ការទិញផ្ទះដំបូងគឺជា សមិទ្ធផល និងជាការវិនិយោគដ៏ធំមួយក្នុងជីវិត។ យ៉ាងណាមិញ ប្រសិនបើគ្មានការត្រៀមខ្លួនច្បាស់លាស់ទេ វាអាចប្រែប្រួលពី ជម្រកក្នុងក្តីស្រមៃ ទៅជា សម្ពាធហិរញ្ញវត្ថុដ៏ធ្ងន់ធ្ងរ ទៅវិញ។ ដូច្នេះ ដើម្បីជួយឲ្យការទិញផ្ទះដំបូងរបស់អ្នករលូន និងមានសុវត្ថិភាព ខាងក្រោមនេះជា ដំបូន្មានមាស ៥ យ៉ាង ដែលអ្នកគួរយល់ដឹង៖

១.វិភាគស្ថានភាពហិរញ្ញវត្ថុ៖ កុំបង់រំលស់លើសពី ៣០% ទៅ ៤០% នៃចំណូលសរុប។ មុននឹងសម្រេចចិត្តទិញ ត្រូវប្រាកដថា ប្រាក់បង់រំលស់ប្រចាំខែ (ផ្ទះ + ការប្រាក់) មិនលើសពី ៣០% ទៅ ៤០% នៃចំណូលប្រចាំខែរបស់អ្នក និងគ្រួសារឡើយ ដើម្បីទុកលុយសម្រាប់ចំណាយប្រចាំថ្ងៃ និងសន្សំ។ មួយវិញទៀត គួរមានសាច់ប្រាក់យ៉ាងហោចណាស់ ២០% ទៅ ៣០% នៃតម្លៃផ្ទះ សម្រាប់កក់ដំបូង ដើម្បីកាត់បន្ថយប្រាក់ដើមត្រូវខ្ចី និងកាត់បន្ថយការប្រាក់បង់ប្រចាំខែ។ ក្រៅពីតម្លៃផ្ទះ អ្នកត្រូវត្រៀមលុយបម្រុង ៥% ទៅ ១០% បន្ថែមទៀតសម្រាប់ថ្លៃសេវាបង់ពន្ធ ថ្លៃសេវារដ្ឋបាល និងកាត់ប្លង់ ថ្លៃរៀបចំប្រព័ន្ធទឹក ភ្លើង និងថ្លៃសេវាកម្មកែច្នៃ ឬដេគ័រ។

២.ការពិនិត្យមើល ប្លង់ និងផ្លូវច្បាប់៖ ត្រូវច្បាស់ថាផ្ទះ ឬដីនោះជា ប្លង់រឹង ឬ ប្លង់ទន់។ ប្រសិនបើជាប្លង់រឹង គឺមានសុវត្ថិភាពខ្ពស់ និងស្របច្បាប់ពេញលេញ។ ប្រសិនបើជាប្លង់ទន់ ឬទិញពីបុរី ត្រូវពិនិត្យមើលថា តើគម្រោងនោះមាន អាជ្ញាប័ណ្ណអភិវឌ្ឍន៍អចលនវត្ថុ ត្រឹមត្រូវដែរឬទេ? មួយវិញទៀត ត្រូវពិនិត្យមើលប្រវត្តិដី ឬផ្ទះនោះ។ ត្រូវប្រាកដថាអចលនទ្រព្យនោះ មិនជាប់ពាក់ព័ន្ធនឹងបំណុលធនាគារ (គ្មានការបញ្ចាំដែលមិនទាន់ផ្ដាច់) ឬគ្មានទំនាស់ព្រំប្រទល់ជាមួយអ្នកជិតខាងឡើយ។

៣.ជ្រើសរើសទីតាំងឲ្យមានអំណោយផល៖ កុំមើលតែតម្លៃថោក ត្រូវគិតពីចម្ងាយធ្វើដំណើរទៅកន្លែងធ្វើការ សាលារៀនកូន មន្ទីរពេទ្យ និងផ្សារ។ អ្វីដែលមិនភ្លេច ត្រូវមើលប្រព័ន្ធរំដោះទឹក និងផ្លូវធ្វើដំណើរ ដោយចុះទៅមើលទីតាំងផ្ទាល់ ជាពិសេសនៅរដូវភ្លៀង ដើម្បីដឹងថា តើទីតាំងនោះលិចទឹកដែរឬទេ? តើផ្លូវចូលផ្ទះទូលាយ និងមានភ្លើងបំភ្លឺផ្លូវគ្រប់គ្រាន់នៅពេលយប់ដែរឬទេ?

៤.យុទ្ធសាស្ត្រជ្រើសរើសកម្ចីធនាគារ៖ អ្វីដែលសំខាន់ ត្រូវចេះប្រៀបធៀបអត្រាការប្រាក់។ កុំប្រញាប់យកធនាគារដំបូងដែលអ្នកជួប។ ត្រូវប្រៀបធៀបអត្រាការប្រាក់រវាងធនាគារ ៣ ទៅ ៤ ផ្សេងគ្នា (ពិនិត្យមើលអត្រាការប្រាក់ថេរ Fixed Rate ក្នុងឆ្នាំដំបូងៗ និងអត្រាការប្រាក់ប្រែប្រួល Floating Rate ក្នុងឆ្នាំបន្ទាប់)។ ជ្រើសរើស លក្ខខណ្ឌសងមុនកំណត់ ដោយឆែកមើលកិច្ចសន្យាធនាគារ ត្រង់ចំណុចថា "តើមានការផាកពិន័យដែរឬទេ ប្រសិនបើអ្នកមានលុយដុំ ហើយចង់បង់ផ្តាច់ ឬបង់បង្កើនប្រាក់ដើមមុនកំណត់?"។

៥.គ្រប់គ្រងអារម្មណ៍៖ កុំទិញតាមការអូសទាញ ឬអារម្មណ៍ឆេវឆាវ ដោយសារតែឃើញគេទិញ ឬដោយសារអ្នកលក់ជំរុញថា ជិតអស់ស្តុក។ ការទិញផ្ទះជាកាតព្វកិច្ចរយៈពេលវែង (១៥ ទៅ ២៥ ឆ្នាំ) ដូច្នេះត្រូវស្ងប់អារម្មណ៍ និងគិតឲ្យបានល្អិតល្អន់។ ចំណុចសំខាន់ ត្រូវទិញផ្ទះដែល សមស្របនឹងតម្រូវការបច្ចុប្បន្ន។ ប្រសិនបើទើបតែចាប់ផ្តើម មិនចាំបាច់បង្ខំទិញវីឡាធំភ្លាមៗឡើយ។ ចាប់ផ្តើមពីអាផាតមិន ផ្ទះល្វែង ឬផ្ទះអាជីវកម្មតូចសមរម្យមួយ ដែលស្ថិតក្នុងលទ្ធភាពហិរញ្ញវត្ថុរបស់អ្នកជាមុនសិន។

ជារួម អាចនិយាយបានថា ផ្ទះល្អ គឺផ្ទះដែលផ្តល់ជម្រកសុខសាន្ត និងមិនប្លន់យកក្តីសុខហិរញ្ញវត្ថុរបស់អ្នករៀងរាល់ចុងខែ។ ដូច្នេះ មុនសម្រេចចិត្តទិញផ្ទះ ត្រូវគិតឲ្យបានច្បាស់លាស់បន្តិច​ ដើម្បីកុំឲ្យពិបាកផ្នែកហិរញ្ញវត្ថុនៅពេលក្រោយ៕