បន្ទាប់ពីបានរងឥទ្ធិពលយ៉ាងធ្ងន់ធ្ងរជាបន្តបន្ទាប់ពី វិបត្តិសេដ្ឋកិច្ចសកល រួមផ្សំនឹងកត្តាប្រឈមមិនប្រាកដប្រជាជាច្រើនទៀត វិស័យអចលនទ្រព្យនៅទូទាំងពិភពលោក ក៏ដូចជាវិស័យអចលនទ្រព្យនៅក្នុងប្រទេសកម្ពុជា បានជួបប្រទះនូវការធ្លាក់ចុះយ៉ាងខ្លាំងគួរឱ្យកត់សម្គាល់។ ស្ថានភាពនៃការធ្លាក់ចុះនេះបានជះឥទ្ធិពលទៅលើគ្រប់ផ្នែកទាំងអស់នៃវិស័យ តាំងពី លំនៅឋាន ពាណិជ្ជកម្ម រហូតដល់ការិយាល័យ និងដីធ្លី ជាដើម។

យ៉ាណាមិញ តើគិតមកដល់ពាក់កណ្តាលឆ្នាំ២០២៦ នេះ សកម្មភាពទិញ លក់ និងជួលអចលនទ្រព្យនៅក្នុងទីផ្សារប្រទេសកម្ពុជា មានការប្រែប្រួល និងការវិវឌ្ឍបែបណាហើយ បើប្រៀបធៀបទៅនឹងឆ្នាំចាស់ៗកន្លងទៅ ជាពិសេសគឺឆ្នាំ២០២៥?

តាមរយៈការសង្កេត និងការយល់ឃើញរបស់លោកស្រី អាន សុធីតា អគ្គនាយិកាគ្រប់គ្រងក្រុមហ៊ុន PropNex Cambodia និងជាអ្នកជំនាញផ្នែកអចលនទ្រព្យមួយរូបនៅក្នុងប្រទេសកម្ពុជាបានឲ្យដឹងថា សកម្មភាពទិញ លក់ និងជួលអចលនទ្រព្យនៅក្នុងទីផ្សារកម្ពុជាសម្រាប់ឆ្នាំ២០២៦ នេះ គឺមានទំហំប្រតិបត្តិការជារួមទាបជាងឆ្នាំចាស់បន្តិចមែន ប៉ុន្តែសញ្ញាណនេះមិនមែនជារឿងអវិជ្ជមានទាំងស្រុងនោះទេ ពោលគឺវាបានក្លាយទៅជាឱកាសដ៏ល្អមួយសម្រាប់ក្រុមអ្នកទិញ និងក្រុមអ្នកជួលអចលនទ្រព្យទៅវិញ។

ថ្លែងប្រាប់ Business Cambodia អ្នកជំនាញរូបនេះបានពន្យល់ និងបញ្ជាក់បន្ថែម ដោយផ្អែកលើបទពិសោធន៍ផ្ទាល់ ក្នុងវិស័យនេះថា ទីផ្សារអចលនទ្រព្យកម្ពុជានាពេលបច្ចុប្បន្ននេះ កំពុងស្ថិតនៅក្នុងដំណាក់កាលគន្លឹះមួយដែលគេអាចហៅតាមបច្ចេកទេសបានថា ជាទីផ្សាររបស់អ្នកទិញ និងអ្នកជួល ឬ ( Buyer and Tenant Market )។ ការណ៍ដែលទីផ្សារស្ថិតក្នុងស្ថានភាពបែបនេះ គឺមានន័យថា នៅពេលដែលយើងធ្វើការប្រៀបធៀបទៅនឹងឆ្នាំ២០២៥ កន្លងទៅ ទោះបីជាទំហំនៃប្រតិបត្តិការទិញ លក់ និងជួលមានសន្ទុះទាបជាងមុនបន្តិចក្តី ប៉ុន្តែផលចំណេញ និងអំណាចនៃការសម្រេចចិត្តបានធ្លាក់ទៅក្នុងដៃរបស់អ្នកទិញ និង អ្នកជួលស្ទើរតែទាំងស្រុង។ មូលហេតុចម្បងដែលនាំឱ្យកើតមានស្ថានភាពបែបនេះ គឺដោយសារតែបច្ចុប្បន្នមានចំនួនស្តុកនៃអចលនទ្រព្យ ដែលសេសសល់ និងកំពុងដាក់លក់នៅលើទីផ្សារមានបរិមាណយ៉ាងសម្បូរបែប ដែលធ្វើឱ្យអ្នកទិញ និងអ្នកជួលមានជម្រើសច្រើន ក្នុងការប្រៀបធៀប ព្រមទាំងមានឱកាសខ្ពស់ ក្នុងការចរចាតម្លៃឱ្យមកនៅទាបជាងមុន។

ប្រសិនបើយើងងាកមកពិនិត្យមើលលើទីផ្សារជួលវិញ អត្រាតម្លៃនៃការជួលជាមធ្យមនៅទូទាំងទីផ្សារ បានធ្លាក់ចុះប្រមាណជា ១០ ភាគរយ បើប្រៀបធៀបទៅនឹងទិន្នន័យក្នុងឆ្នាំ ២០២៥។ ទន្ទឹមនឹងការធ្លាក់ចុះនៃតម្លៃជួលនេះ និន្នាការនៃការទាមទារទំហំផ្ទៃក្រឡាក៏មានការប្រែប្រួលដែរ ដោយសារបច្ចុប្បន្ន អតិថិជនភាគច្រើន មានតម្រូវការផ្ទៃក្រឡាដែលមានទំហំតូចជាងមុន ដើម្បីងាយស្រួលក្នុងការគ្រប់គ្រង និងកាត់បន្ថយការចំណាយមិនចាំបាច់។ ជាពិសេសជាងនេះទៅទៀត ទីផ្សារការិយាល័យសម្រាប់ការជួល ឬ ( Office Market )  នាពេលបច្ចុប្បន្ន នៅតែបន្តប្រឈមមុខនឹងបញ្ហាស្មុគស្មាញ និងភាពរកាំរកូសខ្លាំងជាងគេ ដោយសារតែតម្រូវការជារួម មានការថយចុះ ខណៈដែលការផ្គត់ផ្គង់អគារការិយាល័យថ្មីៗ នៅតែបន្តកើនឡើង ដែលកត្តានេះធ្វើឱ្យម្ចាស់អគារ ត្រូវបង្ខំចិត្តទម្លាក់តម្លៃ ឬ ផ្តល់ការអនុគ្រោះច្រើនដើម្បីទាក់ទាញអ្នកជួល ដែលមានជម្រើសច្រើននៅក្នុងដៃ។ ដោយឡែក សម្រាប់ទីផ្សារខុនដូ ដែលទើបតែសាងសង់ថ្មីៗ គេសង្កេតឃើញថា តម្លៃលក់នៅតែអាចរក្សាបាននូវស្ថិរភាពល្អប្រសើរនៅឡើយ ប៉ុន្តែសម្រាប់ទីផ្សារខុនដូលក់បន្ត ឬ ( Secondary Market ) វិញ គឺមានការធ្លាក់ចុះនៃតម្លៃប្រមាណជា ៥ ភាគរយ បើធៀបទៅនឹងឆ្នាំមុន។

លោកស្រី អាន សុធីតា បានបន្តការរៀបរាប់ទៀតថា នៅក្នុងកាលៈទេសៈបច្ចុប្បន្ននេះ ក្រុមហ៊ុនអ្នកអភិវឌ្ឍន៍អចលនទ្រព្យភាគច្រើន បាននិងកំពុងកែប្រែយុទ្ធសាស្ត្រអាជីវកម្មរបស់ខ្លួន ដោយងាកមកផ្តោតការយកចិត្តទុកដាក់ខ្លាំង ទៅលើការបង្កើតគម្រោងអភិវឌ្ឍន៍ណា ដែលមានតម្លៃសមរម្យ និងស្ថិតក្នុងកម្រិតមធ្យមវិញ។ ការធ្វើបែបនេះ គឺដើម្បីឆ្លើយតបទៅនឹង តម្រូវការប្រើប្រាស់ពិតប្រាកដរបស់ទីផ្សារក្នុងស្រុក ដែលជាក្រុមអ្នកទិញមានតម្រូវការចាំបាច់សម្រាប់រស់នៅពិតប្រាកដ ជាជាងការសាងសង់គម្រោងលំដាប់អភិជនហួសពីលទ្ធភាពជាក់ស្តែង។

យ៉ាងណាមិញ បើទោះបីជាស្ថានភាពទីផ្សារជារួម មិនទាន់បង្ហាញសញ្ញានៃការងើបឡើងវិញយ៉ាងល្អប្រសើរក៏ដោយ ប៉ុន្តែសម្រាប់ក្រុមហ៊ុន PropNex Cambodia ក្រោមការដឹកនាំរបស់លោកស្រីផ្ទាល់ គឺនៅតែអាចរក្សាបាននូវលទ្ធផលការងារល្អ គួរឱ្យកត់សម្គាល់ នៅក្នុងអំឡុងត្រីមាសទី ១ នៃឆ្នាំ ២០២៦ នេះ។ ទោះជាយ៉ាងណាក៏ដោយ លោកស្រីក៏បានទទួលស្គាល់ផងដែរថា ចំនួនអតិថិជនដែលបានមកសាកសួរព័ត៌មាន ក៏ដូចជាឱកាសក្នុងការបង្កើតអាជីវកម្មថ្មីៗ នៅក្នុងកំឡុងពេលត្រីមាសទី ២ គឺមានការថយចុះបន្តិចបន្តួច បើប្រៀបធៀបទៅនឹង ទិន្នន័យដែលទទួលបាននៅក្នុងត្រីមាសដំបូង។

នៅក្នុងដំណើរការវិវត្តបច្ចុប្បន្ន សកម្មភាពនៃការទិញ លក់ អចលនទ្រព្យដែលមានភាពរស់រវើក និងសកម្មជាងគេបំផុត គឺផ្តោតជាសំខាន់ទៅលើ ប្រភេទអចលនទ្រព្យលំនៅឋាន ដីធ្លី និងអចលនទ្រព្យ ក្នុងវិស័យឧស្សាហកម្ម ដូចជា ឃ្លាំងទំនិញ ឬដី សម្រាប់សាងសង់រោងចក្រជាដើម។ ប្រភេទអចលនទ្រព្យទាំងនេះ គឺជាក្រុមឆ្លើយតបទៅនឹងតម្រូវការប្រើប្រាស់ជាក់ស្តែងប្រចាំថ្ងៃរបស់ប្រជាពលរដ្ឋ និង ខ្សែច្រវាក់ផលិតកម្ម។ ផ្ទុយទៅវិញ សម្រាប់ទីផ្សារអចលនទ្រព្យប្រភេទ ពាណិជ្ជកម្មខ្នាតធំ ដូចជាមជ្ឈមណ្ឌលលក់ទំនិញ ឬ អគារពាណិជ្ជកម្មចម្រុះ នៅតែបន្តជួបប្រទះ នឹងបញ្ហាប្រឈមធំៗជាច្រើន ហើយដាច់ខាត គឺត្រូវទាមទារពេលវេលាបន្ថែមទៀត សម្រាប់ការស្តារឡើងវិញឱ្យមានលំនឹងឡើងវិញ។

បន្ថែមពីលើនេះ លោកស្រី អាន សុធីតា បានគូសបញ្ជាក់ថា ទីផ្សារដែលក្រុមហ៊ុនកំពុងតែបម្រើសេវាកម្មជូនភាគច្រើនបំផុតនាពេលនេះ គឺទីផ្សារក្នុងស្រុកតែម្តង ដោយសារអតិថិជនភាគច្រើនលើសលប់ គឺជាប្រជាពលរដ្ឋខ្មែរ ក្រុមអ្នកជំនួញនៅក្នុងស្រុក និងក្រុមអ្នកវិនិយោគទុនក្នុងស្រុក ដែលពួកគាត់មានបំណងទិញអចលនទ្រព្យទាំងនោះ សម្រាប់យកទៅរស់នៅផ្ទាល់ខ្លួន ឬ ទិញទុកសម្រាប់បង្កើតប្រភពចំណូលអកម្មពីការជួលប្រចាំខែ និងរង់ចាំការកើនឡើងនៃតម្លៃអចលនទ្រព្យនាពេលអនាគត។ ចំពោះទីផ្សារអន្តរជាតិវិញ គឺមិនទាន់មានសកម្មភាពរស់រវើក ឬ មានកម្លាំងទិញខ្លាំងក្លា ដូចកាលពីសម័យមុនវិបត្តិនោះឡើយ ដែលនេះទាមទារឱ្យភ្នាក់ងារទាំងអស់ ត្រូវពឹងផ្អែកលើអតិថិជនក្នុងស្រុកជាចម្បង។

ដើម្បីអាចបំពេញសេវាកម្ម និងឆ្លើយតបទៅនឹងតម្រូវការរបស់អតិថិជនឱ្យបានល្អឥតខ្ចោះ នៅក្នុងស្ថានភាពដែលទីផ្សារកំពុងស្ថិតនៅក្នុងភាពមិនប្រាកដប្រជា និងរង្គោះរង្គើបែបនេះ ក្រុមហ៊ុន PropNex Cambodia បានដាក់ចេញនូវគោលការណ៍ពង្រឹងសមត្ថភាព ចំណេះដឹង និងជំនាញវិជ្ជាជីវៈរបស់បុគ្គលិក ក៏ដូចជាភ្នាក់ងារលក់ទាំងអស់ឱ្យកាន់តែខ្ពស់ជាងមុនទ្វេដង។ លោកស្រី អាន សុធីតា បានសង្កត់ធ្ងន់ថា នៅក្នុងស្ថានភាពទីផ្សារដ៏លំបាកនាបច្ចុប្បន្ន ភាពជាអ្នកមានវិជ្ជាជីវៈខ្ពស់ និងភាពស្មោះត្រង់ចំពោះអតិថិជន គឺមានសារៈសំខាន់ចាំបាច់បំផុតជាងពេលណាៗទាំងអស់។ ហេតុដូច្នេះហើយ ក្រុមហ៊ុន PropNex Cambodia តែងតែយកចិត្តទុកដាក់ និង ផ្តល់តម្លៃខ្ពស់បំផុតលើការបណ្តុះបណ្តាលភ្នាក់ងារលក់ឱ្យមានចំណេះដឹងផ្នែកទីផ្សារយ៉ាងស៊ីជម្រៅ អាចធ្វើការវិភាគទិន្នន័យទីផ្សារបានត្រឹមត្រូវ យល់ដឹងច្បាស់ពីតម្រូវការពិតប្រាកដរបស់អតិថិជនម្នាក់ៗ និង មានលទ្ធភាពផ្តល់អនុសាសន៍ប្រកបដោយវិជ្ជាជីវៈខ្ពស់។ ក្រុមហ៊ុនមានជំនឿចិត្តយ៉ាងមុតមាំថា ការលក់ដែលទទួលបានជោគជ័យពិតប្រាកដ និង យូរអង្វែង មិនមែនផ្អែកទៅលើតែការបញ្ចុះតម្លៃ ដើម្បីទាក់ទាញចិត្ត ឬការប្រញាប់ប្រញាល់បិទការលក់ឱ្យបានលឿននោះទេ ប៉ុន្តែវាគឺជាការជួយជ្រោមជ្រែងអតិថិជនឱ្យធ្វើការសម្រេចចិត្តបានត្រឹមត្រូវបំផុត និងជួយកាត់បន្ថយរាល់ហានិភ័យហិរញ្ញវត្ថុផ្សេងៗក្នុងរយៈពេលវែង។

ក្រៅពីការបង្ហាញនូវរូបភាពជារួមនៃស្ថានភាពទីផ្សារអចលនទ្រព្យ និងសកម្មភាពទិញ លក់ ព្រមទាំងការជួលនៅក្នុងប្រទេសកម្ពុជានាពេលបច្ចុប្បន្ន លោកស្រី អាន សុធីតា ក្នុងនាមជាអ្នកជំនាញដែលមានបទពិសោធន៍ និងបានប្រឡូកផ្ទាល់នៅក្នុងវិស័យនេះអស់រយៈពេលច្រើនឆ្នាំ ក៏បានចែករំលែកនូវទស្សនទាន បទពិសោធន៍ និងយោបល់ល្អៗជាច្រើន សម្រាប់ជាប្រយោជន៍ដល់សាធារណជន ជាពិសេសសម្រាប់អ្នកដែលមានបំណង ចង់ធ្វើការវិនិយោគលើវិស័យអចលនទ្រព្យ នៅក្នុងអំឡុងពេលបច្ចុប្បន្ននេះ។ នៅក្នុងនោះ លោកស្រីបានលើកឡើងថា ស្ថានភាពទីផ្សារនាពេលបច្ចុប្បន្ន គឺកំពុងតែផ្តល់ឱកាសយ៉ាងល្អប្រសើរសម្រាប់បុគ្គល ឬអ្នកវិនិយោគទាំងឡាយណាដែលមានសាច់ប្រាក់នៅក្នុងដៃគ្រប់គ្រាន់ ឬមានការរៀបចំផែនការហិរញ្ញវត្ថុផ្ទាល់ខ្លួនច្បាស់លាស់ត្រឹមត្រូវ។ ទោះជាយ៉ាងណាក៏ដោយ អ្នកទិញទាំងអស់ មិនគួរផ្តោតការយកចិត្តទុកដាក់តែទៅលើកត្តាតម្លៃថោកតែមួយមុខនោះទេ ពីព្រោះមិនមែនរាល់អចលនទ្រព្យដែលមានតម្លៃទាប ឬថោកខ្លាំងទាំងអស់ សុទ្ធតែជាឱកាសវិនិយោគដ៏ល្អ និងចំណេញនោះឡើយ។

ចំណុចដែលសំខាន់បំផុត និង ទាមទារឱ្យអ្នកវិនិយោគត្រូវពិនិត្យមើលឱ្យបានដិតដល់នោះ គឺត្រូវជ្រើសរើសទិញតែអចលនទ្រព្យណា ដែលមានគុណភាពសំណង់ល្អត្រឹមត្រូវតាមស្តង់ដារ មានទំហំសមស្របទៅនឹងការប្រើប្រាស់ជាក់ស្តែង មានប្រព័ន្ធគ្រប់គ្រងអគារ ឬបុរីបានល្អ ផ្ទុកទៅដោយលក្ខណៈពិសេសប្លែកពីគេ និងជាពិសេស គឺត្រូវតែមានសក្តានុពលខ្ពស់ក្នុងការទទួលបានទាំងចំណូលត្រឡប់មកវិញពីការជួល និងការកើនឡើងនៃតម្លៃអចលនទ្រព្យផ្ទាល់ក្នុងរយៈពេលវែង ឬ ( Capital Appreciation )។ ជាពិសេសទៅទៀតនោះ អ្នកទិញគួរតែធ្វើការសម្រេចចិត្តទិញអចលនទ្រព្យនៅពេលណា ដែលខ្លួនមានតម្រូវការប្រើប្រាស់ពិតប្រាកដ ឬនៅពេលដែលមានផែនការវិនិយោគវែងឆ្ងាយច្បាស់លាស់ ហើយគួរតែស្វែងរកការប្រឹក្សាយោបល់បន្ថែមពីអ្នកជំនាញ ឬភ្នាក់ងារអចលនទ្រព្យដែលមានវិជ្ជាជីវៈត្រឹមត្រូវ មានអាជ្ញាប័ណ្ណច្បាស់លាស់ និងមានភាពស្មោះត្រង់ ដើម្បីជួយវាយតម្លៃរាល់ឱកាស ចំណេញ និងជួយកាត់បន្ថយរាល់ហានិភ័យនានា មុននឹងធ្វើការសម្រេចចិត្តទម្លាក់ទុនវិនិយោគ។

សូមជម្រាបជូនដែរថា ក្រុមហ៊ុន PropNex Cambodia គឺជាផ្នែកមួយនៃក្រុមហ៊ុនភ្នាក់ងារអចលនទ្រព្យខ្នាតយក្ស ដែលទទួលបានចំណាត់ថ្នាក់លេខមួយនៅក្នុងប្រទេសសិង្ហបុរី។ ក្រុមហ៊ុននេះ បានសម្រេចចិត្តឈានជើងចូលមកកាន់ទីផ្សារប្រទេសកម្ពុជា នៅក្នុងអំឡុងឆ្នាំ ២០២១ និងបានរៀបចំពិធីបើកសម្ពោធជាផ្លូវការ កាលពីថ្ងៃទី ២៤ ខែ កញ្ញា ឆ្នាំ ២០២២ កន្លងទៅ។ ក្រុមហ៊ុន PropNex Cambodia មានផ្តល់នូវសេវាកម្មផ្នែកអចលនទ្រព្យយ៉ាងសម្បូរបែប និងមានវិសាលភាពពេញលេញ តបតាមតម្រូវការរបស់អតិថិជន ដូចជាការធ្វើទីផ្សារ និងការលក់សម្រាប់គម្រោងអភិវឌ្ឍន៍ផ្សេងៗ សេវាកម្មរៀបចំការជួលផ្ទះ លំនៅឋាន និងអគារពាណិជ្ជកម្មគ្រប់ប្រភេទ ការប្រឹក្សាលើការវិនិយោគទុនលើដីធ្លី សេវាកម្មវាយតម្លៃតម្លៃអចលនទ្រព្យគ្រប់ប្រភេទ ការផ្តល់ប្រឹក្សានិងការធ្វើការស្រាវជ្រាវស៊ីជម្រៅលើទិន្នន័យអចលនទ្រព្យ ព្រមទាំងសេវាកម្មគ្រប់គ្រងលើអចលនទ្រព្យផងដែរ។

សម្រាប់សាធារណជន ឬលោកអ្នកដែលមានបំណងចង់ប្រើប្រាស់សេវាកម្ម ឬចង់ទទួលបានការប្រឹក្សាយោបល់ប្រកបដោយវិជ្ជាជីវៈខ្ពស់ពីក្រុមហ៊ុន PropNex Cambodia សូមធ្វើការទំនាក់ទំនងទៅកាន់លេខទូរស័ព្ទផ្ទាល់គឺ 093 983 274 ឬលេខ 011 333 013 ឬក៏អាចចូលទៅកាន់ទំព័រហ្វេសប៊ុកផ្លូវការរបស់ក្រុមហ៊ុនដែលមានឈ្មោះថា PropNex Cambodia ផងដែរ៕