ការលាឈប់ពីការងារ គឺជាជំហានដ៏សំខាន់មួយក្នុងផ្លូវជីវិតវិជ្ជាជីវៈ។ ទោះបីជាអ្នកឈប់ដោយសារទទួលបានឱកាសងារថ្មីល្អជាងមុន ឬចង់ចេញទៅរកស៊ីផ្ទាល់ខ្លួនក៏ដោយ ការចាកចេញដោយ វិជ្ជាជីវៈខ្ពស់ ដោយសន្តិវិធី វានឹងរក្សាទំនាក់ទំនងល្អ និងមិនប៉ះពាល់ដល់កេរ្តិ៍ឈ្មោះរបស់អ្នកឡើយ។ ខាងក្រោមនេះជា ចំណុចសំខាន់ៗដែលអ្នកគួរធ្វើ មុនពេលលាឈប់ពីការងារ៖

១.ត្រៀមខ្លួនផ្នែកហិរញ្ញវត្ថុ និងឱកាសបន្ទាប់៖ ត្រូវគិតថា មានការងារថ្មីច្បាស់លាស់ឬអត់? (បើសិនជាចង់ផ្លាស់ប្តូរការងារ)។ ត្រូវមានកញ្ចប់លុយបម្រុងមួយ បើអ្នកឈប់ដោយគ្មានការងារថ្មី ឬចេញទៅរកស៊ី ត្រូវប្រាកដថា មានលុយបម្រុងគ្រប់គ្រាន់សម្រាប់ផ្គត់ផ្គង់ការចំណាយយ៉ាងហោចណាស់ ៣ ទៅ ៦ ខែដែរ។ មួយទៀត ត្រូវប្រើប្រាស់អត្ថប្រយោជន៍ដែលសល់ ដោយពិនិត្យមើលថ្ងៃឈប់សម្រាកប្រចាំឆ្នាំ (Annual Leave) ឬធានារ៉ាប់រងដែលនៅសល់ ព្រោះវានឹងផុតកំណត់នៅពេលអ្នកចាកចេញ។

២.ជូនដំណឹងតាមនីតិវិធី និងផ្តល់ពេលវេលាសមរម្យ៖ ជួបពិភាក្សាជាមួយប្រធានផ្ទាល់ ព្រោះអ្នកគួរជួបប្រធានរបស់អ្នកផ្ទាល់ ដើម្បីជម្រាបពីការសម្រេចចិត្ត មុនពេលផ្ញើអ៊ីមែល ឬលិខិតផ្លូវការ។ ហើយការដាក់លិខិតលាឈប់ ត្រូវសរសេរលិខិតលាឈប់ឲ្យមានលក្ខណៈអាជីព បង្ហាញការអរគុណដល់ក្រុមហ៊ុន និងបញ្ជាក់កាលបរិច្ឆេទចាកចេញឲ្យបានច្បាស់លាស់ និងត្រូវជូនដំណឹងមុនយ៉ាងហោចណាស់ ២ សប្តាហ៍ ទៅ ១ ខែ (តាមកិច្ចសន្យាការងារ) ដើម្បីឲ្យក្រុមហ៊ុនមានពេលស្វែងរកមនុស្សជំនួស។

៣.រៀបចំការផ្ទេរការងារឲ្យបានរលូន ៖ ធ្វើឯកសារផ្ទេរការងារ ដោយចងក្រងបញ្ជីការងារដែលកំពុងធ្វើ ឯកសារសំខាន់ៗ និងទំនាក់ទំនងរបស់អតិថិជន ឬដៃគូការងារ។ ជួយបណ្តុះបណ្តាលអ្នកជំនួស ដោយបង្រៀន ឬណែនាំការងារដល់អ្នកដែលមកជំនួសតំណែងរបស់អ្នក ដោយចិត្តទូលាយ និងគ្មានការលាក់លៀម។

៤.រក្សាទំនាក់ទំនង និងបង្កើតបណ្តាញ៖ រក្សាឯកសារផ្ទាល់ខ្លួន (តែមិនមែនជាការលួចទិន្នន័យក្រុមហ៊ុន)ឡើយ។ អ្នកអាចចម្លងយកតែឯកសារផ្ទាល់ខ្លួន ដូចជា វិញ្ញាបនបត្រ គម្រោងស្នាដៃផ្ទាល់ខ្លួន (Portfolio) តែត្រូវចៀសវាងការយកទិន្នន័យសម្ងាត់ ឬព័ត៌មានអតិថិជនរបស់ក្រុមហ៊ុន ព្រោះវាជាអំពើខុសច្បាប់។ មួយទៀត ត្រូវសុំលិខិតបញ្ជាក់ការងារ ឬការធានា ពីប្រធាន ឬនាយកដ្ឋានធនធានមនុស្ស (HR) ទុកសម្រាប់ប្រើប្រាស់នៅពេលអនាគត។ ចុងក្រោយ ផ្ញើសារអរគុណ និងលាក្រុមការងារ រួចតភ្ជាប់ទំនាក់ទំនងតាម LinkedIn, Telegram ឬលេខទូរស័ព្ទផ្ទាល់ខ្លួន។

សរុបមក ការចាកចេញពីក្រុមហ៊ុនតាមទ្វារមុខ និងស្នាមញញឹម ជារឿងល្អដែលគ្រប់គ្នាគួរតែធ្វើ ព្រោះពិភពការងារគឺតូចណាស់ ថ្ងៃណាមួយអ្នកអាចនឹងត្រូវជួប ឬធ្វើការជាមួយប្រធាន និងក្រុមការងារចាស់ៗទាំងនោះវិញម្តងទៀត៕