ហោះនៅលើបណ្ដាញសង្គម X ថា ពិភពលោកកំពុងស្ថិតក្នុងដំណាក់កាលមានវិបត្តិសេដ្ឋកិច្ចយ៉ាងធ្ងន់ធ្ងរដូចដែលលោកធ្លាប់បានព្យាករណ៍ទុកអស់រយៈពេលជាងមួយទសវត្សរ៍មកហើយ។ លោកជឿជាក់ថាផលវិបាកលើកនេះនឹងមានសភាពធ្ងន់ធ្ងរជាទីបំផុត។ វាមិនមែនមានតែនៅសហរដ្ឋអាមេរិកនោះទេ សូម្បីតែអឺរ៉ុប និងអាស៊ីក៏កំពុងដួលរលំដែរ។

ទោះបីជាមានការព្រមានដ៏គួរឱ្យខ្លាចក៏ដោយ លោក Kiyosaki ជឿជាក់ថា នេះគឺជាឱកាសដ៏ល្អបំផុតមួយដើម្បីក្លាយជាអ្នកមាន ព្រោះទ្រព្យសម្បត្តិដែលមានតម្លៃនឹងត្រូវដាក់លក់ក្នុងតម្លៃថោកៗ។ យុទ្ធសាស្ត្រត្រៀមខ្លួនរបស់លោកគឺ៖ “ដល់ពេលត្រូវទិញ មាស, ប្រាក់, Bitcoin និង Ethereum ទុកហើយ”។ ឱកាសសំខាន់ៗដែលលោក Kiyosaki ណែនាំឱ្យគួរតែចាប់យកគឺ៖ 

១. ទិញមាស និងប្រាក់ទុក៖ លោក Kiyosaki តែងតែបង្ហាញការជឿជាក់លើមាស និងប្រាក់ ជាពិសេសក្នុងពេលមានវិបត្តិ ព្រោះលោកមិនទុកចិត្តលើធនាគារកណ្តាល (Fed) នោះទេ។ មាស និងប្រាក់ត្រូវបានចាត់ទុកថាជា "ទ្រព្យសុវត្ថិភាព" ព្រោះវាមិនអាចបោះពុម្ពបានតាមចិត្តដូចជាប្រាក់ដុល្លារនោះទេ។ ការព្យាករណ៍តម្លៃប្រាក់៖ លោកជឿថាវាអាចឡើងដល់ $200 ក្នុងមួយអោននៅឆ្នាំ ២០២៦ ខណៈដែលតម្លៃមាសអាចឡើងរហូតដល់ $27,000 ក្នុងមួយអោន។ 

២. រូបិយប័ណ្ណឌីជីថល៖ ក្រៅពីលោហៈធាតុ លោក Kiyosaki ក៏បានជំរុញឱ្យទិញ Bitcoin និង Ethereum ផងដែរ។ ទោះបីជា Bitcoin មានការប្រែប្រួលខ្លាំង ដោយបានធ្លាក់ចុះជិត 40% ក្នុងឆ្នាំកន្លងទៅ និងធ្លាក់ចុះក្រោម $61,000 កាលពីដើមខែកុម្ភៈក៏ដោយ ក៏លោកនៅតែមានជំនឿចិត្តយ៉ាងមុតមាំ។ គោលដៅតម្លៃ Bitcoin៖ លោកព្យាករណ៍ថា Bitcoin នឹងឡើងដល់ $250,000 នៅឆ្នាំ ២០២៦។ លោកជឿថា នៅពេលដែល Bitcoin ចុងក្រោយ (គ្រាប់ទី ២១ លាន) ត្រូវបានគេជីកយកអស់ វានឹងក្លាយជាទ្រព្យសម្បត្តិដែលល្អជាងមាសទៅទៀត៕