កាលពីពេលថ្មីៗនេះ ប្រព័ន្ធផ្សព្វផ្សាយខ្នាតយក្សរបស់អង់គ្លេសគឺ BBC Travel បានបញ្ចេញបញ្ជីឈ្មោះ "ទីតាំងទេសចរណ៍ល្អបំផុតទាំង ២០ ដែលត្រូវតែទៅលេងក្នុងឆ្នាំ ២០២៦" ហើយអ្វីដែលរំភើបបំផុតនោះគឺ រាជធានីភ្នំពេញ របស់កម្ពុជា បានឈរឈ្មោះយ៉ាងត្រដែតក្នុងចំណោមគោលដៅល្បីៗជុំវិញពិភពលោក។ ខាងក្រោមនេះ គឺជាចំណុចពិសេសធំៗ ៣ នៃរាជធានីភ្នំពេញ៖

១/. ការផ្លាស់ប្តូរមុខមាត់ថ្មីនៃ "ទីក្រុងដងទន្លេ"

BBC បានសង្កត់ធ្ងន់ថា ភ្នំពេញលែងជាទីក្រុងដែលមនុស្សគ្រាន់តែឆ្លងកាត់ដើម្បីទៅសៀមរាបទៀតហើយ។ ការអភិវឌ្ឍន៍តំបន់មាត់ទន្លេយ៉ាងស្រស់ស្អាត ការបង្កើតឱ្យមានកន្លែងដើរថ្មើរជើង និងការរួមបញ្ចូលគ្នារវាងជីវភាពរស់នៅតាមបែបមាត់ទឹក ជាមួយនឹងភាពរស់រវើកនៃទីក្រុងទំនើប បានធ្វើឱ្យភ្នំពេញក្លាយជា "បេះដូងថ្មី" នៃអាស៊ីអាគ្នេយ៍ដែលអ្នកទេសចរមិនអាចរំលងបាន។

២/. ភាពសម្បូរបែបនៃសិល្បៈ និងវប្បធម៌យុវវ័យ

អ្វីដែលធ្វើឱ្យបរទេសភ្ញាក់ផ្អើលបំផុត គឺភាពរីកដុះដាលនៃវិស័យសិល្បៈ។ ភ្នំពេញត្រូវបានគេមើលឃើញថាជាមជ្ឈមណ្ឌលនៃភាពច្នៃប្រឌិត ចាប់ពីវិចិត្រសាលសិល្បៈទំនើបៗ ហាងកាហ្វេដែលមានស្ថាបត្យកម្មប្លែកៗ រហូតដល់ការរស់ឡើងវិញនៃតន្ត្រី និងសិល្បៈខ្មែរដែលត្រូវបានច្នៃជារបៀបថ្មីដោយយុវជនជំនាន់ក្រោយ។ នេះគឺជា "ថាមពល" ដែល BBC ចាត់ទុកថាជាចំណុចទាក់ទាញបំផុតសម្រាប់ឆ្នាំ ២០២៦។

៣/. បទពិសោធន៍អាហារដែលមិនអាចបំភ្លេចបាន

នៅក្នុងអត្ថបទរបស់ BBC ក៏បានកោតសរសើរដល់ការរីកចម្រើននៃវិស័យម្ហូបអាហារនៅភ្នំពេញផងដែរ។ ទីក្រុងនេះបានក្លាយជាកន្លែងដែលអ្នកទេសចរអាចស្វែងរកបាននូវរសជាតិអាហារបែប Fine Dining លំដាប់ខ្ពស់ រហូតដល់អាហារតាមចិញ្ចើមផ្លូវដែលមានរសជាតិដើមពិតៗ។ ការបើកចិត្តទូលាយទទួលយកវប្បធម៌អាហារចម្រុះជាតិសាសន៍ បានធ្វើឱ្យភ្នំពេញមានឈ្មោះបោះសម្លេងខ្លាំងលើឆាកអន្តរជាតិ។

លើសពីនេះ អាកាសយានដ្ឋានអន្តរជាតិតេជោថ្មី ដែលជា  គម្រោងហេដ្ឋារចនាសម្ព័ន្ធដ៏ធំបំផុតរបស់កម្ពុជា ដែលតុបតែងលម្អដោយព្រះពុទ្ធរូបប្រាក់ដ៏ធំ ត្រូវបានគេរំពឹងថានឹងធ្វើឱ្យភ្ញៀវទេសចរអន្តរជាតិមានលំហូរចូលពេញមួយឆ្នាំ ២០២៦ ជាពិសេសជើងហោះហើរថ្មីៗពីអារ៉ាប់រួម តួកគី ចិន និងជប៉ុនជាដើម៕