គម្រោងធំៗចំនួន ៣ ដែលមិនធ្លាប់មាននៅកម្ពុជា គឺផ្លូវលើអាកាស និងផ្លូវទឹកដឹកជញ្ជូន កំពុងស្ថិតនៅក្នុងគម្រោងសាងសង់របស់រដ្ឋ និងក្រុមហ៊ុន ឯកជន ដើម្បីសម្រួលដល់ការធ្វើចរាចរណ៍ដឹកជញ្ជូនទំនិញឲ្យបានឆាប់រហ័ស ពិសេសជួយកាត់បន្ថយការកកស្ទះផងដែរ។ ខណៈគម្រោងទាំង ៣ នេះមានដូចខាងក្រោម៖
១. ផ្លូវអាកាស
ដើម្បីដោះស្រាយការកកស្ទះចរាចរណ៍នៅក្នុងភូមិសាស្ដ្ររាជធានីភ្នំពេញ ពិសេសចរាចរណ៍ពីតំបន់អាកាសយានដ្ឋានអន្ដរជាតិតេជោមកកាន់ទីក្រុង។ រដ្ឋបាលរាជធានីភ្នំពេញបានបង្ហាញពីគម្រោងសាងសង់ផ្លូវអាកាស និងរថភ្លើងក្រោមដីនាពេលខាងមុខ។
តាមការបញ្ជាក់ពីឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ កាលពីដើមខែតុលាកន្លងទៅ បានឲ្យដឹងថា ពាក់ព័ន្ធនឹងបញ្ហាចរាចរណ៍ ជាគម្រោងរដ្ឋបាលរាជធានីភ្នំពេញក៏នឹងកសាងនូវផ្លូវអាកាស ដើម្បីរំដោះចរាចរណ៍ចេញពីអាកាសយាន្តដ្ឋានអន្តរជាតិតេជោចូលមកភ្នំពេញ។ ក្នុងនោះដែរជាគម្រោង យើងអាចស្ថាបនាផ្លូវអាកាសចាប់ពីរង្វង់មូលគួស្រូវ ហោះលើផ្លូវលេខ២១៧ មកចុះមុខមហោស្របចេនឡាផ្សារដើមគរ។ ចំណែកការស្ថាបនាផ្លូវរថភ្លើងក្រោមដីវិញ យើងក៏មានគម្រោងសាងសង់ផងដែរ ដើម្បីរំដោះបរាចរណ៍ចេញពីអាកាសយាន្តដ្ឋានអន្តរជាតិតេជោចូលមករាជធានីភ្នំពេញនិងផ្លូវចូលក្រុងផងដែរ។
២. គម្រោងផ្លូវទឹក
ក្រុមហ៊ុន OCIC មានគម្រោងសាងសង់ផ្លូវទឹកថ្មីដែលតភ្ជាប់ពីទីក្រុងរណបរបស់អាកាសយានដ្ឋានអន្ដរជាតិតេជោ TIA ភ្ជាប់ទៅកាន់គម្រោងព្រែកជីកហ្វូណនេតជោ ដើម្បីសម្រួលដល់ការទឹកដញ្ជូនទំនិញ។ ខណៈគម្រោងផ្លូវទឹកថ្មីនេះមានប្រវែងសរុប ១០ គីឡូម៉ែត្រ និងគ្រោងចំណាយទុន ១០០ លានដុល្លារ។
លោកអ្នកឧកញ៉ា ពុង ឃាវសែ ប្រធានក្រុមហ៊ុន OCIC បានបញ្ជាក់ថា “យើងមានផែនការសាងសង់ផ្លូវទឹកដឹកជញ្ជូនថ្មីប្រវែង ១០ គីឡូម៉ែត្រ ដែលគ្រោងចំណាយទុនវិនិយោគចំនួន ១០០ លានដុល្លារអាមេរិក សម្រាប់ធ្វើការតភ្ជាប់ពីបឹងជើងលូងដែលនៅប៉ែកខាងត្បូងរបស់ TIA ទៅភ្ជាប់នឹងទន្លេបាសាក់ និងព្រែកជីកហ្វូណនតេជោ រហូតទៅដល់ក្រុងកែប ដែលជាច្រកសមុទ្ររបស់ប្រទេសកម្ពុជាយើង ដើម្បីឲ្យតំបន់ TIA ក្លាយជាមជ្ឈមណ្ឌលដឹកជញ្ជូនផ្លូវអាកាស ផ្លូវគោក និងផ្លូវទឹក” ។
៣. គម្រោងព្រែកជីកហ្វូណនតេជោ
គម្រោងព្រែកជីកហ្វូណនតេជោ គឺជាគម្រោងផ្លូវទឹកប្រវត្ដិសាស្រ្ដរបស់កម្ពុជា ត្រូវបានបើកការដ្ឋានសាងសង់កាលពីថ្ងៃទី៥ ខែសីហា ឆ្នាំ២០២៤ កន្លងទៅ។ គម្រោងនេះមានប្រវែងសរុប ១៨០គីឡូម៉ែត្រ ដែលតភ្ជាប់ប្រព័ន្ធទន្លេមេគង្គ និងផ្លូវសមុទ្រ ចាប់ពីព្រែកតាកែវ នៃទន្លេមេគង្គឆ្លងកាត់តាមព្រែកតាឯកនៃទន្លេបាសាក់រួចចូលតាមព្រែកតាហ៊ឹង នៃទន្លេបាសាក់ក្នុងស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប។
គម្រោងព្រែកជីកហ្វូណនតេជោ ត្រូវបានចែកចេញជា ២ ដំណាក់កាលគឺ ដំណាក់កាលទី១ ជាកំណាត់ផ្លូវទឹក «ព្រែកតាកែវ-ព្រែកពោធិ៍» មានចម្ងាយ ២១គីឡូម៉ែត្រ និងផ្នែកទី២ ជាកំណាត់ផ្លូវទឹក «ទន្លេបាសាក់ត្រង់ចំណុចព្រែកពោធិ៍-សមុទ្រខេត្តកែប» មានចម្ងាយ ១៥៩គីឡូម៉ែត្រ។ ខណៈគម្រោងនេះដែរនឹងត្រូវចំណាយថវិកាចំនួន ១៧០០ លានដុល្លារសម្រាប់ការសាងសង់ និងគ្រោងបញ្ចប់នៅឆ្នាំ២០២៨ ខាងមុខ។
